ಚೆನ್ನೈ (ತಮಿಳುನಾಡು) : ಶಾಲೆಯಿಂದ ವಾಪಸಾಗುತ್ತಿದ್ದ ಒಂಬತ್ತು ವರ್ಷದ ಬಾಲಕಿಯೊಬ್ಬಳ ಮೇಲೆ ಹಸುಗಳು ಮನಬಂದಂತೆ ದಾಳಿ ಮಾಡಿವೆ. ದಾಳಿ ಮಾಡಿರುವ ವಿಡಿಯೋ ಭಯಾನಕವಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಘಟನೆ ಚೆನ್ನೈನ ಎಂಎಂಡಿಎ ಕಾಲೋನಿಯ ಅರುಂಬಕ್ಕಂನಲ್ಲಿ ಬುಧವಾರ ನಡೆದಿದ್ದು, ಬಾಲಕಿ ತೀವ್ರವಾಗಿ ಗಾಯಗೊಂಡಿದ್ದಾಳೆ.
ಚೂಲೈಮೇಡು ನಿವಾಸಿ ಜಾಫರ್ ಸಿದ್ದಿಕ್ ಅಲಿ ಮತ್ತು ಹರ್ಸಿನ್ ಬಾನು ದಂಪತಿಯ ಪುತ್ರಿ ಆಯೇಷಾ ಗಾಯಗೊಂಡ ಬಾಲಕಿ. ತಾಯಿ ಹರ್ಸಿನ್ ಬಾನು ತನ್ನ ಮಕ್ಕಳಾದ ಆಯೇಷಾ ಹಾಗೂ ಉಮ್ಮರ್ನನ್ನು ಎಂದಿನಂತೆ ಶಾಲೆಯಿಂದ ಮನೆಗೆ ಕರೆದುಕೊಂಡು ಬರುತ್ತಿದ್ದರು. ಎಂಎಂಡಿಎ ಕಾಲೋನಿಯಲ್ಲಿ ಮೂವರು ತಮ್ಮಷ್ಟಕ್ಕೆ ತಾವು ತೆರಳುತ್ತಿದ್ದಾಗ ಇದ್ದಕ್ಕಿದ್ದಂತೆ ಹಸುಗಳು ಮಕ್ಕಳ ಮೇಲೆ ದಾಳಿ ಮಾಡಿವೆ. ದಾಳಿ ವೇಳೆ ಒಟ್ಟು ಏಳು ಹಸುಗಳಿದ್ದು, ಒಂದು ಹಸು ಮಾತ್ರ ಮನಬಂದಂತೆ ದಾಳಿ ಮಾಡಿದೆ.
ಪುತ್ರ ಉಮ್ಮರ್ ಹಸುಗಳ ದಾಳಿಯಿಂದ ಪಾರಾದರೆ, ಪುತ್ರಿ ಆಯೇಷಾಳನ್ನು ಹಸುವೊಂದು ತನ್ನ ಕೊಂಬುಗಳಿಂದ ಎತ್ತಿ ರಸ್ತೆಯ ಬದಿಗೆ ಎಸೆದಿದೆ. ತಾಯಿ ಸೇರಿದಂತೆ ಸ್ಥಳದಲ್ಲಿದ್ದವರೆಲ್ಲ ಎಷ್ಟೇ ಬೆದರಿಸಿ ಓಡಿಸಿದರೂ ಪುನಃ ಬಂದ ಹಸು, ತನ್ನೆಲ್ಲ ಶಕ್ತಿ ಪ್ರಯೋಗಿಸಿ ಕೊಂಬಿನಿಂದ ಬಾಲಕಿಯನ್ನು ಮತ್ತೆ ನೆಲಕ್ಕೆ ಹಾಕಿ ಗುದ್ದಿದೆ. ಬಾಲಕಿಯ ಚೀರಾಟ ಕೇಳಿ ಓಡಿ ಬಂದ ಮತ್ತಷ್ಟು ಜನ, ಹಸುಗಳಿಗೆ ಕಲ್ಲು ಹಾಗೂ ಕಟ್ಟಿಗೆಯಿಂದ ಹೊಡೆದು ಓಡಿಸಿದ್ದಾರೆ. ಬಾಲಕಿ ತೀವ್ರವಾಗಿ ಗಾಯಗೊಂಡಿದ್ದು ಆಕೆಯನ್ನು ಖಾಸಗಿ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ದಾಖಲಿಸಲಾಗಿದೆ. ಘಟನೆ ಸಂಬಂಧ ಬಾಲಕಿಯ ತಾಯಿ ನೀಡಿದ ದೂರಿನ ಆಧಾರದ ಮೇಲೆ ಅರುಂಬಕ್ಕಂ ಪೊಲೀಸರು ಹಸುಗಳ ಮಾಲೀಕ ವಿವೇಕ್ (ವಯಸ್ಸು 29) ಎಂಬಾತನ ವಿರುದ್ಧ ಪ್ರಕರಣ ದಾಖಲು ಮಾಡಿಕೊಂಡು ಹೆಚ್ಚಿ ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: ಮೈಸೂರಿನಲ್ಲಿ ವೃದ್ಧೆಯ ಮೇಲೆ ಗೂಳಿ ದಾಳಿ.. ಭಯಾನಕ ದೃಶ್ಯ ಸಿಸಿಟಿವಿಯಲ್ಲಿ ಸೆರೆ
ವೃದ್ಧೆಯ ಮೇಲೆ ಗೂಳಿ ದಾಳಿ: ಇತ್ತೀಚೆಗೆ ಕರ್ನಾಟಕದ ಮೈಸೂರಿನಲ್ಲಿಯೂ ಇಂತಹದ್ದೇ ಘಟನೆಯೊಂದು ನಡೆದಿತ್ತು. ನಗರದ ಸರಸ್ವತಿಪುರಂನ ಪಾರ್ಕ್ ಬಳಿ ತನ್ನಷ್ಟಕ್ಕೆ ತಾನು ನಡೆದುಹೋಗುತ್ತಿದ್ದ ಮಂಜುಳಾ (64) ಎಂಬ ವೃದ್ಧೆ ಮೇಲೆ ಗೂಳಿಯೊಂದು ದಾಳಿ ಮಾಡಿತ್ತು. ದಾಳಿಯಿಂದ ಗಾಯಗೊಂಡಿದ್ದ ಅವರನ್ನು ತಕ್ಷಣ ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿತ್ತು. ಗೂಳಿ ಗುದ್ದಿದ ರಭಸಕ್ಕೆ ವೃದ್ಧೆ ನೆಲಕ್ಕೆ ಬಿದ್ದಿದ್ದರು. ಗೂಳಿ ದಾಳಿ ನಡೆಸಿರುವ ದೃಶ್ಯ ಪಾರ್ಕ್ ಮುಂಭಾಗದಲ್ಲಿರುವ ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು.
ಮೈಸೂರು ನಗರದಲ್ಲಿ ಬೀದಿನಾಯಿಗಳ ಕಾಟ ಒಂದೆಡೆಯಾದರೆ, ಬೀದಿ ದನಗಳ ಹಾವಳಿಯೂ ಹೆಚ್ಚಾಗಿದೆ. ನಗರದ ಪ್ರಮುಖ ರಸ್ತೆಗಳಲ್ಲಿ ನಾಯಿ ಮತ್ತು ದನಗಳ ಅಡ್ಡಾದಿಡ್ಡಿ ಓಡಾಡುವುದು ಮತ್ತು ರಸ್ತೆ ಮಧ್ಯದಲ್ಲೇ ಮಲಗುವುದು ಸಾಮಾನ್ಯವಾಗಿದೆ. ಇದರಿಂದಾಗಿ ದ್ವಿಚಕ್ರ ಹಾಗೂ ಇತರ ವಾಹನಗಳ ಸಂಚಾರ ಕಷ್ಟಕರವಾಗಿದೆ. ಈ ಸಂಬಂಧ ಕೂಡಲೇ ಪಾಲಿಕೆ ಅಧಿಕಾರಿಗಳು ಬೀದಿ ನಾಯಿ ಮತ್ತು ಬೀದಿ ದನಗಳ ಹಾವಳಿಯನ್ನು ತಪ್ಪಿಸಬೇಕೆಂದು ಸಾರ್ವಜನಿಕರು ಒತ್ತಾಯ ಮಾಡಿದ್ದರು.
ಇದನ್ನೂ ಓದಿ: ನಡು ರಸ್ತೆಯಲ್ಲೇ ಗುಂಡಿನ ದಾಳಿ - ಯುವಕ ಸಾವು: ಸಿಸಿಟಿವಿಯಲ್ಲಿ ದೃಶ್ಯ ಸೆರೆ
