ನವದೆಹಲಿ: ಜಾಗತಿಕ ಆವಿಷ್ಕಾರ ಸೂಚ್ಯಂಕದ (ಗ್ಲೋಬಲ್ ಇನೋವೇಷನ್ ಇಂಡೆಕ್ಸ್) 2019ನೇ ಸಾಲಿನಲ್ಲಿ ಭಾರತ 57ನೇ ಸ್ಥಾನದಿಂದ 52ನೇ ಸ್ಥಾನಕ್ಕೆ ಜಿಗಿದಿದೆ.
ಇನೋವೇಟಿವ್ ಮತ್ತು ನವಿನ ಮಾದರಿಯ ತಂತ್ರಜ್ಞಾನಗಳಲ್ಲಿ ಉತ್ತಮ ಸಾಧನೆ ತೋರುತ್ತಿರುವ ಭಾರತ, ಕಳೆದ ವರ್ಷ ಜಾಗತಿಕ ಸೂಚ್ಯಂಕದಲ್ಲಿ 57ನೇ ಸ್ಥಾನದಲ್ಲಿತ್ತು. ಒಂದೇ ವರ್ಷದಲ್ಲಿ 5 ಅಂಕಗಳ ಜಿಗಿತ ದಾಖಲಿಸಿದೆ. 2015ರಲ್ಲಿ 81ನೇ ಸ್ಥಾನದಲ್ಲಿದ್ದು, ಮೂರು ವರ್ಷಗಳಲ್ಲಿ 29 ಅಂಕ ಏರಿಕೆ ಕಂಡಿದೆ.
ಐಸಿಟಿ ಸೇವೆಗಳ ರಫ್ತು, ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಪದವೀಧರರು, ವಿಶ್ವವಿದ್ಯಾಲಯಗಳ ಗುಣಮಟ್ಟ, ಒಟ್ಟು ಬಂಡವಾಳ ರಚನೆ, ವ್ಯಾಪಕ ಆರ್ಥಿಕ ಹೂಡಿಕೆಗಳ ಅಳತೆ ಮತ್ತು ಸೃಜನಶೀಲ ಸರಕುಗಳ ರಫ್ತು ಸೇರಿದಂತೆ ಇತರ ನಾವೀನ್ಯತೆಯಲ್ಲಿ ಭಾರತವು ವಿಶ್ವದ ಅಗ್ರಸ್ಥಾನದಲ್ಲಿ ಸಾಗುತ್ತಿದೆ ಎಂದು ವರದಿ ಹೇಳಿದೆ.
ವಿಶ್ವದ ಅಗ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಮೂಹಗಳಲ್ಲಿ ಭಾರತದ ನಗರಗಳು ಅತ್ಯುತ್ತಮವಾಗಿದ್ದು, ಬೆಂಗಳೂರು, ಮುಂಬೈ ಮತ್ತು ನವದೆಹಲಿ ಟಾಪ್ 100 ಜಾಗತಿಕ ಕ್ಲಸ್ಟರ್‌ ನಗರಗಳ ಸಾಲಿನಲ್ಲಿ ಸ್ಥಾನ ಪಡೆದಿವೆ.
129 ದೇಶಗಳು ಸೇರಿದಂತೆ 12ನೇ ಆವೃತ್ತಿಯ ಜಿಐಐ ಶ್ರೇಣಿ ಇದಾಗಿದ್ದು, 80 ಅಂಶಗಳನ್ನು ಆಧರಿಸಿ ಸ್ಥಾನಗಳನ್ನು ನೀಡಲಾಗುತ್ತದೆ. ಮೊಬೈಲ್ ಆಪ್ಲಿಕೇಷನ್ ಸೃಷ್ಟಿ, ಶಿಕ್ಷಣ, ವೆಚ್ಚಗಳು, ವೈಜ್ಞಾನಿಕ, ತಾಂತ್ರಿಕ ಸೇರಿದಂತೆ ಇತರ ಅಂಶಗಳನ್ನು ಪರಾಮರ್ಶಗೆ ಒಳಪಡಿಸಲಾಗುತ್ತದೆ.
ಜಿಐಐ ಪಟ್ಟಿಯಲ್ಲಿ ಸ್ವಿಜರ್ಲೆಂಡ್‌ ಪ್ರಥಮ ಸ್ಥಾನ ಕಾಪಾಡಿಕೊಂಡಿದೆ. ಸ್ವೀಡನ್‌, ಅಮೆರಿಕ, ನೆದರ್ಲೆಂಡ್‌, ಬ್ರಿಟನ್‌, ಫಿನ್ಲೆಂಡ್‌, ಡೆನ್ಮಾರ್ಕ್‌, ಸಿಂಗಾಪುರ, ಜರ್ಮನಿ, ಇಸ್ರೇಲ್‌ ನಂತರದ ಸ್ಥಾನದಲ್ಲಿವೆ ಎಂದು ವರದಿ ತಿಳಿಸಿದೆ.
