ನವದೆಹಲಿ: ಸದ್ಯ ನಷ್ಟದಲ್ಲಿರುವ ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಮುಚ್ಚಲು ಹಣಕಾಸು ಸಚಿವಾಲಯ ಕೇಂದ್ರಕ್ಕೆ ಸೂಚಿಸಿದೆ.
ನಷ್ಟದಲ್ಲಿರುವ ಸಾರ್ವಜನಿಕ ವಲಯದ ಸಂಸ್ಥೆಗಳನ್ನು ಮತ್ತೆ ಲಾಭದ ಹಳಿಗೆ ತರುವ ಸಲುವಾಗಿ ₹74,000 ಕೋಟಿ ರೂ.ಗಳ ಬೃಹತ್ ಮೊತ್ತವನ್ನು ನೀಡಲು ದೂರಸಂಪರ್ಕ ಇಲಾಖೆಯ (ಡಿಒಟಿ) ಸಲ್ಲಿಸಿದ್ದ ಪ್ರಸ್ತಾವನೆಯನ್ನು ಹಣಕಾಸು ಸಚಿವಾಲಯ ತಿರಸ್ಕರಿಸಿದ ನಂತರ ಈ ಬೆಳವಣಿಗೆ ಕಂಡು ಬಂದಿದೆ.
ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಮುಚ್ಚಲು ಸುಮಾರು ₹95,000 ಕೋಟಿ ವ್ಯಯವಾಗಲಿದೆ ಎಂದು ಭಾರತೀಯ ದೂರಸಂಪರ್ಕ ಸೇವೆ ಅಂದಾಜಿಸಿದೆ. ಆದರೆ, ಇಷ್ಟೊಂದು ಹಣ ಅಗತ್ಯವಿಲ್ಲ ಎಂದು ಹಣಕಾಸು ಸಚಿವಾಲಯ ಹೇಳಿದೆ.
ಉದ್ಯೋಗಿಗಳ ಕಥೆ ಏನು..?
ನಷ್ಟದಲ್ಲಿರುವ ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಮುಚ್ಚಲು ಹಣಕಾಸು ಸಚಿವಾಲಯ ಸೂಚನೆ ನೀಡಿದ ವೇಳೆಯಲ್ಲೇ ಉದ್ಯೋಗಿಗಳ ಭವಿಷ್ಯ ಬಗ್ಗೆ ಪ್ರಶ್ನೆ ಎದ್ದಿದೆ. ಒಂದು ವೇಳೆ ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಮುಚ್ಚಿದಲ್ಲಿ ಭಾರತೀಯ ದೂರಸಂಪರ್ಕ ಸೇವೆಯಲ್ಲಿರುವ ಉದ್ಯೋಗಿಗಳನ್ನು ಇತರೆ ವಿಭಾಗಗಳಿಗೆ ನೇಮಕ ಮಾಡುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಬಿಎಸ್ಎನ್ಎಲ್ನಲ್ಲಿ ಪ್ರಸ್ತುತ 1.65 ಲಕ್ಷ ಉದ್ಯೋಗಿಗಳಿದ್ದಾರೆ. ಆದರೆ, ಈ ಎಲ್ಲಾ ಉದ್ಯೋಗಿಗಳಿಗೆ ಸ್ವಯಂಪ್ರೇರಿತ ನಿವೃತ್ತಿ (ವಿಆರ್ಎಸ್) ನೀಡುವುದಿಲ್ಲ ಎಂದು ಬಿಎಸ್ಎನ್ಎಲ್ ಸ್ಪಷ್ಟಪಡಿಸಿದೆ ಎಂದು ತಿಳಿದು ಬಂದಿದೆ. ಬಿಎಸ್ಎನ್ಎಲ್ಗೆ ಹೋಲಿಕೆ ಮಾಡಿದಲ್ಲಿ ಎಂಟಿಎನ್ಎಲ್ ಉದ್ಯೋಗಿಗಳ ಸಂಖ್ಯೆ ತುಂಬಾ ಕಡಿಮೆ. ಎಂಟಿಎನ್ಎಲ್ ಸುಮಾರು 22,000 ಉದ್ಯೋಗಿಗಳನ್ನು ಹೊಂದಿದೆ.
ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಎರಡೂ ಕಂಪನಿಗಳು ಜುಲೈ ತಿಂಗಳಲ್ಲಿ ಉದ್ಯೋಗಿಗಳಿಗೆ ಸಂಬಳ ನೀಡುವಲ್ಲಿ ವಿಫಲವಾಗಿದ್ವು.
ಬಿಎಸ್ಎನ್ಎಲ್ ಕಂಪನಿಯ ಉದ್ಯೋಗಿಗಳ ತಿಂಗಳ ಸಂಬಳ ಹಾಗೂ ಇನ್ನಿತರ ಖರ್ಚು ₹750ರಿಂದ ₹850 ಕೋಟಿ ಇದ್ದರೆ, ಎಂಟಿಎನ್ಎಲ್ ಖರ್ಚು ₹160 ಕೋಟಿ. ನಷ್ಟದಲ್ಲಿ ಸಾಗುತ್ತಿರುವ ಇವೆರಡೂ ಸರ್ಕಾರಿ ಸ್ವಾಮ್ಯದ ಕಂಪನಿಗಳಿಗೆ ಈ ಹಣವನ್ನು ಹೊಂದಿಸುವುದು ಸವಾಲಾಗಿದೆ.
ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ನಡುವಿನ ವ್ಯತ್ಯಾಸ ಏನು?
ಭಾರತೀಯ ದೂರಸಂಚಾರ ನಿಗಮ ನಿಯಮಿತ(ಬಿಎಸ್ಎನ್ಎಲ್) ಹಾಗೂ ಮಹಾನಗರ ದೂರಸಂಪರ್ಕ ನಿಗಮ ನಿಯಮಿತ(ಎಂಟಿಎನ್ಎಲ್) ಪದಗಳನ್ನು ಕೇಳದ ಮಂದಿ ತುಂಬಾ ವಿರಳ ಎನ್ನಬಹುದು. ಆದರೆ, ಆ ಪದವನ್ನು ಕೇಳಿದ ಬಹುತೇಕರಿಗೆ ಈ ಕಂಪನಿಗಳ ನಡುವಿನ ವ್ಯತ್ಯಾಸ ತಿಳಿದಿರುವುದಿಲ್ಲ. ಬಿಎಸ್ಎನ್ಎಲ್ ಹಾಗೂ ಎಂಟಿಎನ್ಎಲ್ ಸರ್ಕಾರದ ಅಡಿಯಲ್ಲಿ ಬಂದರೂ ಇವೆರಡೂ ಸೇವೆ ನೀಡುವ ವಿಚಾರದಲ್ಲಿ ಭಿನ್ನತೆ ಹೊಂದಿವೆ.
ಎಂಟಿಎನ್ಎಲ್ ಭಾರತದ ಪ್ರಮುಖ ನಾಲ್ಕು ನಗರಗಳಾದ ಮುಂಬೈ, ದೆಹಲಿ, ಕೋಲ್ಕತಾ ಹಾಗೂ ಚೆನ್ನೈ ನಗರಗಳಲ್ಲಿ ಸೇವೆ ಒದಗಿಸುತ್ತಿದೆ. ಆದರೆ, ಬಿಎಸ್ಎನ್ಎಲ್ ಮುಂಬೈನ ಕೆಲ ಭಾಗಗಳನ್ನು ಹೊರತುಪಡಿಸಿ ಭಾರತದಾದ್ಯಂತ ಸೇವೆ ನೀಡುತ್ತಿದೆ.
