ಕೈಗೆ ಹಾಕಿದ್ದ ಬ್ಯಾಂಡೇಜ್​​ನಲ್ಲಿತ್ತು ಬ್ಲೇಡ್: ಸಿಬ್ಬಂದಿಗಳ ನಿರ್ಲಕ್ಷ್ಯ ಆರೋಪ

ವಿಜಯವಾಡ ಸರ್ಕಾರಿ ಆಸ್ಪತ್ರೆ ಸಿಬ್ಬಂದಿ ನಿರ್ಲಕ್ಷ್ಯ. ಚಿಕಿತ್ಸೆ ಬಳಿಕ ಬ್ಯಾಂಡೇಜ್​​ನಲ್ಲಿದ್ದ ಸರ್ಜಿಕಲ್ ಬ್ಲೇಡ್. ರೋಗಿಯ ಸಂಬಂಧಿಕರಿಂದ ಆರೋಪ.

ಆಂಧ್ರಪ್ರದೇಶ: "ವಿಜಯವಾಡದ ಸರ್ಕಾರಿ ಆಸ್ಪತ್ರೆ ಸಿಬ್ಬಂದಿಯ ನಿರ್ಲಕ್ಷ್ಯ ಮಹಿಳೆಯೊಬ್ಬರಿಗೆ ಶಾಪವಾಗಿ ಪರಿಣಮಿಸಿದೆ. ಹಾವು ಕಚ್ಚಿ ಆಸ್ಪತ್ರೆಗೆ ಬಂದಾಗ ಚಿಕಿತ್ಸೆ ನೀಡಿದ ವೈದ್ಯರು ಸರ್ಜಿಕಲ್ ಬ್ಲೇಡ್ ಇಟ್ಟು ಕೈಗೆ ಬ್ಯಾಂಡೇಜ್ ಹಾಕಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ. ಇದರಿಂದ ಸಂತ್ರಸ್ತೆಯ ಕೈಗೆ ಗಂಭೀರ ಸೋಂಕು ತಗುಲಿದೆ. ಸಿಬ್ಬಂದಿ ನಿರ್ಲಕ್ಷ್ಯದಿಂದ ಮಹಿಳೆ ಸ್ಥಿತಿ ಚಿಂತಾಜನಕವಾಗಿದೆ" ಎಂದು ಸಂಬಂಧಿಕರು ದೂರಿದ್ದಾರೆ.

ಪ್ರಕರಣದ ವಿವರ: ಕೃಷ್ಣಾ ಜಿಲ್ಲೆ ವಿಸ್ಸನ್ನ ಪೇಟೆಯ ತುಳಸಿ ಎಂಬ ಮಹಿಳೆಗೆ ಕಳೆದ ಮಾ.28ರಂದು ಮನೆಯಲ್ಲಿ ಹಾಸಿಗೆಯ ಕೆಳಗೆ ವಸ್ತುಗಳನ್ನು ಜೋಡಿಸುತ್ತಿದ್ದಾಗ ಕೈಗೆ ಹಾವು ಕಚ್ಚಿತ್ತು. ತಕ್ಷಣ ಅವರು ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ತೆರಳಿ ರೋಗ ನಿರೋಧಕ ಚುಚ್ಚುಮದ್ದು ಪಡೆದಿದ್ದರು. ಆದರೆ ಅವರ ಕೈ ಕಪ್ಪು ಬಣ್ಣಕ್ಕೆ ತಿರುಗಿದ್ದು, ವಿಜಯವಾಡ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು.

ಮಹಿಳೆಯನ್ನು ಪರೀಕ್ಷಿಸಿದ ವೈದ್ಯರು ಯಾವುದೇ ಅಪಾಯವಿಲ್ಲ ಎಂದು ತಿಳಿಸಿದ್ದರು. ಆ ಬಳಿಕ ಎರಡು ದಿನಗಳ ಕಾಲ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಮನೆಗೆ ಕರೆದುಕೊಂಡು ಹೋಗಲಾಗಿತ್ತು. ಆದರೆ, ಮನೆಗೆ ತೆರಳಿದ ಬಳಿಕವೂ ಕೈ ಊತ ಕಡಿಮೆಯಾಗಿರಲಿಲ್ಲ. ಸಂತ್ರಸ್ತೆ ನೋವಿನಿಂದ ಬಳಲುತ್ತಿದ್ದರಿಂದ ಸಂಬಂಧಿಕರು ಮತ್ತೆ ವೈದ್ಯರ ಗಮನಕ್ಕೆ ತಂದಿದ್ದರು. ಮತ್ತೊಮ್ಮೆ ಪರೀಕ್ಷಿಸಿದ ವೈದ್ಯರು ಕೈಗೆ ಆಪರೇಷನ್ ಮಾಡಿ ಊದಿಕೊಂಡಿದ್ದ ಭಾಗವನ್ನು ತೆಗೆದಿದ್ದರು. ನಂತರ ಅವರ ಮೊಣಕೈವರೆಗೆ ಬ್ಯಾಂಡೇಜ್ ಮಾಡಿ ವಾರ್ಡ್‌ಗೆ ಸ್ಥಳಾಂತರಿಸಲಾಗಿತ್ತು. ಎರಡು ದಿನಗಳ ನಂತರ ಡ್ರೆಸ್ಸಿಂಗ್‌ಗಾಗಿ ಬ್ಯಾಂಡೇಜ್‌ ಬಿಚ್ಚುತ್ತಿದ್ದಾಗ ಅದರೊಳಗೆ ಬ್ಲೇಡ್‌ ಕಾಣಿಸಿತ್ತು ಎಂಬುದು ಸಂಬಂಧಿಕರ ದೂರಾಗಿದೆ.

