ಮುಂಬೈ: ರಿಸರ್ವ್ ಬ್ಯಾಂಕ್ ಬಡ್ಡಿ ದರಗಳಲ್ಲಿ ಯಥಾಸ್ಥಿತಿಯನ್ನು ಕಾಯ್ದುಕೊಂಡ ನಂತರ ಬೆಂಚ್ ಮಾರ್ಕ್ ಇಕ್ವಿಟಿ ಸೂಚ್ಯಂಕಗಳಾದ ಸೆನ್ಸೆಕ್ಸ್ ಮತ್ತು ನಿಫ್ಟಿ ಶುಕ್ರವಾರ ಸತತ ಎರಡನೇ ಅವಧಿಗೆ ಏರಿಕೆ ಕಂಡವು. ಹಣಕಾಸು, ರಿಯಾಲ್ಟಿ ಮತ್ತು ಆಟೋದಂತಹ ಕ್ಷೇತ್ರಗಳ ಷೇರುಗಳು ಪ್ರಮುಖವಾಗಿ ಲಾಭ ಗಳಿಸಿದವು. ಏಷ್ಯಾ ಮತ್ತು ಯುರೋಪಿಯನ್ ಮಾರುಕಟ್ಟೆಗಳಲ್ಲಿನ ದೃಢ ಪ್ರವೃತ್ತಿಯು ಹೂಡಿಕೆದಾರರ ಭಾವನೆಯನ್ನು ಸಕಾರಾತ್ಮಕವಾಗಿಸಿದೆ ಎಂದು ಟ್ರೇಡರ್ಸ್ ತಿಳಿಸಿದ್ದಾರೆ.
30 ಷೇರುಗಳ ಬಿಎಸ್ಇ ಸೆನ್ಸೆಕ್ಸ್ 364.06 ಪಾಯಿಂಟ್ ಅಥವಾ ಶೇಕಡಾ 0.55 ರಷ್ಟು ಏರಿಕೆ ಕಂಡು 65,995.63 ಕ್ಕೆ ತಲುಪಿದೆ. ಇದು ದಿನದ ವಹಿವಾಟಿನಲ್ಲಿ 464.24 ಪಾಯಿಂಟ್ ಅಥವಾ ಶೇಕಡಾ 0.70 ರಷ್ಟು ಏರಿಕೆ ಕಂಡು 66,095.81 ಕ್ಕೆ ತಲುಪಿತ್ತು. ನಿಫ್ಟಿ 107.75 ಪಾಯಿಂಟ್ ಅಥವಾ ಶೇಕಡಾ 0.55 ರಷ್ಟು ಏರಿಕೆ ಕಂಡು 19,653.50 ಕ್ಕೆ ತಲುಪಿದೆ.
ಸೆನ್ಸೆಕ್ಸ್ ಷೇರುಗಳ ಪೈಕಿ ಬಜಾಜ್ ಫಿನ್ ಸರ್ವ್ ಶೇ 6ರಷ್ಟು ಏರಿಕೆ ಕಂಡರೆ, ಬಜಾಜ್ ಫೈನಾನ್ಸ್ ಶೇ 4ರಷ್ಟು ಏರಿಕೆ ಕಂಡಿದೆ. ಟೈಟಾನ್ ಶೇ 2 98ರಷ್ಟು ಏರಿಕೆಯಾಗಿದ್ದು, ಇಂಡಸ್ಇಂಡ್ ಬ್ಯಾಂಕ್, ಐಟಿಸಿ, ಜೆಎಸ್ಡಬ್ಲ್ಯೂ ಸ್ಟೀಲ್, ಇನ್ಫೋಸಿಸ್, ಟೆಕ್ ಮಹೀಂದ್ರಾ, ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ ಮತ್ತು ಮಾರುತಿ ನಂತರದ ಸ್ಥಾನಗಳಲ್ಲಿವೆ. ಹಿಂದೂಸ್ತಾನ್ ಯೂನಿಲಿವರ್, ಏಷ್ಯನ್ ಪೇಂಟ್ಸ್, ಭಾರ್ತಿ ಏರ್ಟೆಲ್ ಮತ್ತು ಎಚ್ಡಿಎಫ್ಸಿ ಬ್ಯಾಂಕ್ ನಷ್ಟ ಅನುಭವಿಸಿದವು.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಗುರುವಾರ 1,864.20 ಕೋಟಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ ಎಂದು ಷೇರು ವಿನಿಮಯ ಕೇಂದ್ರದ ಅಂಕಿ ಅಂಶಗಳು ತಿಳಿಸಿವೆ.
