ಬಾಲಿವುಡ್ ಮತ್ತೊಂದು ಅದ್ಧೂರಿ ವಿವಾಹಕ್ಕೆ ಸಾಕ್ಷಿಯಾಗಲಿದೆ. ಗ್ಲೋಬಲ್ ಐಕಾನ್ ಪ್ರಿಯಾಂಕಾ ಚೋಪ್ರಾ ಸಂಬಂಧಿ, ನಟಿ ಪರಿಣಿತಿ ಚೋಪ್ರಾ ಅವರು ಆಪ್‌ ಸಂಸದ ರಾಘವ್ ಚಡ್ಡಾ ಅವರೊಂದಿಗೆ ಹಸೆಮಣೆ ಏರಲು ಸಜ್ಜಾಗಿದ್ದಾರೆ. ರಾಯಲ್ ವೆಡ್ಡಿಂಗ್ಗೆ ದಿನಗಣನೆ ಆರಂಭವಾಗಿದೆ. ಭರ್ಜರಿ ಸಿದ್ಧತೆಗಳು ನಡೆಯುತ್ತಿವೆ.
ವರದಿಗಳ ಪ್ರಕಾರ, ಸೆಪ್ಟೆಂಬರ್ 24 ರಂದು ರಾಜಸ್ಥಾನದ ಉದಯಪುರದಲ್ಲಿ ವಿವಾಹ ಶಾಸ್ತ್ರ ನೆರವೇರಲಿದೆ. ದೆಹಲಿಯಲ್ಲಿ ಕೆಲವು ಆಚರಣೆಗಳು ನಡೆಯಲಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ವಧು- ವರರ ನಿವಾಸಗಳು ಶೃಂಗಾರಗೊಳ್ಳುತ್ತಿವೆ.
ಭಾನುವಾರ ಪರಿಣಿತಿ ಚೋಪ್ರಾ ದೆಹಲಿ ವಿಮಾನ ನಿಲ್ದಾಣದಲ್ಲಿ ಕಾಣಿಸಿಕೊಂಡರು. ಭಾವಿ ಪತಿ, ಆಮ್ ಆದ್ಮಿ ಪಕ್ಷದ ಯುವ ನಾಯಕ ರಾಘವ್ ಚಡ್ಡಾ, ಪರಿಣಿತಿಯನ್ನು ಕರೆದೊಯ್ಯಲು ವಿಮಾನ ನಿಲ್ದಾಣಕ್ಕೆ ಬಂದಿದ್ದರು. ಪಾಪರಾಜಿಗಳು ಶೇರ್ ಮಾಡಿದ್ದ ಏರ್ಪೋರ್ಟ್ ವಿಡಿಯೋ ಸಖತ್ ವೈರಲ್ ಆಗಿತ್ತು.
ಬಳಿಕ ಪಾಪರಾಜಿಗಳು ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದ ಕೆಲವು ವಿಡಿಯೋಗಳಲ್ಲಿ, ರಾಘವ್ ಮನೆ ಬಳಿಯ ತಯಾರಿಯನ್ನು ತೋರಿಸಿತ್ತು. ದೆಹಲಿಯಲ್ಲಿರುವ ರಾಘವ್ ನಿವಾಸದ ಮುಂದೆ, ಮದುವೆ ಪೂರ್ವ ತಯಾರಿಗೆ ಬೇಕಾದ ವಸ್ತುಗಳನ್ನು ಇಳಿಸುತ್ತಿರುವುದನ್ನು ವಿಡಿಯೋದಲ್ಲಿ ಕಾಣಬಹುದು. ಈ ಸಿದ್ಧತೆಗಳು ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದೆ.
ವಿವಾಹಪೂರ್ವ ಶಾಸ್ತ್ರ ನೆರವೇರಿಸಲು ಪರಿಣಿತಿ ಮತ್ತು ರಾಘವ್ ಕುಟುಂಬಸ್ಥರು ದೆಹಲಿಯಲ್ಲಿದ್ದಾರೆ. ಮದುವೆಗೆ ಉದಯಪುರಕ್ಕೆ ತೆರಳುವ ಮುನ್ನ ಕುಟುಂಬಸ್ಥರು ಮನರಂಜನೆಗಾಗಿ ಫ್ಯಾಮಿಲಿ ಕ್ರಿಕೆಟ್ ಪಂದ್ಯಾವಳಿ ಕೂಡ ಆಯೋಜಿಸಲಿದ್ದಾರೆ. ವಧು-ವರರಿಗೆ ಕ್ರಿಕೆಟ್ ಕುರಿತು ಆಸಕ್ತಿ ಇದೆ. ಕೆಲ ಸಮಯದ ಹಿಂದೆ ಇಬ್ಬರೂ ಒಟ್ಟಿಗೆ ಐಪಿಎಲ್ ಪಂದ್ಯಾವಳಿ ವೀಕ್ಷಿಸಿ ಸಂಭ್ರಮಿಸಿದ್ದರು.
