ಥಾಣೆಯ ಚರಂಡಿಯಲ್ಲಿ ಸಿಕ್ಕಿ ಒದ್ದಾಡುತ್ತಿದ್ದ ಮಗುವಿಗೆ ಹೊಸ ಬಾಳು ನೀಡಿದ ಇಟಲಿ ದಂಪತಿ

ನಾಲ್ಕು ವರ್ಷಗಳ ಹಿಂದೆ ಥಾಣೆಯ ವಡೋಲ್‌ಗಾಂವ್‌ ಗ್ರಾಮದ ಚರಂಡಿಯಲ್ಲಿ ಪತ್ತೆಯಾದ ನವಜಾತ ಗಂಡು ಶಿಶುವನ್ನು ಇಟಲಿ ಮೂಲದ ದಂಪತಿ ದತ್ತು ಪಡೆದಿದ್ದಾರೆ.

ಥಾಣೆ (ಮಹಾರಾಷ್ಟ್ರ): ಡಿಸೆಂಬರ್ 30, 2018 ರಂದು ಮಹಾರಾಷ್ಟ್ರದ ಥಾಣೆ ಪ್ರದೇಶದ ಉಲ್ಲಾಸ್‌ನಗರ ವ್ಯಾಪ್ತಿಯ ವಡೋಲ್‌ಗಾಂವ್ ಗ್ರಾಮದ ಚರಂಡಿಯಲ್ಲಿ ನವಜಾತ ಶಿಶುವೊಂದು ಪತ್ತೆಯಾಗಿತ್ತು. ಅಂದು ಮಗು ಅಳುವ ಕೂಗು ಕೇಳಿದ ಸ್ಥಳೀಯರು ಕೂಡಲೇ ಸಾಮಾಜಿಕ ಕಾರ್ಯಕರ್ತರು ಅಶೋಕ ಫೌಂಡೇಶನ್‌ನ ಶಿವಾಜಿ ರಗಡೆ ಎಂಬುವರಿಗೆ ಮಾಹಿತಿ ನೀಡಿ, ಚರಂಡಿಯಿಂದ ಶಿಶುವನ್ನು ಹೊರತೆಗೆದಿದ್ದರು. ತಲೆ ಸೋಂಕಿನಿಂದ ಬಳಲುತ್ತಿದ್ದ ಗಂಡು ಮಗು ಸಾವನ್ನು ಧಿಕ್ಕರಿಸಿ ಬದುಕುಳಿದಿದ್ದರಿಂದ 'ಟೈಗರ್' ಎಂದು ನಾಮಕರಣ ಮಾಡಲಾಗಿತ್ತು. ಇದೀಗ ಇಟಲಿ ದಂಪತಿ ಪುಟ್ಟ ಕಂದನನ್ನು ದತ್ತು ಪಡೆಯುವ ಮೂಲಕ ನೆಲೆ ಒದಗಿಸಿದ್ದಾರೆ.

ನಿಧಿ ಸಂಗ್ರಹಿಸಿ ಶಸ್ತ್ರಚಿಕಿತ್ಸೆ: 2018ರಲ್ಲಿ ಚರಂಡಿಯಲ್ಲಿ ಸಿಕ್ಕ ಮಗುವನ್ನು ಕೂಡಲೇ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಈ ವೇಳೆ ಅಶೋಕ ಫೌಂಡೇಶನ್ ಚಿಕಿತ್ಸಾ ವೆಚ್ಚ ನೋಡಿಕೊಂಡಿತ್ತು. ಆದರೆ ತಲೆಯ ಸೋಂಕು ಗುಣಮುಖವಾಗಿರಲಿಲ್ಲ. ಹಾಗಾಗಿ, ಹೆಚ್ಚು ಹಣ ಖರ್ಚಾಗುವುದರಿಂದ ಅಂದಿನ ಶಾಸಕ ಜ್ಯೋತಿ ಕಲಾನಿ ಅವರನ್ನು ಶಿವಾಜಿ ರಗಡೆ ಭೇಟಿ ಮಾಡಿ ಸಹಾಯ ಮಾಡುವಂತೆ ಮನವಿ ಮಾಡಿದ್ದರು. ಬಳಿಕ ಶಾಸಕರು ವಾಡಿಯಾ ಆಸ್ಪತ್ರೆಯನ್ನು ಸಂಪರ್ಕಿಸಿ, ಮಗುವಿನ ಚಿಕಿತ್ಸೆಗೆ ಕೈಲಾದ ಸಹಾಯ ಮಾಡಿದ್ದರು.