ಹಣದುಬ್ಬರವು ಪ್ರಮುಖ ಅಪಾಯವಾಗಿ ಉಳಿದಿರುವುದರಿಂದ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಶುಕ್ರವಾರ ತನ್ನ ಪ್ರಮುಖ ಬಡ್ಡಿದರವನ್ನು ಬದಲಾಯಿಸದೆ ಇರಿಸಿದೆ ಮತ್ತು ಬೆಲೆಗಳನ್ನು ಗುರಿಗೆ ಹತ್ತಿರ ತರಲು ಬಾಂಡ್ ಮಾರಾಟವನ್ನು ಬಳಸಿಕೊಂಡು ನಗದು ಹರಿವನ್ನು ಬಿಗಿಯಾಗಿರಿಸುವ ತನ್ನ ಉದ್ದೇಶಕ್ಕೆ ಅಂಟಿಕೊಂಡಿದೆ. ಕೇಂದ್ರ ಬ್ಯಾಂಕಿನ ಮೂವರು ಸದಸ್ಯರು ಮತ್ತು ಅಷ್ಟೇ ಸಂಖ್ಯೆಯ ಬಾಹ್ಯ ಸದಸ್ಯರನ್ನು ಹೊಂದಿರುವ ಹಣಕಾಸು ನೀತಿ ಸಮಿತಿಯು ಸತತ ನಾಲ್ಕನೇ ಬಾರಿಗೆ ಸರ್ವಾನುಮತದ ನಿರ್ಧಾರದಲ್ಲಿ ಬೆಂಚ್ ಮಾರ್ಕ್ ಮರು ಖರೀದಿ ದರವನ್ನು (ರೆಪೊ) ಶೇಕಡಾ 6.50 ಕ್ಕೆ ನಿಗದಿಪಡಿಸಿದೆ.
ಏಷ್ಯಾದ ಮಾರುಕಟ್ಟೆಗಳಲ್ಲಿ ಸಿಯೋಲ್ ಮತ್ತು ಹಾಂಗ್ ಕಾಂಗ್ ಏರಿಕೆಯಲ್ಲಿ ಕೊನೆಗೊಂಡರೆ, ಟೋಕಿಯೊ ಸೂಚ್ಯಂಕ ಇಳಿಕೆಯಾಯಿತು. ಯುರೋಪಿಯನ್ ಮಾರುಕಟ್ಟೆಗಳು ಏರಿಕೆಯಲ್ಲಿ ವಹಿವಾಟು ನಡೆಸುತ್ತಿದ್ದವು. ಯುಎಸ್ ಮಾರುಕಟ್ಟೆಗಳು ಗುರುವಾರ ಸ್ವಲ್ಪ ಕೆಳಗಿಳಿದವು. ಜಾಗತಿಕ ತೈಲ ಬೆಂಚ್ಮಾರ್ಕ್ ಬ್ರೆಂಟ್ ಕಚ್ಚಾ ತೈಲವು ಶೇಕಡಾ 0.02 ರಷ್ಟು ಇಳಿದು ಬ್ಯಾರೆಲ್ಗೆ 83.94 ಡಾಲರ್ಗೆ ತಲುಪಿದೆ.
ಇದನ್ನೂ ಓದಿ : UAEಯಲ್ಲಿ ಜಾರಿಯಾಗಲಿದೆ RuPay ಕಾರ್ಡ್ ವ್ಯವಸ್ಥೆ; ಎರಡೂ ದೇಶಗಳ ಮಧ್ಯೆ ಒಪ್ಪಂದ.. ಏನೆಲ್ಲ ಲಾಭ ಗೊತ್ತಾ?
