ಬಾಲಿವುಡ್ ನಟರಾದ ಸನ್ನಿ ಡಿಯೋಲ್ ಮತ್ತು ಅಮಿಷಾ ಪಟೇಲ್ ಅಭಿನಯದ 'ಗದರ್ 2' ಚಿತ್ರ ಆಗಸ್ಟ್ನಲ್ಲಿ ಬಿಡುಗಡೆಯಾಗಲಿದೆ. 2001 ರಲ್ಲಿ ನಿರ್ದೇಶಕ ಅನಿಲ್ ಶರ್ಮಾ ಆ್ಯಕ್ಷನ್ ಕಟ್ ಹೇಳಿರುವ ಈ ಚಿತ್ರವು ರೊಮ್ಯಾಂಟಿಕ್ ಅಂಡ್ ಆ್ಯಕ್ಷನ್ ಚಿತ್ರವಾಗಿದ್ದು, ಗದರ್ 2 ಕೂಡ ಅನಿಲ್ ಶರ್ಮಾ ನಿರ್ದೇಶನದಲ್ಲಿ ತಯಾರಾಗಿದೆ.
ಇತ್ತೀಚೆಗೆ ಚಿತ್ರದ 'ಉದ್ದ್ ಜಾ ಕಾಲೇ ಕಾವ' ಹಾಡು ಬಿಡುಗಡೆಯಾಗಿದ್ದು, ಇದೀಗ 2001 ಗದರ್‌ನ ಮತ್ತೊಂದು ಹಾಡಿನ ಮರುರೂಪದ ಆವೃತ್ತಿಯನ್ನು ಬಿಡುಗಡೆ ಮಾಡಲು ತಯಾರಕರು ನಿರ್ಧರಿಸಿದ್ದಾರೆ. ವರದಿಗಳ ಪ್ರಕಾರ, ಗದರ್‌ನಲ್ಲಿ ಮೂಲ ಹಾಡನ್ನು ಹಾಡಿದ ಉದಿತ್ ನಾರಾಯಣ್ ಜೊತೆಗೆ ಅರಿಜಿತ್ ಸಿಂಗ್ 'ಮೈನ್ ನಿಕ್ಲಾ ಗಡ್ಡಿ ಲೇಕೆ' ಹಾಡಿನ ಹೊಸ ಆವೃತ್ತಿಯನ್ನು ಹಾಡಲಿದ್ದಾರೆ. ಅಲ್ಲದೇ, ಗದರ್ 2 ಗಾಗಿ ಅರಿಜಿತ್ ಸಿಂಗ್ ಅವರು 'ದಿಲ್ ಜೂಮ್' ಹಾಡನ್ನು ಸಹ ಹಾಡಿದ್ದಾರೆ.
'ಮೈನ್ ನಿಕ್ಲಾ ಗಡ್ಡಿ ಲೇಕೆ' ಮೂಲ ಆವೃತ್ತಿಯು ಸೂಪರ್ ಹಿಟ್ ಆಯಿತು. ಈ ಹಾಡು ಇನ್ನೂ ಜನಪ್ರಿಯವಾಗಿದೆ. 22 ವರ್ಷಗಳ ನಂತರವೂ ಮದುವೆ ಸಮಾರಂಭಗಳು ಮತ್ತು ಇತರ ಕಾರ್ಯಕ್ರಮಗಳಲ್ಲಿ ಆಗಾಗ್ಗೆ ಪ್ಲೇ ಆಗುತ್ತದೆ. 'ಗದರ್ 2' ತಯಾರಕರು ಈ ಹಾಡನ್ನು ರಿಮೇಕ್ ಮಾಡಲು ನಿರ್ಧಾರ ಮಾಡಿದ್ದು, ಅದರ ಮೂಲವನ್ನು ಬದಲಾಯಿಸುವ ಬದಲು ಹೊಸ ಧ್ವನಿ ನೀಡಲು ಬಯಸಿದ್ದಾರೆ. ಅದರಂತೆ ಚಿತ್ರತಂಡ ಹಾಗೂ ಸಂಗೀತ ನಿರ್ದೇಶಕ ಮಿಥುನ್ ಅರಿಜಿತ್ ಸಿಂಗ್ ಅತ್ಯುತ್ತಮ ಆಯ್ಕೆ ಎಂದು ಒಪ್ಪಿಕೊಂಡಿದ್ದಾರೆ.
