ನವದೆಹಲಿ: ಎನ್ಡಿಎ ಮೇಲೆ ಭಾರಿ ನಿರೀಕ್ಷೆ, ಅಪಾರ ಆರ್ಥಿಕ ಭರವಸೆ ಇರಿಸಿಕೊಂಡಿದ್ದ ಜನತೆಯ ಪಾಲಿಗೆ ದೊಡ್ಡ ನಿರಾಶೆಯ ಹಾಗೂ ಬೇಡವಾದ ಆರ್ಥಿಕ ಬದಲಾವಣೆ ಹರಡಿಕೊಂಡಿದೆ.
2020ರ ಹಣಕಾಸಿನ ವಾರ್ಷಿಕ ಬಜೆಟ್ನಲ್ಲಿ ಸರ್ಕಾರ ಪರಿಷ್ಕರಿಸಿದ ಪ್ರಸ್ತುತ ಜಿಡಿಪಿ ಮೇಲಿನ ಹಣಕಾಸಿನ ಕೊರತೆಯ ಶೇ 3.4ರಷ್ಟು ಮೇಲ್ಮುಖವಾಗಿದೆ. ಈ ಹಿಂದೆ ಶೇ 3.3ರಷ್ಟು ಹಣಕಾಸು ಕೊರತೆ ಇರಲಿದೆ ಎಂದು ಅಂದಾಜಿಸಿತ್ತು.
ಇದು ನರೇಂದ್ರ ಮೋದಿ ಸರ್ಕಾರದ ಕುರಿತು ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದ ಜನತೆಯ ಪಾಲಿಗೆ ದೊಡ್ಡ ನಿರಾಶೆಯಷ್ಟೇ ಅಲ್ಲ, ಕೋಟ್ಯಾಂತರ ಮತದಾರರುಳ್ಳ ದೇಶದಲ್ಲಿ ಕಳವಳಕಾರಿ ಬೆಳವಣಿಗೆಯಾಗಿದೆ.
ಹಣಕಾಸು ವ್ಯವಹಾರಗಳ ಸಚಿವಾಲಯದ ಸುಭಾಷ್ ಚಂದ್ರ ಗಾರ್ಗ್ ಅವರು, ಹಣಕಾಸಿನ ಕೊರತೆಯ ಗುರಿ ಜಿಡಿಪಿಯ ಶೇ 3.4 ವಹಿವಾಟಿನಲ್ಲಿ ಕಾಯ್ದಿಡುವ ಭರವಸೆ ನೀಡಿದ್ದರು.
ಇದರ ಜೊತೆಗೆ ಪ್ರಸಕ್ತ ಸಾಲಿನ ತ್ರೈಮಾಸಿಕ ಚಾಲ್ತಿ ಖಾತೆ ಕೊರತೆಯ ಪ್ರಮಾಣವು ಶೇ 2.5ಕ್ಕೆ ಏರಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿನ ವಹಿವಾಟಿನ ಕೊರತೆ ಎದುರಾಗಿತ್ತು. 2018ರ ತ್ರೈಮಾಸಿಕದ ಇದೇ ಅವಧಿಯಲ್ಲಿ ಹಣಕಾಸು ಕೊರತೆ ಪ್ರಮಾಣ 13.7 ಬಿಲಯನ್ ಡಾಲರ್ನಿಂದ 16.9 ಬಿಲಯನ್ ಡಾಲರ್ಗೆ (ಶೇ 2.1ರಷ್ಟು) ಏರಿಕೆ ಆಗಿತ್ತು. ಈಗಿನ ತ್ರೈಮಾಸಿಕದಲ್ಲಿ ಇದು 19.1 ಬಿಲಿಯನ್ (ಶೇ 2.9ರಷ್ಟು) ಹೆಚ್ಚಳವಾಗಿದೆ ಎಂದು ಆರ್ಬಿಐ ತನ್ನ ಅಂಕಿಅಂಶಗಳ ಮೂಲಕ ತಿಳಿಸಿದೆ.
ವಾಸ್ತವದಲ್ಲಿ ಹಣಕಾಸು ಕೊರತೆ ಹೆಚ್ಚಾದಾಗ ಆರ್ಥಿಕತೆಯ ಆರೋಗ್ಯ ಸರಿಯಾಗಿಲ್ಲವೆಂದೇ ಲೆಕ್ಕ. ಇಂಥ ಬೇಡವಾದ ಬದಲಾವಣೆಯಾದಾಗ ವ್ಯಾಮೋಹದ ವಿವಾದ ಬದಿಗೆ ಸರಿದು ಆರ್ಥಿಕತೆಗೂ, ಅದನ್ನು ಸರಿಯಾಗಿ ನಿಭಾಯಿಸುವ ಭರವಸೆ ನೀಡಿದ ಸರ್ಕಾರಕ್ಕೂ ಪರೀಕ್ಷಾ ಕಾಲ ಬಂದಿದೆಯೆಂಬ ಭಾವನೆ ಹರಡಿಕೊಂಡಂತೆ ಎಂದು ಆರ್ಥಿಕ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
