ದೇಶಾದ್ಯಂತ ಬೆಳಕಿನ ಹಬ್ಬ ದೀಪಾವಳಿಯ ಸಂಭ್ರಮ ಜೋರಾಗಿದೆ. ಭಾರತೀಯ ಚಿತ್ರರಂಗ ಕೂಡ ಇದಕ್ಕೆ ಹೊರತಾಗಿಲ್ಲ. ಕಳೆದ ಕೆಲ ವರ್ಷಗಳಿಂದ ತಾರೆಯರು ತಮ್ಮ ಮನೆಯಲ್ಲಿ ಅದ್ಧೂರಿಯಾಗಿ ಆಚರಿಸುವ ಹಬ್ಬಕ್ಕೆ ಸಹೋದ್ಯೋಗಿಗಳನ್ನು ಆಹ್ವಾನಿಸುತ್ತಾರೆ. ಈ ಮೂಲಕ ಚಿತ್ರರಂಗದಲ್ಲಿ ಗುರುತಿಸಿಕೊಂಡವರು ಒಂದೇ ವೇದಿಕೆಯಲ್ಲಿ ಬಂದು ಸೇರುತ್ತಾರೆ. ಇದೀಗ ಟಾಲಿವುಡ್ ಸೂಪರ್ಸ್ಟಾರ್ ನಟ ರಾಮ್ಚರಣ್ ತಮ್ಮ ಮನೆಯಲ್ಲಿ ದೀಪಾವಳಿ ಪಾರ್ಟಿಯನ್ನು ಆಯೋಜಿಸಿದ್ದರು.
ತೆಲುಗು ಚಿತ್ರರಂಗದ ಹಲವಾರು ಹೆಸರಾಂತ ವ್ಯಕ್ತಿಗಳು ಪಾರ್ಟಿಯಲ್ಲಿ ಭಾಗವಹಿಸಿದ್ದರು. ಅದರಲ್ಲೂ ಟಾಲಿವುಡ್ನ ನಾಲ್ಕು ಪ್ರಮುಖ ರತ್ನಗಳಾದ ರಾಮ್ಚರಣ್, ಮಹೇಶ್ ಬಾಬು, ಜೂನಿಯರ್ ಎನ್ಟಿಆರ್ ಮತ್ತು ವೆಂಕಟೇಶ್ ಜೊತೆಯಾಗಿ ಕಾಣಿಸಿಕೊಂಡಿದ್ದು, ಹಬ್ಬಕ್ಕೆ ವಿಶೇಷ ಮೆರುಗು ನೀಡಿತು. ಈ ನಾಲ್ವರು ಖ್ಯಾತ ನಟರು ಒಂದೇ ಫ್ರೇಮ್ನಲ್ಲಿ ಸೆರೆಯಾದರು. ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಈ ಫೋಟೋ ಹೆಚ್ಚು ಸದ್ದು ಮಾಡುತ್ತಿದೆ. ಅಭಿಮಾನಿಗಳಿಗಂತೂ ದೀಪಾವಳಿಗೆ ಉಡುಗೊರೆ ಸಿಕ್ಕಂತಾಗಿದೆ.
