ಚೆನ್ನೈ: ಎಂಬಿಬಿಎಸ್ ಮುಗಿಸಿದ್ದ ತೃತೀಯ ಲಿಂಗಿ ಯುವತಿಯೊಬ್ಬಳು ಡಾಕ್ಟರ್ ಆಗುವ ಬದಲು ಭಿಕ್ಷುಕಿಯಾದ ದಾರುಣ ಘಟನೆ ತಮಿಳುನಾಡಿನ ಮಧುರೈನಲ್ಲಿ ಬೆಳಕಿಗೆ ಬಂದಿದೆ.
ಮಧುರೈ ತಿಲಗರ್ ತಿಡಾಲ್ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಕವಿತಾ ಅದೊಂದು ದಿನ ಗಸ್ತು ತಿರುಗುತ್ತಿದ್ದ ವೇಳೆ ಪೆರಿಯಾರ್ ಬಸ್ ನಿಲ್ದಾಣದಲ್ಲಿ ಭಿಕ್ಷೆ ಬೇಡುತ್ತಿದ್ದ ತೃತೀಯಲಿಂಗಿ ಯುವತಿಯೊಬ್ಬಳು ಕಣ್ಣಿಗೆ ಬಿದ್ದಳು. ಅವಳ ಬಳಿ ಹೋಗಿ ಆಕೆ ಮಾತನಾಡಿಸಿದ ಇನ್ಸ್ಪೆಕ್ಟರ್ ಕವಿತಾ , ಅವಳ ಬಗ್ಗೆ ವಿಚಾರಿಸಿದ್ರು.
ಆ ಯುವತಿ ಹೇಳಿದ ಸತ್ಯ ಕೇಳಿ ಒಂದು ಕ್ಷಣ ಇನ್ಸ್ಪೆಕ್ಟರ್ ಕವಿತಾ ಅವರಿಗೆ ಶಾಕ್ ಆಯ್ತು. ಯಾಕಂದ್ರೆ ಆ ಹುಡುಗಿ ಓದಿದ್ದು ಎಂಬಿಬಿಎಸ್. ಟ್ರಾನ್ಸ್ಜೆಂಡರ್ ಪ್ರಮಾಣಪತ್ರ ಪಡೆಯಲು ಅಲೆದು ಅಲೆದು ಸುಸ್ತಾಗಿ ಹೋಗಿದ್ದಳು. ಇತ್ತ ಸಮಾಜ ಕೂಡ ಆಕೆಗೆ ಮಾನ್ಯತೆ ನೀಡದೇ ತುಚ್ಛವಾಗಿ ಕಂಡಿತು. ಕೊನೆಗೆ ಬೇರೆ ದಾರಿ ಕಾಣದೇ ಜೀವನ ನಡೆಸಲು ಭಿಕ್ಷೆ ಬೇಡಬೇಕಾಯಿತು ಎಂದು ವಿವರಿಸಿದಳು. ನಂತರ ಇನ್ಸ್ಪೆಕ್ಟರ್ ಕವಿತಾ ಆಕೆಯ ಪದವಿ ಪ್ರಮಾಣ ಪತ್ರ ಪಡೆದು ಪರಿಶೀಲನೆ ನಡೆಸಿದ್ರು,
ತಕ್ಷಣವೇ ಈ ವಿಷಯವನ್ನು ಉನ್ನತ ಪೊಲೀಸ್ ಅಧಿಕಾರಿಗಳಿಗೆ ತಿಳಿಸಿದ್ರು. ಆಕೆಗೆ ಕ್ಲಿನಿಕ್ ಒಂದನ್ನು ತೆರೆಯಲು ವ್ಯವಸ್ಥೆ ಮಾಡಿಕೊಟ್ರು. ಅಗತ್ಯ ವೈದ್ಯಕೀಯ ಉಪಕರಣಗಳನ್ನು ಖರೀದಿಸಿ ಕೊಟ್ಟರು. ಸದ್ಯದಲ್ಲೇ ಕ್ಲಿನಿಕ್ ತೆರೆಯಲಿದ್ದು,ಈ ತೃತೀಯಲಿಂಗಿ ಯುವತಿ ತನ್ನ ಆಸೆಯಂತೆ ಸ್ವೆತಾಸ್ಕೋಪ್ ಹಾಕಿಕೊಂಡು ಡಾಕ್ಟರ್ ಆಗಲಿದ್ದಾಳೆ. ತೃತೀಯ ಲಿಂಗಿಗಳಿಗೆ ಬೆಲೆ ಕೊಡದ ಸಮಾಜದ ಮಧ್ಯೆ, ಈಕೆಯ ಕಷ್ಟವನ್ನು ಅರಿತು ಡಾಕ್ಟರ್ ಆಗಲು ಅನುವು ಮಾಡಿಕೊಟ್ಟ ಇನ್ಸ್ಪೆಕ್ಟರ್ ಕವಿತಾಗೆ ಅಭಿನಂದನೆಗಳ ಮಹಾಪೂರವೇ ಹರಿದು ಬಂದಿದೆ.
