ನವದೆಹಲಿ, ಸೆ.25: ಭಾರತದಲ್ಲಿ ಡಿಜಿಟಲ್ ಪಾವತಿ ವಿಧಾನಗಳು ಹೆಚ್ಚುತ್ತಿದ್ದು, ಶೇ 42ರಷ್ಟು ಗ್ರಾಹಕರು ಹಬ್ಬದ ಆನ್ಲೈನ್ ಶಾಪಿಂಗ್ಗಾಗಿ ಏಕೀಕೃತ ಪಾವತಿ ಇಂಟರ್ಫೇಸ್ (ಯುಪಿಐ) ಅನ್ನೇ ಆಯ್ಕೆ ಮಾಡಿಕೊಳ್ಳುವುದಾಗಿ ಹೇಳಿದ್ದಾರೆ ಎಂದು ಹೊಸ ಸಮೀಕ್ಷಾ ವರದಿ ಸೋಮವಾರ ತಿಳಿಸಿದೆ. ಇದಲ್ಲದೆ, ಶೇಕಡಾ 57 ರಷ್ಟು ಜನರು ಬಹುಮಾನ ಮತ್ತು ಕ್ಯಾ ಶ್ಬ್ಯಾಕ್ ಗಳಿಸಲು ಯುಪಿಐ ತಮ್ಮ ಆದ್ಯತೆಯ ಡಿಜಿಟಲ್ ಪಾವತಿ ವಿಧಾನವಾಗಿದೆ ಎಂದು ಹೇಳಿದ್ದಾರೆ ಎಂದು ನೀಲ್ಸನ್ ಮೀಡಿಯಾ ಇಂಡಿಯಾದ ವರದಿ ತಿಳಿಸಿದೆ.
ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್ಪಿಸಿಐ) ಪ್ರಕಾರ, ಯುಪಿಐ ಆಧಾರಿತ ಪಾವತಿಗಳ ಸಂಖ್ಯೆ ಆಗಸ್ಟ್ನಲ್ಲಿ ಮೊದಲ ಬಾರಿಗೆ 10 ಬಿಲಿಯನ್ ಮಾಸಿಕ ವಹಿವಾಟುಗಳನ್ನು ದಾಟಿದೆ. ಸದ್ಯ ಯುಪಿಐನಲ್ಲಿ ಮಾಸಿಕ ವಹಿವಾಟಿನ ಸಂಖ್ಯೆ 10.24 ಬಿಲಿಯನ್ ದಾಟಿದ್ದು, ನಿವ್ವಳ ವಹಿವಾಟು ಮೌಲ್ಯ 15.18 ಟ್ರಿಲಿಯನ್ ರೂ. ಆಗಿದೆ.
ಸಮೀಕ್ಷೆಯ ವರದಿಯ ಪ್ರಕಾರ, ಸುಮಾರು ಶೇಕಡಾ 75 ರಷ್ಟು ಜನರು ಎಲೆಕ್ಟ್ರಾನಿಕ್ ಗ್ಯಾಜೆಟ್ಗಳು ಮತ್ತು ಉತ್ಪನ್ನಗಳು (ಸ್ಮಾರ್ಟ್ಫೋನ್ಗಳು, ಟಿವಿಗಳು, ರೆಫ್ರಿಜರೇಟರ್ಗಳು ಮತ್ತು ಎಸಿಗಳು), ಐಷಾರಾಮಿ ಮತ್ತು ಅಧಿಕೃತ ಸೌಂದರ್ಯ ಬ್ರಾಂಡ್ಗಳು, ಗೃಹೋಪಯೋಗಿ / ಸುಧಾರಣಾ ವಸ್ತುಗಳು ಮತ್ತು ಬಳಕೆಯ ವಸ್ತುಗಳನ್ನು ಆನ್ಲೈನ್ನಲ್ಲಿ ಖರೀದಿಸಲು ಆಸಕ್ತಿ ಹೊಂದಿದ್ದಾರೆ.