ದೀಪಾವಳಿ ಅನ್ನೋದು ಬಾಂಧವ್ಯಗಳನ್ನು ಬೆಸೆಯುವ ಹಬ್ಬ. ಎಲ್ಲರೂ ಜೊತೆಯಾಗಿ ಸೇರಿ ಸಂಭ್ರಮಿಸುವ ಹಬ್ಬ. ತಮ್ಮ ವೈಯಕ್ತಿಕ ಕೆಲಸಗಳಲ್ಲಿ ಯಾವಾಗಲೂ ಬ್ಯುಸಿಯಾಗಿರುವ ನಟರು ರಾಮ್ಚರಣ್ ಮನೆಯಲ್ಲಿ ಜೊತೆಯಾಗಿ ಸೇರಿ ತೆಲುಗು ಚಿತ್ರರಂಗದ ಒಗ್ಗಟ್ಟನ್ನು ಪ್ರದರ್ಶಿಸಿದರು. ಆಕರ್ಷಿಕ ದಿರಿಸಿನಲ್ಲಿ ತಾರೆಯರು ಕಂಗೊಳಿಸಿದರು. ರಾಮ್ಚರಣ್, ಮಹೇಶ್ ಬಾಬು, ಜೂನಿಯರ್ ಎನ್ಟಿಆರ್ ಮತ್ತು ವೆಂಕಟೇಶ್ ಒಂದೇ ಫ್ರೇಮ್ನಲ್ಲಿ ಸೆರೆಯಾದ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ಧೂಳೆಬ್ಬಿಸಿದೆ.
ಮಹೇಶ್ ಬಾಬು ಪತ್ನಿ ನಮ್ರತಾ ಶಿರೋಡ್ಕರ್ ಇನ್ಸ್ಟಾಗ್ರಾಮ್ನಲ್ಲಿ ಪಾರ್ಟಿಯ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಮೊದಲನೆಯ ಫೋಟೋದಲ್ಲಿ ರಾಮ್ಚರಣ್, ಮಹೇಶ್ ಬಾಬು, ಜೂನಿಯರ್ ಎನ್ಟಿಆರ್ ಮತ್ತು ವೆಂಕಟೇಶ್ ಜೊತೆಯಾಗಿ ನಿಂತಿರುವುದನ್ನು ನೋಡಬಹುದು. ಉಳಿದ ಫೋಟೋಗಳಲ್ಲಿ ನಮ್ರತಾ ಜೊತೆ ಉಪಾಸನಾ ಕೊನಿಡೇಲಾ (ರಾಮ್ಚರಣ್ ಪತ್ನಿ), ಎಸ್.ಪೂಜಾ ಪ್ರಸಾದ್ (ಕಾರ್ತಿಕೇಯ ಪತ್ನಿ), ಸ್ನೇಹಾ ರೆಡ್ಡಿ (ಅಲ್ಲು ಅರ್ಜುನ್ ಪತ್ನಿ) ಮತ್ತು ಲಕ್ಷ್ಮಿ ಪ್ರಣತಿ (ಜೂ.ಎನ್ಟಿಆರ್ ಪತ್ನಿ) ಸಂತೋಷಕರ ಕ್ಷಣಗಳನ್ನು ಕಾಣಬಹುದು.
ಇದನ್ನೂ ಓದಿ: ಪ್ರಭಾಸ್ ಪೋಸ್ಟರ್ ರಿಲೀಸ್: ಡಿ. 1ರಂದು 'ಸಲಾರ್' ಟ್ರೇಲರ್ ಅನಾವರಣ
ಪೋಸ್ಟ್ ಹಂಚಿಕೊಂಡಿರುವ ನಮ್ರತಾ ಶೀರ್ಷಿಕೆಯಲ್ಲಿ, "ಕಳೆದ ರಾತ್ರಿ.. ದೀಪಾವಳಿಯನ್ನು ಅತ್ಯಂತ ಅದ್ಧೂರಿಯಾಗಿ ಆಚರಿಸಲಾಯಿತು. ಇಂತಹ ಸುಂದರ ಕ್ಷಣವನ್ನು ನೀಡಿದ್ದಕ್ಕಾಗಿ ರಾಮ್ಚರಣ್ ಮತ್ತು ಉಪಾಸನಾ ಕೊನಿಡೇಲಾ ಅವರಿಗೆ ಹೃದಯಸ್ಪರ್ಶಿ ಧನ್ಯವಾದಗಳು. ಎಲ್ಲರಿಗೂ ದೀಪಾವಳಿಯ ಶುಭಾಶಯಗಳು. ನಿಮ್ಮ ಜೀವನವು ಅಪಾರ ಪ್ರೀತಿ ಮತ್ತು ಪ್ರಕಾಶದಿಂದ ತುಂಬಿರಲಿ" ಎಂದು ಬರೆದುಕೊಂಡಿದ್ದಾರೆ. ಅಭಿಮಾನಿಗಳಿಗೆ ಬೆಳಕಿನ ಹಬ್ಬಕ್ಕೆ ಶುಭ ಕೋರಿದ್ದಾರೆ.
