ನವದೆಹಲಿ: 21 ನೇ ಶತಮಾನದ ಈ ದಿನಮಾನಗಳಲ್ಲೂ ವೈಯಕ್ತಿಕ ಶುಚಿತ್ವದ ವಿಚಾರದಲ್ಲಿ ಮಹಿಳೆಯರಲ್ಲಿ ಕೀಳರಿಮೆ ಹೋಗಿಲ್ಲ. ಈ ನಿಟ್ಟಿನಲ್ಲಿ ವ್ಯಕ್ತಿಯೊಬ್ಬರು ಮಾಡುತ್ತಿರುವ ಸಮಾಜ ಸೇವೆ ಎಲ್ಲರ ಗಮನ ಸೆಳೆಯುತ್ತಿದೆ.
ದೆಹಲಿ ನಿವಾಸಿ ಅನಿಶ್ ಶರ್ಮಾ, ಕೈತುಂಬಾ ಸಂಬಳ ಬರುತ್ತಿದ್ದ ಸಾಫ್ಟ್ವೇರ್ ಕಂಪನಿಯಲ್ಲಿನ ನೌಕರಿ ಬಿಟ್ಟು, ಮಹಿಳೆಯರ ಶ್ರೇಯೋಭಿವೃದ್ದಿಗೆ ದುಡಿಯುತ್ತಿದ್ದಾರೆ. ಆರಂಭದಲ್ಲಿ ಕಡಿಮೆ ವೆಚ್ಚದಲ್ಲಿ ಸ್ಯಾನಿಟರಿ ಪ್ಯಾಡ್ ಸಿದ್ಧಗೊಳಿಸಲು ಮುಂದಾದ ಅವರು, ನಿರಂತರ ಸಂಶೋಧನೆಯಿಂದ ಶುಗರ್ ಕೇನ್ ಸಹಾಯದಿಂದ ಕೇವಲ ಒಂದು ರೂಗೆ ಲಭ್ಯವಾಗುವ ರೀತಿಯಲ್ಲಿ ಇವುಗಳನ್ನ ಸಿದ್ಧಪಡಿಸಿ ಮಹಿಳೆಯರಿಗೆ ನೀಡುತ್ತಿದ್ದಾರೆ.
2018ರಲ್ಲಿ ಅಕ್ಷಯ್ ಕುಮಾರ್ ನಟನೆಯ 'ಪ್ಯಾಡ್ ಮ್ಯಾನ್' ಚಿತ್ರ ರಿಲೀಸ್ ಆದ ಮೇಲೆ ಮತ್ತಷ್ಟು ಪ್ರೇರಣೆಗೊಂಡು ಕೇವಲ 1 ರೂಗೆ ಸ್ಯಾನಿಟರಿ ಪ್ಯಾಡ್ ನೀಡುತ್ತಿದ್ದು, ಗ್ರಾಮದ ಸುತ್ತಮುತ್ತ ವಾಸವಾಗಿರುವ ನೂರಾರು ಮಹಿಳೆಯರು ಶರ್ಮಾ ಬಳಿ ಬಂದು ಪ್ಯಾಡ್ ತೆಗೆದುಕೊಂಡು ಹೋಗುತ್ತಾರೆ. ಸಮಾಜಮುಖಿ ಕಾರ್ಯ ಮಾಡುತ್ತಿರುವ ಅನಿಶ್ ಶರ್ಮಾ ಅವರನ್ನು ನಟ ಅಕ್ಷಯ್ ಕುಮಾರ್ ಪ್ರಶಂಸಿಸಿ ಸನ್ಮಾನಿಸಿದ್ದಾರೆ.
ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಅನಿಶ್, ದೇಶಕ್ಕೆ ಸ್ವತಂತ್ರ ಸಿಕ್ಕು 70 ವರ್ಷಗಳು ಕಳೆದಿದ್ದರೂ, ಬರೋಬ್ಬರಿ 25 ಕೋಟಿ ಮಹಿಳೆಯರು ಸ್ಯಾನಿಟರಿ ಪ್ಯಾಡ್ ಬಳಕೆ ಮಾಡ್ತಿಲ್ಲ. ಇದರಿಂದ ನನಗೆ ಶಾಕ್ ಆಗಿದ್ದು, ಇದರಿಂದಲ್ಲೇ ಪ್ರೇರಣೆಗೊಂಡು ನಾನು ಸ್ಯಾನಿಟರಿ ಪ್ಯಾಡ್ ತಯಾರಿಸಲು ಮುಂದಾಗಿರುವೆ ಎಂದು ಹೇಳಿಕೊಂಡಿದ್ದಾರೆ. ಜತೆಗೆ ಕೇಂದ್ರ ಸರ್ಕಾರಕ್ಕೆ ನಾನು ಈಗಾಗಲೇ ಇದರ ಕುರಿತು ಮಾಹಿತಿ ನೀಡಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಪ್ಯಾಡ್ ತಯಾರಿಸಿ ದೇಶದ ಮಹಿಳೆಯರಿಗೆ ಸುಲಭ ದರದಲ್ಲಿ ಸಿಗುವಂತೆ ಮಾಡಲು ಯೋಚನೆ ಮಾಡುತ್ತಿರುವೆ ಎಂದು ತಿಳಿಸಿದ್ದಾರೆ.
