ಹೈದ್ರಾಬಾದ್: ನಟ ರಣಬೀರ್ ಕಪೂರ್ ಅಭಿನಯದ ಅನಿಮಲ್ ಚಿತ್ರದ ಪ್ರೀ ಟೀಸರ್ ಬಿಡುಗಡೆಯಾದ ಬೆನ್ನಲ್ಲೇ ಇದೀಗ ನಟ ಸನ್ನಿ ಡಿಯೋಲ್ ಮತ್ತು ಅಮೀಷಾ ಪಟೇಲ್ ನಟನೆಯ 'ಗದಾರ್ 2' ಚಿತ್ರದ ಟೀಸರ್ ಬಿಡುಗಡೆಯಾಗಿದೆ. ಈಗಾಗಲೇ ಬಿಡುಗಡೆಗೊಂಡು ಸೂಪರ್ ಹಿಟ್ ಆಗಿದ್ದ ಗದಾರ್ ಜೊತೆಗೆ ಗದಾರ್ 2 ಟೀಸರ್ ಬಿಡುಗಡೆಯಾಗಿದೆ. ಗದಾರ್ ಚಿತ್ರದ ಸಿಕ್ವೆಲ್ ಆಗಿರುವ ಈ ಚಿತ್ರ ಸಾಮಾಜಿಕ ಜಾಲತಾಣ ಮತ್ತು ಡಿಜಿಟಲ್ ಫ್ಲಾಟ್ಫಾರ್ಮ್ನಲ್ಲಿ ಧೂಳೆಬ್ಬಿಸುತ್ತಿದೆ.
ತಾರಾ ಸಿಂಗ್ ಆಗಿ ಮತ್ತೊಮ್ಮೆ ಸನ್ನಿ ಡಿಯೋಲ್ ಮರಳಿದ್ದಾರೆ ಎಂಬ 'ಗದಾರ್ 2' ಟೀಸರ್ ಅನ್ನು ಚಿತ್ರ ತಂಡ ಹಂಚಿಕೊಂಡಿದೆ. ಒಂದು ನಿಮಿಷದ ಈ ಟೀಸರ್ನಲ್ಲಿ ನಟ ಸನ್ನಿ ಪಾಕಿಸ್ತಾನಕ್ಕೆ ಮರಳುವ ಕುರಿತ ಕಥೆ ಆರಂಭದ ಸುಳಿವನ್ನು ನೀಡಲಾಗಿದೆ. ಚಿತ್ರದಲ್ಲಿ ನಟ ಸನ್ನಿ ಡಿಯೋಲ್ ತಾರಾ ಸಿಂಗ್ ಅಗಿ ಸಿಕ್ಕಾಪಟ್ಟೆ ಆ್ಯಕ್ಷನ್ನಲ್ಲಿ ಮಿಂಚಿದ್ದಾರೆ. ಇನ್ನು ಈ ಚಿತ್ರದ ಟೀಸರ್ ನೋಡಿದ ಹಲವು ಮಂದಿ ಬೇಸರ ವ್ಯಕ್ತಪಡಿಸಿದ್ದಾರೆ. ಚಿತ್ರ ತಂಡ ನಿರೀಕ್ಷೆಗೆ ತಕ್ಕಂತೆ ಈ ಪ್ರೊಮೊಷನ್ ಮತ್ತು ಟೀಸರ್ ಬಂದಿಲ್ಲ ಎಂಬ ಮಾತು ಕೇಳಿ ಬಂದಿದೆ.
