ನವದೆಹಲಿ: ಕೋವಿಡ್-19 ಸಾಂಕ್ರಾಮಿಕ ರೋಗದಿಂದ ತತ್ತರಿಸಿರುವ ಆರ್ಥಿಕ ಬೆಳವಣಿಗೆ ವೃದ್ಧಿಸುವ ತುರ್ತು ಅಗತ್ಯತೆಯ ಮಧ್ಯೆ 2021-22ರ ವಾರ್ಷಿಕ ಬಜೆಟ್ ಸಿದ್ಧಪಡಿಸುವ ಕಾರ್ಯವನ್ನು ಹಣಕಾಸು ಸಚಿವಾಲಯ ಶುಕ್ರವಾರ ಪ್ರಾರಂಭಿಸಿದೆ.
ಮುಂಬರುವ ಬಜೆಟ್ ದೇಶಕ್ಕೆ ನಿರ್ಣಾಯಕವಾಗಲಿದೆ. ಆದಾಯ ಸಂಗ್ರಹ, ಹೂಡಿಕೆ, ಖರ್ಚು, ರಫ್ತು ಮತ್ತು ಆಹಾರ ಬೆಲೆಗಳು ಸೇರಿದಂತೆ ಆರ್ಥಿಕತೆಯ ಎಲ್ಲ ವಿಭಾಗಗಳ ಮೇಲೆ ಪರಿಣಾಮ ಬೀರಿದ ಸಾಂಕ್ರಾಮಿಕ ರೋಗದ ಪರಿಣಾಮ ಎದುರಿಸಬೇಕಾಗುತ್ತದೆ.
ಐಎಂಎಫ್ ಮುನ್ಸೂಚನೆಯ ಪ್ರಕಾರ, ಈ ವರ್ಷ ಆರ್ಥಿಕತೆಯು ಶೇ 10.3ರಷ್ಟು ಭಾರಿ ಪ್ರಮಾಣದಲ್ಲಿ ಸಂಕುಚಿತಗೊಳ್ಳುವ ನಿರೀಕ್ಷೆಯಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಆರ್ಥಿಕತೆ ಶೇ 9.5ರಷ್ಟು ಕುಗ್ಗುತ್ತದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಅಂದಾಜಿಸಿದೆ.
ಹಣಕಾಸು ಸಚಿವಾಲಯದ ವೇಳಾಪಟ್ಟಿಯ ಪ್ರಕಾರ, 2020-21ರ ಪರಿಷ್ಕೃತ ಅಂದಾಜು (ಆರ್‌ಇ) ಮತ್ತು 2021-22ರ ಬಜೆಟ್ ಅಂದಾಜು (ಬಿಇ) ಅನ್ನು ಅಂತಿಮಗೊಳಿಸಲು ಸುಮಾರು ಒಂದು ತಿಂಗಳ ಸುದೀರ್ಘ ಕಾರ್ಯವು ಶುಕ್ರವಾರದಿಂದ ಪ್ರಾರಂಭವಾಯಿತು. ಬಜೆಟ್ ಸಂಬಂಧಿತ ಸರಣಿ ಸಭೆಗಳು ನವೆಂಬರ್ 12ರಂದು ಮುಕ್ತಾಯಗೊಳ್ಳಲಿವೆ.
ವೇಳಾಪಟ್ಟಿಯ ಪ್ರಕಾರ ಮೊದಲ ಸಭೆಯಲ್ಲಿ ಭಾಗವಹಿಸಿದವರಲ್ಲಿ ಹಣಕಾಸು ಸೇವಾ ಇಲಾಖೆಯ ಅಧಿಕಾರಿಗಳು, ಎಂಎಸ್‌ಎಂಇಗಳು, ವಸತಿ, ಉಕ್ಕು ಮತ್ತು ವಿದ್ಯುತ್ ಸಚಿವಾಲಯಗಳು ಸೇರಿದ್ದವು.
ಈ ವರ್ಷ ಕೋವಿಡ್-19 ಪರಿಸ್ಥಿತಿ ಮತ್ತು ಸಾಮಾಜಿಕ ದೂರವನ್ನು ಕಾಪಾಡಿಕೊಳ್ಳುವ ಅಗತ್ಯವನ್ನು ಗಮನದಲ್ಲಿ ಇಟ್ಟುಕೊಂಡು ಬಜೆಟ್ ಪೂರ್ವ ಸಭೆಗಳಲ್ಲಿ ಭಾಗವಹಿಸುವವರ ಸಂಖ್ಯೆಯನ್ನು ಸಚಿವಾಲಯದಿಂದ ಪ್ರತಿ ಸಭೆಗೆ ಗರಿಷ್ಠ 5 ಅಧಿಕಾರಿಗಳಿಗೆ ಸೀಮಿತಗೊಳಿಸಬಹುದು ಎಂದು ಹಣಕಾಸು ಸಚಿವಾಲಯದ ಬಜೆಟ್ ವಿಭಾಗವು ನೋಟಿಸ್‌ನಲ್ಲಿ ತಿಳಿಸಿದೆ.
ಮೋದಿ 2.0 ಸರ್ಕಾರದ ಮತ್ತು ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ಅವರ ಮೂರನೇ ಬಜೆಟ್ ಇದಾಗಲಿದೆ. 2021-22ರ ಬಜೆಟ್ ಅನ್ನು ಫೆಬ್ರವರಿ 1ರಂದು ಮಂಡಿಸುವ ಸಾಧ್ಯತೆಯಿದೆ.
ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರವು ಫೆಬ್ರವರಿ ಕೊನೆಯಲ್ಲಿ ಬಜೆಟ್ ಮಂಡಿಸುವ ವಸಾಹತುಶಾಹಿ ಯುಗದ ಸಂಪ್ರದಾಯವನ್ನು ರದ್ದುಗೊಳಿಸಿತು. ಅಂದಿನ ಹಣಕಾಸು ಸಚಿವ ಅರುಣ್ ಜೇಟ್ಲಿ ಅವರು 2017ರ ಫೆಬ್ರವರಿ 1ರಂದು ಮೊದಲ ಬಾರಿಗೆ ವಾರ್ಷಿಕ ಲೆಕ್ಕಾಚಾರ ಮಂಡಿಸಿ ಗಮನ ಸೆಳೆದಿದ್ದರು.