ಮೆಟ್ರೋಪಾಲಿಟನ್ ನಗರಗಳಲ್ಲಿ ಶೇಕಡಾ 87 ರಷ್ಟು ಗ್ರಾಹಕರು ಮತ್ತು ಶ್ರೇಣಿ -2 ನಗರಗಳಲ್ಲಿ ಶೇಕಡಾ 86 ರಷ್ಟು (ಜನಸಂಖ್ಯೆ 10-40 ಲಕ್ಷ) ಜನ ಹಬ್ಬದ ಅವಧಿಯಲ್ಲಿ ಆನ್ ಲೈನ್ ನಲ್ಲಿ ಶಾಪಿಂಗ್ ಮಾಡಲು ಬಯಸುತ್ತಾರೆ ಎಂದು ಸಮೀಕ್ಷೆ ತಿಳಿಸಿದೆ. ಶೇಕಡಾ 70 ಕ್ಕೂ ಹೆಚ್ಚು ಗ್ರಾಹಕರು ಎಲೆಕ್ಟ್ರಾನಿಕ್ ವಸ್ತುಗಳನ್ನು ಖರೀದಿಸಲು ಆನ್ಲೈನ್ ಸೇಲ್ಸ್ ಫೆಸ್ಟಿವಲ್ಗಳಿಗಾಗಿ ಕಾಯುತ್ತಾರೆ.
ಶೇಕಡಾ 75 ಕ್ಕೂ ಹೆಚ್ಚು ಗ್ರಾಹಕರು ಆಕರ್ಷಕ ಬ್ಯಾಂಕ್ ಕೊಡುಗೆಗಳು ಮತ್ತು ನೋ-ಕಾಸ್ಟ್ ಇಎಂಐಗಳಿಂದ ಆಕರ್ಷಿತರಾಗಿದ್ದಾರೆ ಎಂದು ವರದಿ ತಿಳಿಸಿದೆ. ಹಬ್ಬದ ಆನ್ಲೈನ್ ಶಾಪಿಂಗ್ ಈವೆಂಟ್ಗಳಲ್ಲಿ ಉಡುಪು, ಪಾದರಕ್ಷೆಗಳು ಮತ್ತು ವಿವಿಧ ಫ್ಯಾಷನ್ ಪರಿಕರಗಳ ಟ್ರೆಂಡಿ ಬ್ರಾಂಡ್ಗಳನ್ನು ಖರೀದಿಸಲು ತಾವು ಇಚ್ಛಿಸುವುದಾಗಿ ಸುಮಾರು ಶೇಕಡಾ 80 ರಷ್ಟು ಗ್ರಾಹಕರು ಹೇಳಿದ್ದಾರೆ.
ಸುಮಾರು 140 ಮಿಲಿಯನ್ ಶಾಪರ್ ಗಳನ್ನು ಹೊಂದಿರುವ ಭಾರತದ ಆನ್ಲೈನ್ ಮಾರುಕಟ್ಟೆಯಲ್ಲಿ ಈ ವರ್ಷದ ಹಬ್ಬದ ತಿಂಗಳಲ್ಲಿ 90,000 ಕೋಟಿ ರೂ. ಮೌಲ್ಯದ ಸರಕುಗಳು ಮಾರಾಟವಾಗುವ ಸಾಧ್ಯತೆಯಿದೆ. ಮಾರುಕಟ್ಟೆ ಸಂಶೋಧನಾ ಸಂಸ್ಥೆ ರೆಡ್ ಸೀರ್ ಸ್ಟ್ರಾಟಜಿ ಕನ್ಸಲ್ಟೆಂಟ್ಸ್ ನ ಇತ್ತೀಚಿನ ವರದಿಯ ಪ್ರಕಾರ, ಇದು ಕಳೆದ ವರ್ಷದ ಹಬ್ಬದ ತಿಂಗಳ ಮಾರಾಟಕ್ಕಿಂತ ಶೇಕಡಾ 18-20 ರಷ್ಟು ಹೆಚ್ಚಾಗಿದೆ.
ಇದನ್ನೂ ಓದಿ : ಫಾರ್ಮ್ 10ಬಿ, 10 ಬಿಬಿ, ಐಟಿಆರ್ -7 ಸಲ್ಲಿಕೆ ಗಡುವು ಅ.31ರವರೆಗೆ ವಿಸ್ತರಣೆ
