'ಲಕ್ಷಾಂತರ ಸಣ್ಣ ಸಣ್ಣ ಕ್ಷಣಗಳ ಪ್ರೇಮಕಥೆ': ಮದ್ವೆ ಖುಷಿಯಲ್ಲಿ 'ವಿಜಯಾನಂದ' ನಟ, ನಿರ್ದೇಶಕಿ!

ಕಳೆದ ಡಿಸೆಂಬರ್​ನಲ್ಲಿ ತೆರೆಕಂಡು ಹಿಟ್ ಆದ ಪ್ಯಾನ್​ ಇಂಡಿಯಾ 'ವಿಜಯಾನಂದ' ಚಿತ್ರದ ನಟ ನಿಹಾಲ್​ ಮತ್ತು ನಿರ್ದೇಶಕಿ ರಿಷಿಕಾ ಶರ್ಮಾ ಶೀಘ್ರದಲ್ಲೇ ದಾಂಪತ್ಯ ಜೀವನ ಆರಂಭಿಸಲಿದ್ದಾರೆ.

ಕನ್ನಡ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿರುವ 'ವಿಜಯಾನಂದ' ಸಿನಿಮಾದ ನಾಯಕ ನಟ ಮತ್ತು ನಿರ್ದೇಶಕಿ ಮದುವೆಯಾಗಲಿದ್ದಾರೆ. ಈ ಬಗ್ಗೆ ಅವರು ಸಾಮಾಜಿಕ ಮಾಧ್ಯಮದಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ. ತಾರಾ ಜೋಡಿಯ ಮದುವೆ ವಿಚಾರ ಹೊರಬರುತ್ತಿದ್ದಂತೆ, ಅಭಿಮಾನಿಗಳು ಅಭಿನಂದನೆ ತಿಳಿಸುತ್ತಿದ್ದಾರೆ.

ನಿಹಾಲ್​- ರಿಷಿಕಾ ಶರ್ಮಾ ಮದುವೆ: ಫೇಸ್​ಬುಕ್​ನಲ್ಲಿ ತಮ್ಮ ಫೋಟೋ ಹಂಚಿಕೊಂಡಿರುವ ನಿರ್ದೇಶಕಿ ರಿಷಿಕಾ ಶರ್ಮಾ, ''ಒಂದು ಶುಭ ಮತ್ತು ಖುಷಿ ವಿಚಾರವನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ನಾನು ಉತ್ಸುಕಳಾಗಿದ್ದೇನೆ. ನಿಹಾಲ್​ ಜೊತೆ ಶೀಘ್ರದಲ್ಲೇ (ಫೆಬ್ರವರಿಯಲ್ಲಿ) ದಾಂಪತ್ಯ ಜೀವನ ಆರಂಭಿಸಲಿದ್ದೇನೆ. ಲಕ್ಷಾಂತರ ಸಣ್ಣಸಣ್ಣ ಕ್ಷಣಗಳಿಂದ ನಮ್ಮ ಪ್ರೇಮಕಥೆ ಸೃಷ್ಟಿಯಾಗಿದೆ. ನಮ್ಮ 9 ವರ್ಷಗಳ ಸ್ನೇಹ ಮತ್ತು ಪ್ರೀತಿ ಸುಗಮ ದಾರಿಯಲ್ಲಿ ಸಾಗುತ್ತಿದೆ, ಹರಸಿ ಹಾರೈಸಿ. ನಿಮ್ಮ ಪ್ರೀತಿ ಮತ್ತು ವಿಶ್ವಾಸವನ್ನು ಸದಾ ಮುನ್ನೋಡುವ - ರಿಷಿಕಾ ಮತ್ತು ನಿಹಾಲ್''​ ಎಂದು ಬರೆದುಕೊಂಡಿದ್ದಾರೆ.

ಶೀಘ್ರದಲ್ಲೇ ನಡೆಯಲಿದೆ ನಿಹಾಲ್​ ಮತ್ತು ರಿಷಿಕಾ ಶರ್ಮಾ ಮದುವೆ

2018ರಲ್ಲಿ ಟ್ರಂಕ್​ ಸಿನಿಮಾ ಬಿಡುಗಡೆ ಆಗಿತ್ತು. ನಿಹಾಲ್ ಈ ಚಿತ್ರದ ನಟ ಮತ್ತು ರಿಷಿಕಾ ಶರ್ಮಾ ಈ ಚಿತ್ರದ ನಿರ್ದೇಶಕಿ. 'ಟ್ರಂಕ್​' ರಿಷಿಕಾ ಶರ್ಮಾ ನಿರ್ದೇಶನದಲ್ಲಿ ಮೂಡಿ ಬಂದ ಮೊದಲ ಸಿನಿಮಾ. ಬಳಿಕ ಸೈಕೋ ಶಂಕರ, ಕೆಂಪೇಗೌಡ 2, ವಿಜಯಾನಂದ ಚಿತ್ರಗಳಲ್ಲಿ ಕೆಲಸ ಮಾಡಿದ್ದಾರೆ. ಇದು ನಿಹಾಲ್​ ಅವರಿಗೆ ಹೀರೋ ಆಗಿ ಮೊದಲ ಸಿನಿಮಾ.

