ಕೊರೊನಾ ಕಾರ್ಮೋಡ: ನಮ್ಮ ಮೆಟ್ರೋ ಕಾಮಗಾರಿ ಇನ್ನಷ್ಟು ವಿಳಂಬ

ಮೆಟ್ರೋ ಕಾಮಗಾರಿ ಪುನಾರಂಭವಾದ್ರು ಕೂಡ ಕಾರ್ಮಿಕರ ಕೊರತೆ ಎದುರಾಗಿದೆ. ಹಾಗಾಗಿ ಕಾಮಗಾರಿ ಇನ್ನಷ್ಟು ವಿಳಂಬವಾಗುವ ಸಾಧ್ಯತೆ ಇದೆ.

ಬೆಂಗಳೂರು: ಕೋವಿಡ್​-19 ಹಿನ್ನೆಲೆ ಈಗಾಗಲೇ ಅನೇಕ ಕಾಮಗಾರಿಗಳು ನೆನೆಗುದಿಗೆ ಬಿದ್ದಿದ್ದು, ಬೆಂಗಳೂರಿನಲ್ಲಿ ನಮ್ಮ ಮೆಟ್ರೋ ಕಾಮಗಾರಿ ಸಹ ಇನ್ನಷ್ಟು ವಿಳಂಬವಾಗಲಿದೆ.

2020 ರ ಅಂತ್ಯಕ್ಕೆ ಕೆಂಗೇರಿ ಹಾಗೂ ಕನಕಪುರ ರಸ್ತೆ ಮಾರ್ಗ ಮುಗಿಸುವುದಾಗಿ ಬಿಎಂಆರ್ ​ಸಿಎಲ್ ಹೇಳಿತ್ತು. ಆದರೆ ಲಾಕ್​ಡೌನ್​ನಿಂದಾಗಿ ಎಲ್ಲವೂ ಈಗ ತಲೆಕೆಳಗಾಗಿದೆ. ಮೆಟ್ರೋ ಕಾಮಗಾರಿ ಪುನಾರಂಭವಾದ್ರು ಕೂಡ ಕಾರ್ಮಿಕರ ಕೊರತೆ ಎದುರಾಗಿದೆ. ಯಾಕಂದರೆ ಉತ್ತರ ಪ್ರದೇಶ, ಬಿಹಾರದ ಕಾರ್ಮಿಕರೇ ಹೆಚ್ಚಾಗಿ ಮೆಟ್ರೋದಲ್ಲಿ ಕೆಲಸ ನಿರ್ವಹಿಸುತ್ತಿದ್ದರು. ಆದರೆ ಲಾಕ್​ಡೌನ್ ಸಡಿಲಿಕೆ ಆಗುತ್ತಿದ್ದಂತೆ ಕಾರ್ಮಿಕರು ತಮ್ಮ ತಮ್ಮ ರಾಜ್ಯಗಳಿಗೆ ವಾಪಸ್​ ಹೋಗಿದ್ದಾರೆ. ಹೀಗಾಗಿ ಮೆಟ್ರೋ ಕಾಮಗಾರಿ ಕುಂಠಿತಗೊಳ್ಳುತ್ತಿದೆ.

2020 ಕ್ಕೆ ಕಾಮಗಾರಿ ಮುಗಿಯುವುದು ಅಸಾಧ್ಯವಾಗಿದ್ದು, ಎರಡನೇ ಹಂತದ ಟನಲ್ ಇಳಿಕೆಯು ವಿಳಂಬವಾಗುತ್ತಿದೆ. ಚೀನಾದಿಂದ ಟಿಬಿಎಂ ತರಿಸಿ ಅಸೆಂಬರ್ ಮಾಡಿರೋ ಬಿಎಂಆರ್ ಸಿಎಲ್, ಏಪ್ರಿಲ್ ವೇಳೆಗೆ ಟನಲ್ ಬೋರಿಂಗ್ ಮಷಿನ್​ ಅನ್ನು ನೆಲದಾಳಕ್ಕೆ ಇಳಿಸಬೇಕಿತ್ತು. ಆದರೆ ಕೊರೊನಾ ಹಿನ್ನೆಲೆ ಚೀನಾ ಟನಲ್ ಬೋರಿಂಗ್ ತಂತ್ರಜ್ಞಾನ ಟ್ರಾನ್ಸ್​ಫರ್ ಮಾಡುವುದು​ ವಿಳಂಬವಾಗಿದೆ‌. ಈ ಹಿನ್ನೆಲೆಯಲ್ಲಿ ಎರಡನೇ ಹಂತ ಕಾಮಗಾರಿಯೂ ವಿಳಂಬವಾಗಲಿದ್ದು, ನಿಗಮದ ಲೆಕ್ಕಾಚಾರ ಉಲ್ಟಾ ಹೊಡೆದಿದೆ.