ಈ ಪೋಸ್ಟ್ಗೆ ಪ್ರತಿಕ್ರಿಯಿಸಿರುವ ಉಪಾಸನಾ, 'ದೀಪಾವಳಿ ಶುಭಾಶಯಗಳು ಸಂತೋಷದಿಂದ ತುಂಬಿವೆ' ಎಂದು ಬರೆದಿದ್ದಾರೆ. ಅಭಿಮಾನಿಗಳು ನಾಲ್ವರು ಸ್ಟಾರ್ ನಟರು ಜೊತೆಯಾಗಿ ನಿಂತಿರುವ ಫೋಟೋಗೆ ಆಶ್ಚರ್ಯದ ಜೊತೆಗೆ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದಾರೆ. 'ಒಂದು ಚೌಕಟ್ಟಿನಲ್ಲಿ ನಾಲ್ಕು ದಂತಕಥೆಗಳು' ಎಂದು ಕಮೆಂಟ್ ಮಾಡಿದ್ದಾರೆ. ಅಭಿಮಾನಿಗಳು ಲೈಕ್ಸ್ಗಳನ್ನು ನೀಡುವುದರ ಜೊತೆಗೆ ಫೋಟೋವನ್ನು ಹೆಚ್ಚು ವೈರಲ್ ಮಾಡುತ್ತಿದ್ದಾರೆ.
ಸಿನಿಮಾ ವಿಚಾರವಾಗಿ ನೋಡುವುದಾದರೆ, ಮಹೇಶ್ ಬಾಬು ಪ್ರಸ್ತುತ ಗುಂಟೂರು ಖಾರಂ ಬಿಡುಗಡೆಗೆ ತಯಾರಿ ನಡೆಸುತ್ತಿದ್ದಾರೆ. ನಂತರದಲ್ಲಿ ಎಸ್ಎಸ್ ರಾಜಮೌಳಿ ಜೊತೆಗೆ ಸಿನಿಮಾ ಮಾಡಲಿದ್ದಾರೆ. ರಾಮ್ಚರಣ್ ಅವರು ಶಂಕರ್ ನಿರ್ದೇಶನದ ಗೇಮ್ ಚೇಂಜರ್ನಲ್ಲಿ ನಟಿಸುತ್ತಿದ್ದಾರೆ. ಜೂನಿಯರ್ ಎನ್ಟಿಆರ್ ಮುಂದಿನ ವರ್ಷ ದೇವರ ಚಿತ್ರದ ಶೂಟಿಂಗ್ನಲ್ಲಿ ಬ್ಯುಸಿಯಾಗಿದ್ದಾರೆ. ಹೃತಿಕ್ ರೋಷನ್ ಜೊತೆ ವಾರ್ 2ನಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಮತ್ತೊಂದೆಡೆ, ವೆಂಕಟೇಶ್ ಅವರು ಮುಂದಿನ ತಿಂಗಳು ತೆರೆ ಕಾಣಲಿರುವ ಸೈಂಧವ ಚಿತ್ರದ ಪ್ರೀಮಿಯರ್ಗೆ ಸಿದ್ಧರಾಗುತ್ತಿದ್ದಾರೆ.
ಇದನ್ನೂ ಓದಿ: 'ಲಾಲ್ ಸಲಾಂ' ಟೀಸರ್ ಔಟ್; ಮೊಯ್ದೀನ್ ಭಾಯ್ ಪಾತ್ರದಲ್ಲಿ ರಜನಿಕಾಂತ್
