ಸಿಎಂ ಬಿಎಸ್​ವೈ ಪ್ರತಿಕೃತಿ ದಹಿಸಿ ಬಿಸಿಯೂಟ ನೌಕರರಿಂದ ಪ್ರತಿಭಟನೆ

ರಾಜ್ಯ ಬಜೆಟ್ ನಲ್ಲಿ ಬಿಸಿಯೂಟ ನೌಕರರಿಗೆ ಮಹಾಮೋಸವಾಗಿದೆ ಎಂದು ದೂರಿ ಬಿಸಿಯೂಟ ನೌಕರರು ನಗರದಲ್ಲಿಂದು ಸಿಎಂ ಬಿಎಸ್ ವೈ ಪ್ರತಿಕೃತಿ ದಹಿಸಿ ಪ್ರತಿಭಟನೆ ನಡೆಸಿದರು.

ಬಳ್ಳಾರಿ: ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ನೇತೃತ್ವದ ಸರ್ಕಾರ ಇತ್ತೀಚೆಗೆ ಮಂಡಿಸಿರುವ ರಾಜ್ಯ ಬಜೆಟ್​ನಲ್ಲಿ ಬಿಸಿಯೂಟ ನೌಕರರಿಗೆ ಮಹಾಮೋಸ ಮಾಡಿದೆ ಎಂದು ದೂರಿ ಬಿಸಿಯೂಟ ನೌಕರರು ನಗರದಲ್ಲಿಂದು ಬಿಎಸ್​ವೈ ಪ್ರತಿಕೃತಿ ದಹಿಸಿ ಪ್ರತಿಭಟನೆ ನಡೆಸಿದರು.

ಫೆ.03 ರಂದು ಬೆಂಗಳೂರಿನಲ್ಲಿ ನಾನಾ ಬೇಡಿಕೆಗಳನ್ನು ಈಡೇರಿಸಲು ಆಗ್ರಹಿಸಿ ರಾಜ್ಯಮಟ್ಟದ ಹೋರಾಟಕ್ಕೆ ಕರೆ ನೀಡಲಾಗಿತ್ತು. ಈ ಸಂದರ್ಭ ಪೊಲೀಸರು 144 ಸೆಕ್ಷನ್ ಜಾರಿಗೊಳಿಸಿ, ಹೋರಾಟ ಹತ್ತಿಕ್ಕುವ ಪ್ರಯತ್ನ ಮಾಡಿದ್ರು.‌ ಅದಾವುದಕ್ಕೂ ಮಣಿಯದೇ ಹೋರಾಟ ಮುಂದುವರಿಸಿದಾಗ, ಶಿಕ್ಷಣ ಸಚಿವರನ್ನು ಹೋರಾಟದ ಸ್ಥಳಕ್ಕೆ ಕಳಿಸಿ, ಮನವಿ ಸ್ವೀಕಾರ ಮಾಡಿ, ಬೇಡಿಕೆ ಈಡೇರಿಸುವ ಭರವಸೆಯನ್ನು ರಾಜ್ಯ ಸರ್ಕಾರ ನೀಡಿತ್ತು.

ಆದ್ರೆ ಈ ಬಗ್ಗೆ ಬಜೆಟ್​ನಲ್ಲಿ ಯಾವುದೇ ರೀತಿಯ ಚಕಾರ ಎತ್ತದಿದ್ದರಿಂದ ರಾಜ್ಯ ಸರ್ಕಾರದ ವಿರುದ್ಧ ನೌಕರರು ಆಕ್ರೋಶಗೊಂಡು ನಗರದ ಮೋತಿ ವೃತ್ತದಲ್ಲಿ ಜಮಾಯಿಸಿ ಸಿಎಂ ಭರವಸೆ ನೀಡಿ ಈಡೇರಿಸದೆ ಮಹಾಮೋಸ ಮಾಡಿದ್ದಾರೆ ಎಂದು ಕಿಡಿಕಾರಿದರು.