ವಾಯುಸೇನೆ ಬತ್ತಳಿಕೆ ಸೇರಿದ ಬಾಲಾಕೋಟ್​ ಏರ್​ಸ್ಟ್ರೈಕ್​ನ ಸುಧಾರಿತ ಸ್ಪೈಸ್​-2000 ಬಾಂಬ್​

ಕೇಂದ್ರ ಸರ್ಕಾರವು ಸೇನೆಯ ಮೂರು ದಳಗಳಿಗೂ ತುರ್ತು ಪರಿಸ್ಥಿತಿ ನಿರ್ವಹಣೆಗೆ ಸಹಾಯಕವಾಗುವಂತೆ ಇಸ್ರೇಲ್​ ನಿರ್ಮಿತ ಹೊಸ ಅವತರಣಿಕೆಯ 'ಬಂಕರ್ ಬಸ್ಟರ್​ ಸ್ಪೈಸ್​ 2000' ಸಿಡಿ ತಲೆ ಖರೀದಿಸಿದೆ. 250 ಕೋಟಿ ರೂ. ಒಪ್ಪಂದದಡಿ 84 ಸಿಡಿ ತಲೆ ಭಾರತೀಯ ಸೇನೆ ಬತ್ತಳಿಕೆ ಸೇರಲಿವೆ. ಪ್ರಥಮ ಹಂತದಲ್ಲಿ ಗ್ವಾಲಿಯರ್​ ಕ್ಯಾಂಪ್​ ಕೆಲವು ಬಾಂಬ್​ಗಳನ್ನು ಸ್ವೀಕರಿಸಿದೆ. ಪುಲ್ವಾಮಾ ಪ್ರತೀಕಾರಕ್ಕೆ ಬಾಲಾಕೋಟ್​ ಉಗ್ರ ಶಿಬಿರದ ದಾಳಿಗೆ ಇದೇ ಸಿಡಿ ತಲೆಗಳನ್ನು ಬಳಸಲಾಗಿತ್ತು.

ನವದೆಹಲಿ: ಪುಲ್ವಾಮಾ ಪ್ರತೀಕಾರಕ್ಕೆ ಪಾಕ್​ ಆಕ್ರಮಿತ ಕಾಶ್ಮೀರ ಪ್ರದೇಶದಲ್ಲಿನ ಬಾಲಾಕೋಟ್​​ ಭಯೋತ್ಪಾದಕರ ತರಬೇತಿ ಶಿಬಿರವನ್ನು ಧ್ವಂಸ ಮಾಡಿದ ಇಸ್ರೇಲ್​ ನಿರ್ಮಿತ 'ವಿಧ್ವಂಸಕ ಬಂಕರ್ ಬಸ್ಟರ್​ ಸ್ಪೈಸ್​ 2000' ಸಿಡಿ ತಲೆಯ ಹೊಸ ಅವತರಣಿಕೆಯ ಬಾಂಬ್​ಗಳನ್ನು ಭಾರತೀಯ ವಾಯುಪಡೆ (ಐಎಎಫ್​) ಸ್ವೀಕರಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹೊಸ ಅವತರಣಿಕೆಯ ಬಂಕರ್ ಬಸ್ಟರ್​ ಸ್ಪೈಸ್​- 2000 ಸಿಡಿ ತಲೆಗಳನ್ನು ಇಸ್ರೇಲ್ ಪ್ರಥಮ ಹಂತದಲ್ಲಿ ಭಾರತಕ್ಕೆ ಹಸ್ತಾಂತರಿಸಿದೆ. ಐಎಎಫ್​ನ ಕೇಂದ್ರ ಕಚೇರಿಯಾದ ಗ್ವಾಲಿಯರ್​ ಕ್ಯಾಂಪ್​ ಇವುಗಳನ್ನು ಪಡೆದುಕೊಂಡಿದೆ ಎಂದು ಮೂಲಗಳು ತಿಳಿಸಿವೆ.

ಕೇಂದ್ರ ಸರ್ಕಾರವು ಸೇನೆಯ ಮೂರು ದಳಗಳಿಗೂ ತುರ್ತು ಪರಿಸ್ಥಿತಿ ನಿರ್ವಹಣೆಗಾಗಿ ತಲಾ 250 ಕೋಟಿ ರೂಪಾಯಿ ಮೀಸಲಿರಿಸಿ ಇಸ್ರೇಲ್​ನೊಂದಿಗೆ ಒಪ್ಪಂದ ಮಾಡಿಕೊಂಡಿತ್ತು. ಮೂಲಗಳ ಪ್ರಕಾರ ವಾಯುಸೇನೆಯು ಸ್ಪೈಸ್​- 2000 ಮಾರ್ಕ್​ 84 ಸರಣಿಯ ಬಾಂಬ್​ಗಳನ್ನು ಖರೀದಿಸಿದೆ.

ಸ್ಪೈಸ್​ 2000 ವಿಶೇಷತೆ:

SPICE: ಸ್ಮಾರ್ಟ್​, ಪ್ರಿಸೈಜ್​, ಇಂಪ್ಯಾಕ್ಟ್​, ಕಾಸ್ಟ್​ ಎಫೆಕ್ಟಿವ್​ ಅಂದರೆ ಅತ್ಯಾಧುನಿಕ, ನಿಖರ, ಪರಿಣಾಮಕಾರಿ ಮತ್ತು ಅಗ್ಗದ ಬಾಂಬ್ ಎಂದರ್ಥ. ಅತ್ಯಂತ ನಿಖರವಾದ ಗುರಿಯೊಂದಿಗೆ ದಾಳಿ ನಡೆಸಿ ವೈರಿಪಡೆಯ ಶಿಬಿರವನ್ನು ನಾಶ ಮಾಡುತ್ತದೆ. ಇಸ್ರೇಲ್​ನ ರಾಫೇಲ್​ ಅಡ್ವಾನ್ಸಡ್​ ಡಿಫೆನ್ಸ್​ ಸಿಸ್ಟಮ್​ ಕಂಪನಿ ತಯಾರಿಸಿದೆ.

ಕಾರ್ಯ ನಿರ್ವಹಣೆ ಹೇಗೆ:
ಫೈಲೆಟ್​ ಒಮ್ಮೆ ಇದನ್ನು ಕಾರ್ಯಾಚರಣೆಗೆ ಲಾಂಚ್​ ಮಾಡಿದರೆ ಅದು ಸ್ವಯಂ ಆಗಿ ತನ್ನ ಜಿಪಿಎಸ್​ ಬಳಸಿಕೊಂಡು ನ್ಯಾವಿಗೇಟ್​ ಮಾಡಿಕೊಳ್ಳುತ್ತದೆ. ಉದ್ದೇಶಿತ ಗುರಿ ಒಂದಿಂಚೂ ತಪ್ಪದಂತೆ ಅಪ್ಪಳಿಸಿ ನಾಶಪಡಿಸುತ್ತದೆ. ಹೋಮಿಂಗ್ ಸ್ಟೇಜ್​ನಲ್ಲಿ ಸ್ಪೈಸ್​ ಸೀನ್ ಮ್ಯಾಚಿಂಗ್ ಬಳಸಿಕೊಂಡು ಗುಡಿಯನ್ನು ಪತ್ತೆಹಚ್ಚುತ್ತದೆ ಜೊತೆಗೆ ಟ್ರ್ಯಾಕರ್​ ಬಳಸಿಕೊಂಡು ಅದರ ಮೇಲೆ ಅಪ್ಪಳಿಸುತ್ತದೆ.