ಬೆಂಗಳೂರು: ಒಂದಂಕಿ ಲಾಟರಿ ಪ್ರಕರಣದಲ್ಲಿ ಸುಳ್ಳು ಪ್ರಕರಣ ದಾಖಲಿಸಿದ ಆರೋಪಕ್ಕೆ ಸಂಬಂಧಿಸಿದಂತೆ ರಾಜ್ಯದ 9 ಪೊಲೀಸ್ ಅಧಿಕಾರಿಗಳ ವಿರುದ್ಧ ಸಿಬಿಐ ಅಧಿಕಾರಿಗಳು ತನಿಖೆ ನಡೆಸಿ ಸಲ್ಲಿಸಿದ್ದ ಚಾರ್ಜ್‌ಶೀಟ್ ಮತ್ತದರ ವಿಚಾರಣಾ ಪ್ರಕ್ರಿಯೆಗೆ ಹೈಕೋರ್ಟ್ ತಡೆಯಾಜ್ಞೆ ನೀಡಿದೆ.
ಸಿಬಿಐ ಅಧಿಕಾರಿಗಳು ವಿಶೇಷ ನ್ಯಾಯಾಲಯಕ್ಕೆ ಸಲ್ಲಿಸಿರುವ ಚಾರ್ಜ್ ಶೀಟ್ ಮತ್ತು ನ್ಯಾಯಾಲಯದ ಮುಂದಿನ ಕಾನೂನು ಪ್ರಕ್ರಿಯೆಯನ್ನು ರದ್ದುಪಡಿಸಬೇಕು. ಮತ್ತು ವಿಚಾರಣಾ ಪ್ರಕ್ರಿಯೆಗೆ ಕೂಡಲೇ ತಡೆ ನೀಡಬೇಕೆಂದು ಕೋರಿ ಆರೋಪ ಎದುರಿಸುತ್ತಿರುವ ಅಧಿಕಾರಿಗಳು ಅರ್ಜಿ ಸಲ್ಲಿಸಿದ್ದರು. ನ್ಯಾ. ಬಿ.ಎ. ಪಾಟೀಲ್ ಅವರಿದ್ದ ಏಕ ಸದಸ್ಯ ಪೀಠ ವಿಚಾರಣೆ ನಡೆಸಿತು.
ಈ ವೇಳೆ ಆರೋಪಿ ಅಧಿಕಾರಿಗಳ ಪರ ವಾದಿಸಿದ ಹಿರಿಯ ವಕೀಲ ಸಿ.ಹೆಚ್. ಜಾಧವ್ ಅವರು, ಸಿಬಿಐ ಅಧಿಕಾರಿಗಳು ರಾಜ್ಯ ಸರ್ಕಾರದ ಅನುಮತಿ ಪಡೆಯದೇ ಚಾರ್ಜ್‌ಶೀಟ್ ಸಲ್ಲಿಸಿದ್ದಾರೆ. ಹೀಗಾಗಿ, ಕಾನೂನು ಪ್ರಕ್ರಿಯೆ ಪೂರೈಸದೇ ಸಲ್ಲಿಸಿರುವ ಚಾರ್ಜ್‌ಶೀಟ್ ಮತ್ತದರ ಮುಂದಿನ ಪ್ರಕ್ರಿಯೆಗಳಿಗೆ ತಡೆ ನೀಡಬೇಕೆಂದು ಕೋರಿದರು.
ಅರ್ಜಿದಾರರ ಪರ ವಕೀಲರು ಮಾಡಿದ ಮನವಿ ಪುರಸ್ಕರಿಸಿದ ಪೀಠ, 6 ವಾರಗಳ ಕಾಲ ತಡೆಯಾಜ್ಞೆ ನೀಡಿ ಆದೇಶಿಸಿತು. ಸದ್ಯ ಹೈಕೋರ್ಟ್ ತಡೆಯಾಜ್ಞೆ ನೀಡಿರುವುದರಿಂದ ಆರೋಪಿತ ಪೊಲೀಸ್ ಅಧಿಕಾರಿಗಳಿಗೆ ತಾತ್ಕಾಲಿಕ ರಿಲೀಫ್ ಸಿಕ್ಕಂತಾಗಿದೆ.
ಆರೋಪ ಎದುರಿಸುತ್ತಿರುವ ಅಧಿಕಾರಿಗಳು
- ನಿವೃತ್ತ ಐಜಿಪಿ ಬಿ.ಎ. ಪದ್ಮನಯನ
- ಇನ್ಸ್ಪೆಕ್ಟರ್‌ಗಳಾದ ಬಿ.ಎಂ. ಕನಕಲಕ್ಷ್ಮಿ (ಸದ್ಯ ಬಾಣಸವಾಡಿ ಸಂಚಾರ ಠಾಣೆ)
- ಜಿ.ಟಿ.ಸ್ವಾಮಿ (ಚನ್ನಪಟ್ಟಣ ಪೊಲೀಸ್ ತರಬೇತಿ ಶಾಲೆ ಇನ್ಸ್ಪೆಕ್ಟರ್‌)
- ಸಿ.ಆರ್‌. ರಂಗನಾಥ್ (ನಿವೃತ್ತ)
- ಎಂ.ಜೆ ಲೋಕೇಶ್ (ಕೆ.ಆರ್‌.ಪುರಂ ಸಂಚಾರ ಠಾಣೆ)
- ಬಿ.ಎನ್.ಶ್ರೀಕಂಠ (ಕೆಜಿಎಫ್‌ ರಾಬರ್ಟ್ಸನ್ ಪೇಟೆ)
- ಆರ್‌.ರವಿಪ್ರಕಾಶ್ (ಮೈಕೋ ಲೇಔಟ್ ಠಾಣೆ)
- ಬಿ.ಎಂ.ತಿಪ್ಪೇಸ್ವಾಮಿ (ಕಾಮಾಕ್ಷಿಪಾಳ್ಯ ಠಾಣೆ)
- ಹೆಡ್‌ ಕಾನ್ಸ್‌ಟೆಬಲ್ ಬಿ.ಎಸ್‌. ವೇಣುಗೋಪಾಲ್‌ (ಕೆಜಿಎಫ್‌ ಸೈಬರ್ ಕ್ರೈಂ ಠಾಣೆ)
- ಕಾನ್ಸ್‌ಟೆಬಲ್ ಡಿ.ರವಿಕುಮಾರ್ (ಪ್ರಸ್ತುತ ಕಲಬುರಗಿ ಪೊಲೀಸ್ ತರಬೇತಿ ಶಾಲೆ ಪಿಎಸ್‌ಐ)
ಪ್ರಕರಣದಲ್ಲಿ ಆರೋಪಿತರಾಗಿದ್ದ ಹಿರಿಯ ಐಪಿಎಸ್‌ ಅಧಿಕಾರಿ ಅಲೋಕ್ ಕುಮಾರ್ ಅವರ ಹೆಸರನ್ನು ಚಾರ್ಜ್‌ಶೀಟ್ನಿಂದ ಕೈಬಿಡಲಾಗಿದ್ದು, ಪರೋಕ್ಷವಾಗಿ ಕ್ಲೀನ್ ಚಿಟ್ ನೀಡಲಾಗಿದೆ.