ಗದಾರ್ನ ಸಿಕ್ವೆಲ್ ಭಾಗವನ್ನು ಅನಿಲ್ ಶರ್ಮಾ ನಿರ್ದೇಶಿಸಿದ್ದಾರೆ. 2001ರಲ್ಲಿ ಬಿಡುಗಡೆಗೊಂಡಿದ್ದ 'ಗದಾರ್: ಏಕ್ ಪ್ರೇಮ್ ಕಹಾನಿ' ಚಿತ್ರ ಬಾಕ್ಸ್ ಆಫೀಸ್ ಅನ್ನು ಕೊಳ್ಳೆಹೊಡೆದಿತ್ತು. ನಟಿ ಅಮಿಷಾ ಪಟೇಲ್, ಅಮರೀಶ್ ಪುರಿ ನಟನೆಯ ಈ ಚಿತ್ರ ಸೂಪರ್ ಹಿಟ್ ಆಗಿತ್ತು. ಇದೀಗ ಎರಡನೇ ಭಾಗ 20 ವರ್ಷಗಳ ಬಳಿಕ ತೆರೆ ಮೇಲೆ ಬರಲು ಸಜ್ಜಾಗಿದೆ. 'ಗದಾರ್; ದಿ ಕಥಾ ಕಂಟಿನ್ಯೂಸ್' ಚಿತ್ರದ ಮೊದಲ ಭಾಗದ ಸಿನಿಮಾದ ಅಂತ್ಯದಿಂದ ಚಿತ್ರ ಆರಂಭವಾಗಲಿದೆ.
ಏನಿದು ಗದಾರ್ ಕಥೆ: 2001ರಲ್ಲಿ ಬಂದಿದ್ದ 'ಗದಾರ್; ಏಕ್ ಪ್ರೇಮ್ ಕಥಾ' ಚಿತ್ರದಲ್ಲಿ ನಟ ಸನ್ನಿ ಡಿಯೋಲ್ ತಾರಾ ಸಿಂಗ್ ಆಗಿ ಕಾಣಿಸಿಕೊಂಡಿದ್ದರು. ಟ್ರಕ್ ಡ್ರೈವರ್ ಆಗಿದ್ದ ಅವರು ಪಾಕಿಸ್ತಾನ ಸೇರಿದ್ದ ತಮ್ಮ ಹೆಂಡತಿ ಅಮಿಷಾ ಅವರನ್ನು ಕರೆ ತರುವ ಕಥೆ ಹೊಂದಿತ್ತು. ಇದೀಗ ಗದಾರ್ 2 ಚಿತ್ರ 1971ನೇ ಕಾಲಮಾನದಲ್ಲಿ ಭಾರತ ಮತ್ತು ಪಾಕಿಸ್ತಾನದಲ್ಲಿ ನಡೆಯುವ ಕಥೆ ಹೊಂದಿರುವುದಾಗಿ ತಂಡ ತಿಳಿಸಿದೆ. ಈ ಚಿತ್ರದಲ್ಲಿ ತಾರಾ ಸಿಂಗ್ ತಮ್ಮ ಮಗ ಚರಂಜಿತ್ನನ್ನು ಕರೆ ತರುವ ಕಥೆ ಹೊಂದಿದೆ. ಗದಾರ್ ಸಿನಿಮಾ ನಿರ್ದೇಶಕ ಅನಿಲ್ ಶರ್ಮಾ ಅವರ ಮಗ ಉತ್ಕರ್ಷ್ ಶರ್ಮಾ ಇದರಲ್ಲಿ ತಾರಾ ಸಿಂಗ್ ಮಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಗದಾರ್ ಕೂಡ ಸಂದೀಪ್ ರೆಡ್ಡಿ ವಾಂಘ ನಿರ್ದೇಶದಕ ಅನಿಮಲ್ ಮತ್ತು ಅಕ್ಷಯ್ ಕುಮಾರ್ ಅಭಿನಯದ ಒಎಂಜಿ 2 ಜೊತೆ ಬಿಡುಗಡೆಯಾಗಲಿದೆ. ಆಗಸ್ಟ್ 11ರಂದು ಚಿತ್ರ ತೆರೆಗೆ ಬರಲು ಸಜ್ಜಾಗಿದ್ದು, ಈ ಎರಡು ಚಿತ್ರಗಳ ವಿರುದ್ಧ ಫೈಟ್ ಮಾಡಲು ಸಿದ್ಧವಾಗಿದೆ.
ಇದನ್ನೂ ಓದಿ: Animal pre-teaser: ರಣಬೀರ್- ರಶ್ಮಿಕಾ ಅಭಿನಯದ 'ಅನಿಮಲ್' ಚಿತ್ರದ ಪ್ರಿ-ಟೀಸರ್ ಔಟ್