ಇದನ್ನೂ ಓದಿ: 'ತೋತಾಪುರಿ 2' ಟ್ರೇಲರ್ ಬಿಡುಗಡೆಗೊಳಿಸಿದ ಶಿವ ರಾಜ್ಕುಮಾರ್: ಜಗ್ಗೇಶ್-ಡಾಲಿ ಜುಗಲ್ಬಂದಿಗೆ ಏನಂದ್ರು?
ಮದುವೆಗಾಗಿ ಪರಿಣಿತಿ ಚೋಪ್ರಾ ತಾವು ಒಪ್ಪಿಕೊಂಡಿರುವ ಎಲ್ಲಾ ಕೆಲಸಗಳನ್ನು ಈಗಾಗಲೇ ಪೂರ್ಣಗೊಳಿಸಿದ್ದಾರೆ. ದೆಹಲಿಯಲ್ಲಿ ಪ್ರೀ ವೆಡ್ಡಿಂಗ್ ಸೆಲೆಬ್ರೇಶನ್ ಪೂರ್ಣಗೊಳಿಸಿ, ಅದ್ಧೂರಿ ವಿವಾಹಕ್ಕೆ ಉದಯಪುರಕ್ಕೆ ಪ್ರಯಾಣಿಸಲಿದ್ದಾರೆ. ಸೆಪ್ಟೆಂಬರ್ 23 ರಂದು ಮದುವೆಪೂರ್ವದ ಶಾಸ್ತ್ರ, ಸಮಾರಂಭಗಳು ನಡೆಯಲಿವೆ. ಸೆ. 24 ರಂದು ಹಾರ ಬದಲಾಯಿಸಿಕೊಳ್ಳಲಿದ್ದಾರೆ. ತಾಜ್ ಲೇಕ್ ಪ್ಯಾಲೆಸ್, ಲೀಲಾ ಪ್ಯಾಲೆಸ್ಗಳಲ್ಲಿ ಸೆಪ್ಟೆಂಬರ್ 23 ಮತ್ತು 24ರ ಸಮಾರಂಭಗಳು ನೆರವೇರಲಿದೆ. ಅದ್ಧೂರಿ ಮದುವೆಯ ಫೋಟೋ, ವಿಡಿಯೋ ವೀಕ್ಷಿಸಲು ಅಭಿಮಾನಿಗಳು ಕಾತರರಾಗಿದ್ದಾರೆ.
ಇದನ್ನೂ ಓದಿ: ಹೊಸಬರ 'ಕೆಂದಾವರೆ' ಸಿನಿಮಾಗೆ ಅಶ್ವಿನಿ ಪುನೀತ್ ರಾಜ್ಕುಮಾರ್ ಸಾಥ್
ಇನ್ನೂ ನಟಿ ಪರಿಣಿತಿ ಚೋಪ್ರಾ ಅವರ 'ಮಿಷನ್ ರಾಣಿಗಂಜ್: ದಿ ಗ್ರೇಟ್ ಭಾರತ್ ರೆಸ್ಕ್ಯೂ' ಚಿತ್ರ ತೆರೆಕಾಣಲು ಸಜ್ಜಾಗಿದೆ. ಟಿನು ಸುರೇಶ್ ನಿರ್ದೇಶನದ ಈ ಸಿನಿಮಾದಲ್ಲಿ ಅಕ್ಷಯ್ ಕುಮಾರ್ ಪ್ರಮುಖ ಪಾತ್ರ ವಹಿಸಿದ್ದಾರೆ, ನೈಜ ಘಟನೆಗಳನ್ನು ಆಧರಿಸಿರುವ ಸಿನಿಮಾ ಅ. 6ರಂದು ಥಿಯೇಟರ್ಗಳಲ್ಲಿ ಬಿಡುಗಡೆ ಆಗಲಿದೆ. ನಟಿಯ ಕೊನೆಯ ಸಿನಿಮಾ ಕೋಡ್ ನೇಮ್: ತಿರಂಗಾ.