ಇದೇ ವೇಳೆ ಹೆಚ್ಚಿನ ಹಣ ಸಂಗ್ರಹಿಸಲು ಶಿವಾಜಿ ರಗಡೆ ಅವರು ಕೆಟೊ ಎಂಬ ಎನ್‌ಜಿಒದೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿದರು. ಬಳಿಕ, ವಾಡಿಯಾ ಆಸ್ಪತ್ರೆಯ ಹೆಸರಿನಲ್ಲಿ ಖಾತೆ ತೆರೆದು 24 ಗಂಟೆಗಳಲ್ಲಿ 10.42 ಲಕ್ಷಕ್ಕೂ ಅಧಿಕ ಹಣ ಸಂಗ್ರಹಿಸಿ, ಮಗುವಿಗೆ ಶಸ್ತ್ರಚಿಕಿತ್ಸೆ ಮಾಡಲಾಗಿತ್ತು. ಸುಮಾರು 4 ತಿಂಗಳ ಚಿಕಿತ್ಸೆಯ ನಂತರ ಟೈಗರ್​ನನ್ನು ಏಪ್ರಿಲ್ 5, 2019 ರಂದು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿತ್ತು. ಬಳಿಕ ಮಹಿಳಾ ಬಾಲಕಲ್ಯಾಣ ಸಮಿತಿಯ ಆದೇಶದಂತೆ ರಗಡೆ ದಂಪತಿ ಹಾಗೂ ಪೊಲೀಸರು ಆತನನ್ನು ನವಿ ಮುಂಬೈನ ನೆರೂಲ್‌ನಲ್ಲಿರುವ ವಿಶ್ವ ಬಾಲಕ ಕೇಂದ್ರಕ್ಕೆ ದಾಖಲಿಸಿದ್ದರು. ಕೋರಿಕೆಯ ಮೇರೆಗೆ ವಾರಕ್ಕೊಮ್ಮೆ ಮಗುವನ್ನು ಭೇಟಿ ಮಾಡಲು ರಗಡೆ ದಂಪತಿಗೆ ಅಧಿಕೃತ ಅನುಮತಿ ನೀಡಲಾಗಿತ್ತು.

ಇದನ್ನೂ ಓದಿ: ನವಜಾತ ಶಿಶು ಆಸ್ಪತ್ರೆಯಿಂದ ಕದ್ದೊಯ್ದ ಯುವಕ.. ಸಿಸಿಟಿವಿಯಲ್ಲಿ ದೃಶ್ಯ ಸೆರೆ

ಇದೀಗ ಮಗು ಸಂಪೂರ್ಣವಾಗಿ ಗುಣಮುಖನಾಗಿ ಬೆಳೆದಿದ್ದು, ದತ್ತು ಸ್ವೀಕಾರ ಪ್ರಕ್ರಿಯೆ ನಡೆಸಲಾಗಿದೆ. ಈ ವೇಳೆ ಇಟಲಿಯಲ್ಲಿರುವ ದಂಪತಿ ಟೈಗರ್​ನನ್ನು ದತ್ತು ತೆಗೆದುಕೊಳ್ಳಲು ಮುಂದೆ ಬಂದಿದ್ದು, ಕಾನೂನು ಪ್ರಕ್ರಿಯೆ ಪೂರ್ಣಗೊಳಿಸಲಾಗಿದೆ. ಫೆಬ್ರವರಿ 17ರ ಶುಕ್ರವಾರ ಮಗು ಇಟಲಿಗೆ ಪ್ರಯಾಣಿಸಿದೆ.

ಇದನ್ನೂ ಓದಿ: ನವಜಾತ ಶಿಶುವಿನ ನಾಲಗೆಯ ಬುಡದಲ್ಲಿ ಸಿಸ್ಟ್: ಮಂಗಳೂರಿನ ವೈದ್ಯರಿಂದ ಶಸ್ತ್ರಚಿಕಿತ್ಸೆ

ವಿಶ್ವ ಬಾಲಕ ಕೇಂದ್ರವು ಮಗುವಿನ ಜೀವ ಉಳಿಸಿದ ಶಿವಾಜಿ ರಗಡೆ ಮತ್ತು ಅವರ ಪತ್ನಿ ಜಯಶ್ರೀ ರಗಡೆ ಅವರಿಗೆ ಕೊನೆಯ ಬಾರಿಗೆ ಟೈಗರ್‌ ಮತ್ತು ಆತನ ಹೊಸ ಪೋಷಕರನ್ನು ಭೇಟಿಯಾಗಲು ಆಹ್ವಾನಿಸಿತ್ತು. ಈ ವೇಳೆ ದಂಪತಿ ಭಾವನಾತ್ಮಕವಾಗಿದ್ದು, ಹೊಸ ತಾಯಿಯ ಕಣ್ಣಲ್ಲಿ ಸಹ ನೀರು ತುಂಬಿತ್ತು. ಬಳಿಕ ಮಾತನಾಡಿದ ರಗಡೆ ದಂಪತಿ,"ಈ ಹಿಂದೆ ನಾವು ಅವನಿಗೆ ಏನು ಮಾಡಬಹುದೋ ಅದನ್ನು ಮಾಡಿದ್ದೇವೆ. ಆದರೆ, ಈಗ ಟೈಗರ್​ಗೆ ಉತ್ತಮವಾದ ತಂದೆ,ತಾಯಿ ಸಿಕ್ಕಿದ್ದಾರೆ. ಚರಂಡಿಯಲ್ಲಿ ಸಿಕ್ಕಿ ಕಷ್ಟ ಪಡುತ್ತಿದ್ದ ಮಗು ಇದೀಗ ದತ್ತು ಪಡೆದ ತಂದೆ-ತಾಯಿಯೊಂದಿಗೆ ಹೊಸ ಸುಖಮಯ ಜೀವನ ನಡೆಸಲಿ" ಎಂದು ಹಾರೈಸಿದರು.