"ಅವರು ನನ್ನ ಕೈಗೆ ಬ್ಯಾಂಡೇಜ್ ಮಾಡಿ ಬ್ಲೇಡ್ ಅನ್ನು ಅದರಲ್ಲಿ ಬಿಟ್ಟು ಮೂರು ದಿನಗಳ ನಂತರ ಬ್ಯಾಂಡೇಜ್ ತೆಗೆದಿದ್ದಾರೆ. ಬ್ಯಾಂಡೇಜ್ ತೆರೆದ ನಂತರ ಅದರಲ್ಲಿ ಒಂದು ಸಣ್ಣ ಚಾಕು ಇತ್ತು. ನಾನು ದಾದಿಯರನ್ನು ಕೇಳಿದಾಗ ನನ್ನ ತಪ್ಪಿಲ್ಲ ಎಂದರು. ಈಗ ಕೈಗೆ ಸೋಂಕು ತಗುಲಿದೆ. ಹಾಗಾಗಿ ಮೊಣಕೈವರೆಗೆ ತೆಗೆಯಲು ಮುಂದಾಗಿದ್ದಾರೆ" ಎಂದು ಸಂತ್ರಸ್ತ ಮಹಿಳೆ ತುಳಸಿ ಆರೋಪಿಸಿದ್ದಾರೆ.

ಇದನ್ನೂ ಓದಿ: ಬಾಣಂತಿ ಸಾವು, ನಾಲ್ಕು ದಿನದ ಕಂದಮ್ಮ ಅನಾಥ.. ಮೆಗ್ಗಾನ್ ಆಸ್ಪತ್ರೆ ಸಿಬ್ಬಂದಿ ವಿರುದ್ಧ ನಿರ್ಲಕ್ಷ್ಯ ಆರೋಪ

ವೈದ್ಯರ ವಾದವೇನು?: ಬ್ಯಾಂಡೇಜ್ ಬಿಚ್ಚುವ ವೇಳೆ ಡ್ರೆಸ್ಸಿಂಗ್​​ಗೆ ಬಳಸುತ್ತಿದ್ದ ಬ್ಲೇಡ್ ಒಳಗೆ ಇಡಲಾಗಿತ್ತು ಎಂದು ಸಂತ್ರಸ್ತೆಯ ಸಂಬಂಧಿಕರು ತಪ್ಪಾಗಿ ಭಾವಿಸಿದ್ದಾರೆ ಎಂದು ಆಸ್ಪತ್ರೆ ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ. ಕೈಗೆ ವಿಷ ಸೇರಿದ ಪರಿಣಾಮ ಆಪರೇಷನ್ ಮಾಡಿ ಶುಚಿಗೊಳಿಸಲಾಗಿದೆ. ಅದು ಕಡಿಮೆಯಾಗಲು ಸ್ಪಲ್ಪ ಸಮಯ ಬೇಕು. ಕೈ ತೆಗೆಯುವ ಅಗತ್ಯವಿಲ್ಲ. ಹೊಸದಾಗಿ ಬಂದ ನರ್ಸಿಂಗ್ ಸಿಬ್ಬಂದಿ ಅಜ್ಞಾನದಿಂದ ಏನೋ ಹೇಳಿದ್ದರಿಂದ ಸಂತ್ರಸ್ತರು ಕಂಗಾಲಾಗಿದ್ದಾರ ಅಷ್ಟೇ. ಒಂದು ವೇಳೆ ಅಗತ್ಯವಿದ್ದರೆ ಅವರ ಕೈಗೆ ಪ್ಲಾಸ್ಟಿಕ್ ಸರ್ಜರಿ ಮಾಡಲಾಗುವುದು ಎಂದು ವೈದ್ಯರು ಧೈರ್ಯ ತುಂಬಿದ್ದಾರೆ ಎಂದು ತಿಳಿದು ಬಂದಿದೆ.

ಇದನ್ನೂ ಓದಿ: ವಿಜಯಪುರ ಜಿಲ್ಲಾಸ್ಪತ್ರೆಯಲ್ಲಿ ಬಾಣಂತಿಯರಿಗೆ ಸಂಕಷ್ಟ.. ಆಪರೇಷನ್​ ಹೊಲಿಗೆ ಕಳಚಿ ನರಳಾಟ