ವಿಜಯಾನಂದ ಸಿನಿಮಾ: ಪದ್ಮಶ್ರೀ ಪುರಸ್ಕೃತ, ಯಶಸ್ವಿ ಉದ್ಯಮಿ ಡಾ.ವಿಜಯ ಸಂಕೇಶ್ವರ ಅವರ ಜೀವನಾಧಾರಿತ 'ವಿಜಯಾನಂದ' ಕಳೆದ ಡಿಸೆಂಬರ್​ನಲ್ಲಿ ಐದು ಭಾಷೆಗಳಲ್ಲಿ ವಿಶ್ವದಾದ್ಯಂತ ಬಿಡುಗಡೆ ಕಂಡು ಯಶಸ್ವಿ ಆಗಿತ್ತು. ಡಿಸೆಂಬರ್ 9ರಂದು ಕನ್ನಡ, ತಮಿಳು, ತೆಲುಗು, ಹಿಂದಿ ಮತ್ತು ಮಲಯಾಳಂ ಸೇರಿದಂತೆ ಐದು ಭಾಷೆಗಳಲ್ಲಿ ಅಂದರೆ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಈ ಚಿತ್ರ 1,200ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ರಿಲೀಸ್​ ಆಗಿ ಪ್ರೇಕ್ಷಕರ ಮನ ಗೆದ್ದಿತ್ತು.

ವಿಜಯಾನಂದ ಚಿತ್ರದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದ ಜೋಡಿ..

ವಿಆರ್​ಎಲ್ ಸಂಸ್ಥೆಯ ಮಾಲೀಕ ವಿಜಯ ಸಂಕೇಶ್ವರ ಮತ್ತು ಅವರ ಮಗ ಡಾ. ಆನಂದ ಸಂಕೇಶ್ವರ ಅವರು ನಡೆದು ಬಂದ ಹಾದಿಯ ಕಥೆ ತಿಳಿಸಿತ್ತು ವಿಜಯಾನಂದ ಬಯೋಪಿಕ್. ಚಿತ್ರದ ಟ್ರೇಲರ್​ ಅನ್ನು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಂದ ಬಿಡುಗಡೆ ಮಾಡಿಸಿ ಕನ್ನಡಿಗರ ಗಮನ ಸೆಳೆದಿತ್ತು ಚಿತ್ರತಂಡ.

ಇದನ್ನೂ ಓದಿ: ಸಿದ್ಧಾರ್ಥ್ ಮಲ್ಹೋತ್ರಾ-ಕಿಯಾರಾ ಅಡ್ವಾಣಿ ಅದ್ಧೂರಿ ವಿವಾಹಕ್ಕೆ ಭರದ ಸಿದ್ಧತೆ

ವಿಜಯಾನಂದ ಚಿತ್ರಕ್ಕೆ ಚಿತ್ರಕಥೆ ಬರೆಯುವುದರ ಜೊತೆಗೆ ನಿರ್ದೇಶನವನ್ನೂ ಮಾಡಿದ್ದರು ನಿರ್ದೇಶಕಿ ರಿಷಿಕಾ ಶರ್ಮಾ. ನಿಹಾಲ್ ರಜಪೂತ್ ಅವರು ಚಿತ್ರದಲ್ಲಿ ವಿಜಯ ಸಂಕೇಶ್ವರ ಅವರ ಪಾತ್ರದಲ್ಲಿ ಅಭಿನಯಿಸಿದ್ದರು. ಮೂರು ವಯೋಮಾನಗಳಿಗೆ ಹೊಂದಿಕೆಯಾಗುವಂತೆ ಬಣ್ಣ ಹಚ್ಚಿದ್ದರು. ಅನಂತ್ ನಾಗ್, ರವಿಚಂದ್ರನ್, ವಿನಯಾ ಪ್ರಸಾದ್, ಸಿರಿ ಪ್ರಹ್ಲಾದ್, ಅರ್ಚನಾ ಕೊಟ್ಟಿಗೆ, ಪ್ರಕಾಶ್ ಬೆಳವಾಡಿ, ಭರತ್ ಬೋಪಣ್ಣ, ಶೈನ್ ಶೆಟ್ಟಿ, ದಯಾಳ್ ಪದ್ಮನಾಭನ್, ರಮೇಶ್ ಭಟ್ ಸೇರಿ ಮೊದಲಾದ ಪ್ರತಿಭಾವಂತ ಕಲಾವಿದರು ಸಹ ವಿಜಯಾನಂದ ಚಿತ್ರದ ಭಾಗವಾಗಿದ್ದು ವಿಶೇಷ.

ಇದನ್ನೂ ಓದಿ: ಪೂಜಾ ಹೆಗ್ಡೆ ಸಹೋದರನ ಮದುವೆಗೆ ಮಂಗಳೂರಿಗೆ ಬಂದಿದ್ರು ಸಲ್ಮಾನ್​ ಖಾನ್​