ಶಿವಮೊಗ್ಗ: ನಿನ್ನೆ ರಾತ್ರಿ ಸೂಳೆಬೈಲು ಬಳಿ ನಡೆದ ಕಲ್ಲು ತೂರಾಟದ ವೇಳೆ ನಾನು ಕಾರಿನಲ್ಲಿ ಇರಲಿಲ್ಲ, ಆದ್ರೆ ನನ್ನ ಕಾರನ್ನ ಗುರಿಯಾಗಿಟ್ಟುಕೊಂಡು ಅನ್ಯಕೋಮಿನವರು ಲಾಂಗ್ನಿಂದ ಹೊಡೆದಿದ್ದಾರೆ ಎಂದು ಶಿವಮೊಗ್ಗ ಜಿಲ್ಲಾ ಬಿಜೆಪಿ ಯುವ ಮೋರ್ಚಾದ ಅಧ್ಯಕ್ಷ ಹಾಗೂ ಬಿಜೆಪಿಯ ಪ್ರಕೋಷ್ಟದ ಪ್ರಮುಖ ಹರಿಕೃಷ್ಣ ಸ್ಪಷ್ಟಪಡಿಸಿದ್ದಾರೆ.
ಘಟನೆ ಕುರಿತು ಮಾಧ್ಯಮಗಳಿಗೆ ಮಾಹಿತಿ ನೀಡಿರುವ ಹರಿಕೃಷ್ಣ, ಕಾರನ್ನ ಗುರಿಯಾಗಿಟ್ಟುಕೊಂಡು ಲಾಂಗ್ನಿಂದ ಹೊಡೆದಿದ್ದಾರೆ. ಹರ್ಷ ಹತ್ಯೆಯ ನಂತರ ಇದನ್ನು ಬೇಕು ಅಂತಲೇ ಮಾಡುತ್ತಿದ್ದಾರೆ. ಈ ಕುರಿತು ಪೊಲೀಸರು ಕೂಡಲೇ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು.
ನಿನ್ನೆ ರಾತ್ರಿ ಬೆಂಗಳೂರಿನಿಂದ ಮತ್ತೂರು ಗ್ರಾಮಕ್ಕೆ ಕಾರಿನಲ್ಲಿ ಬರುವಾಗ ಸೂಳೆಬೈಲು ಬಳಿ ಕಾರಿನ ಮೇಲೆ ದಿಢೀರನೆ ಕಲ್ಲು ತೂರಾಟ ನಡೆಸಲಾಗಿತ್ತು. ಈ ವೇಳೆ ಮತ್ತೂರಿನ ಇಬ್ಬರು ನಿವಾಸಿಗಳಿದ್ದರು. ಕಾರಿನ ಮೇಲೆ ದಿಢೀರನೆ ನಡೆದ ಕಲ್ಲು ತೂರಾಟದಿಂದ ಈ ಭಾಗದಲ್ಲಿ ಕೆಲ ಕಾಲ ಪ್ರಕ್ಷುಬ್ಧ ವಾತಾವರಣ ಉಂಟಾಗಿತ್ತು. ಹಿಂದೂಗಳ ಮೇಲೆ ಅನ್ಯ ಕೋಮಿನವರು ಕಲ್ಲು ತೂರಾಟ ನಡೆಸಿದ್ದಾರೆ ಎಂದು ಆರೋಪಿಸಿ 200 ಕ್ಕೂ ಅಧಿಕ ಜನ ಜಮಾವಣೆಗೊಂಡಿದ್ದರು. ನಂತರ ಸ್ಥಳಕ್ಕೆ ಎಸ್ಪಿ ಲಕ್ಷ್ಮೀ ಪ್ರಸಾದ್ ಭೇಟಿ ನೀಡಿ, ಹೆಚ್ಚಿನ ಪೊಲೀಸರನ್ನು ನಿಯೋಜಿಸುವ ಮೂಲಕ ಪರಿಸ್ಥಿತಿಯನ್ನು ಹತೋಟಿಗೆ ತಂದರು. ರಾತ್ರಿ ಇಡೀ ಪೊಲೀಸರನ್ನ ನಿಯೋಜಿಸಿದ ಕಾರಣ ಮತ್ತೆ ಯಾವುದೇ ಅಹಿತಕರ ಘಟನೆ ನಡೆದಿಲ್ಲ ಎಂದು ಹರಿಕೃಷ್ಟ ತಿಳಿಸಿದರು.
ಇದನ್ನೂ ಓದಿ: ಶಂಕಿತ ಉಗ್ರರಿಂದ ಗುಂಡಿನ ದಾಳಿ : ಪೊಲೀಸ್ನ ಸ್ಥಿತಿ ಗಂಭೀರ