ಇದನ್ನೂ ಓದಿ: 'ಮೇಡ್ ಇನ್ ಹೆವೆನ್' ಮತ್ತೆ ಬರಲಿದೆ: ಪೋಸ್ಟರ್ ಬಿಡುಗಡೆಗೊಳಿಸಿ ಗುಡ್ನ್ಯೂಸ್ ಕೊಟ್ಟ ಜೋಯಾ ಅಖ್ತರ್
ಮತ್ತೊಂದು ಮೂಲದ ವರದಿಯ ಪ್ರಕಾರ, ಅರಿಜಿತ್ ಸಿಂಗ್ ಅವರು ಉದಿತ್ ನಾರಾಯಣ್ ಜೊತೆಗೆ ಹಾಡಲು ಒಪ್ಪಿಕೊಂಡಿದ್ದಾರೆ. ಮೂಲ ಟ್ರ್ಯಾಕ್ ಯಾವುದೇ ಗಮನಾರ್ಹ ಬದಲಾವಣೆಗಳಿಗೆ ಒಳಗಾಗಿಲ್ಲ ಎಂದು ತಿಳಿದು ಬಂದಿದೆ. ಅಭಿಮಾನಿಗಳು ಇಷ್ಟು ದಿನ ಪಾಲಿಸುತ್ತಿದ್ದ ಕ್ಲಾಸಿಕ್ ಹಾಡಿನ ಸಾರವನ್ನು ಬದಲಾಯಿಸಲು ತಯಾರಕರು ಬಯಸಲಿಲ್ಲ.
ಗದರ್ 2 ಆಗಸ್ಟ್ 11ರಂದು ಚಿತ್ರ ಬಿಡುಗಡೆ ಆಗಲಿದೆ. 2001ರಲ್ಲಿ ಚಿತ್ರದ ಮೊದಲ ಭಾಗ ಬಿಡುಗಡೆ ಆದಾಗ ಬಾಲಿವುಡ್‌ನಲ್ಲಿ ಸಂಚಲನವನ್ನು ಸೃಷ್ಟಿಸಿತ್ತು. ಅಲ್ಲದೇ ಅಮೀರ್ ಖಾನ್ ಅವರ ಆಸ್ಕರ್ ನಾಮನಿರ್ದೇಶಿತ 'ಲಗಾನ್' ಚಿತ್ರಕ್ಕೆ ಪೈಪೋಟಿ ಕೊಟ್ಟು ದೊಡ್ಡ ಹೆಸರು ಮಾಡಿತ್ತು. ಗದರ್ 2 ನಲ್ಲಿ ಸನ್ನಿ ಡಿಯೋಲ್, ಅಮೀಷಾ ಪಟೇಲ್ ಮತ್ತು ಉತ್ಕರ್ಷ್ ಶರ್ಮಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
1947ರ ಭಾರತ ಮತ್ತು ಪಾಕ್ ವಿಭಜನೆಯ ಸಂದರ್ಭ ಹಾಗೂ ತಾರಾ ಸಿಂಗ್ ಜೀವನವನ್ನು ಆಧರಿಸಿ ಗದರ್ 1 ಚಿತ್ರ ಮಾಡಲಾಗಿತ್ತು. 400 ಹುಡುಗಿಯರ ಪೈಕಿ ಓರ್ವ ನಾಯಕಿಯನ್ನು ನಿರ್ದೇಶಕ ಅನಿಲ್ ಶರ್ಮಾ ಆಯ್ಕೆ ಮಾಡಿದ್ದು ಚಿತ್ರದ ವಿಶೇಷತೆಗಳಲ್ಲೊಂದು. ಇನ್ನು ಹಿಮಾಚಲ ಪ್ರದೇಶದ ಪರ್ವತಗಳಲ್ಲಿ ಗದರ್ 2 ಚಿತ್ರದ ಪ್ರಮುಖ ದೃಶ್ಯಗಳನ್ನು ಚಿತ್ರೀಕರಿಸಲಾಗಿದೆ. ನಿರ್ದೇಶಕ ಮತ್ತು ನಿರ್ಮಾಪಕ ಅನಿಲ್ ಶರ್ಮಾ ಅವರು ಗದರ್ 2 ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಜೀ ಸ್ಟುಡಿಯೋಸ್ ಮತ್ತು ಅನಿಲ್ ಪ್ರೊಡಕ್ಷನ್ಸ್ ನಿರ್ಮಾಣದ ಹೊಣೆ ಹೊತ್ತಿದೆ.
ಇದನ್ನೂ ಓದಿ: ಪ್ಯಾರೀಸ್ನ ಐಫೆಲ್ ಟವರ್ ಮುಂದೆ ಮಗಳೊಂದಿಗೆ ಸುಶ್ಮಿತಾ ಸೇನ್ ಡ್ಯಾನ್ಸ್; 'ಸೋ ಕ್ಯೂಟ್' ಎಂದ ಫ್ಯಾನ್ಸ್
