ರಾಜಮಹೇಂದ್ರವರಂ: ಹಲವಾರು ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿರುವ ಪ್ರಸಿದ್ಧ ರಾಮೋಜಿ ಫೌಂಡೇಶನ್ ತನ್ನ ಸಹಾಯಹಸ್ತವನ್ನು ಮುಂದುವರಿಸಿದೆ. ಡಾ.ಬಿ.ಆರ್. ಅಂಬೇಡ್ಕರ್ ಕೋನಸೀಮ ಜಿಲ್ಲೆಯ ಮಲಿಕಿಪುರಂ ಮಂಡಲದ ಲಕ್ಕವರಂನಲ್ಲಿರುವ ಶ್ರೀ ಸರಸ್ವತಿ ಶಿಶುಮಂದಿರ ಪ್ರೌಢಶಾಲೆಯಲ್ಲಿ ವಿಜ್ಞಾನ ಮತ್ತು ಕಂಪ್ಯೂಟರ್ ಲ್ಯಾಬ್ ಸ್ಥಾಪನೆಗೆ 10 ಲಕ್ಷ ರೂಪಾಯಿ ನೆರವು ನೀಡಿದೆ. ರಾಜಮಹೇಂದ್ರವರಂನಲ್ಲಿರುವ ‘ಈನಾಡು’ ಕಚೇರಿಯಲ್ಲಿ ಪ್ರಭಾರಿಯಾಗಿರುವ ಟಿ.ವಿ.ಚಂದ್ರಶೇಖರಪ್ರಸಾದ್ ಅವರು ಶಿಶು ಮಂದಿರದ ಸಂಘಟಕರಿಗೆ ಚೆಕ್ ಅನ್ನು ಶುಕ್ರವಾರ ಹಸ್ತಾಂತರಿಸಿದರು. ಚೆಕ್ ಜೊತೆಗೆ ರಾಮೋಜಿ ಸಂಸ್ಥೆ ಮತ್ತು ಪ್ರತಿಷ್ಠಾನದ ಅಧ್ಯಕ್ಷ ರಾಮೋಜಿ ರಾವ್ ಬರೆದಿರುವ ಪತ್ರವನ್ನು ಕೂಡ ಇದೇ ವೇಳೆ ನೀಡಲಾಯಿತು.
ಲಕ್ಕವರಂ ಹಾಗೂ ಸುತ್ತಮುತ್ತಲಿನ ಏಳೆಂಟು ಗ್ರಾಮಗಳ ಅನಾಥ ಮಕ್ಕಳಿಗೆ ಶ್ರೀ ಸರಸ್ವತಿ ಶಿಶುಮಂದಿರ ಶಿಕ್ಷಣ ನೀಡುತ್ತಿದೆ. ಇದು ಮೂರೂವರೆ ದಶಕಗಳಿಗೂ ಹೆಚ್ಚು ಕಾಲದಿಂದ ಅವಿರತ ಸೇವೆ ಮಾಡುತ್ತಿದೆ. ಈ ಪ್ರಯತ್ನ ಶ್ಲಾಘನೀಯ. ಇಲ್ಲಿ 400 ವಿದ್ಯಾರ್ಥಿಗಳು ಓದುತ್ತಿದ್ದಾರೆ ಎಂದು ತಿಳಿದು ಖುಷಿಯಾಯಿತು. ಕಾಲಕ್ಕೆ ತಕ್ಕಂತೆ ವಿದ್ಯಾರ್ಥಿಗಳ ಸರ್ವತೋಮುಖ ಅಭಿವೃದ್ಧಿಗಾಗಿ ನಿಮ್ಮ ಸೇವೆಗಳನ್ನು ವಿಸ್ತರಿಸಬೇಕು. ಶಿಶು ಮಂದಿರದಲ್ಲಿ ಗ್ರಾಮೀಣ ಬಡ ವಿದ್ಯಾರ್ಥಿಗಳಿಗೆ ವಿಜ್ಞಾನ ಮತ್ತು ಕಂಪ್ಯೂಟರ್ ಲ್ಯಾಬ್ ಅನ್ನು ಸ್ಥಾಪಿಸುವ ನಿಮ್ಮ ಆಲೋಚನೆಯನ್ನು ನಾನು ಸ್ವಾಗತಿಸುತ್ತೇನೆ. ಹೀಗಾಗಿ ಫೌಂಡೇಶನ್ಗೆ 10 ರೂಪಾಯಿಗಳನ್ನು ನೀಡಲು ನನಗೆ ತುಂಬಾ ಸಂತೋಷವಾಗಿದೆ ಎಂದು ರಾಮೋಜಿ ರಾವ್ ಅವರು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.
ಚೆಕ್ ಪಡೆದ ಫೌಂಡೇಶನ್ನ ಪೂರ್ವ ಗೋದಾವರಿ ಜಿಲ್ಲಾಧ್ಯಕ್ಷ ಮಂಗೇನ ವೆಂಕಟ ನರಸಿಂಹರಾವ್ ಅವರು ಮಾತನಾಡಿ, 'ಶ್ರೀ ಸರಸ್ವತಿ ಶಿಶು ಮಂದಿರದಲ್ಲಿ ವಿಜ್ಞಾನ ಮತ್ತು ಕಂಪ್ಯೂಟರ್ ಲ್ಯಾಬ್ ಸ್ಥಾಪನೆಗೆ ಬೆಂಬಲ ಬೇಕು ಎಂದು ರಾಮೋಜಿ ಫೌಂಡೇಶನ್ ಅಧ್ಯಕ್ಷ ರಾಮೋಜಿ ರಾವ್ ಅವರಿಗೆ ಪತ್ರ ಬರೆಯಲಾಗಿತ್ತು.
ಅವರು ಸಮಚಿತ್ತದಿಂದ ಪ್ರತಿಕ್ರಿಯಿಸಿ ಸಹಾಯಹಸ್ತ ನೀಡಿದ್ದಾರೆ. 10 ಲಕ್ಷ ರೂ.ಗಳನ್ನು ನಮ್ಮ ಸಂಸ್ಥೆಗೆ ನೀಡಿದ್ದಾರೆ. ಎಲ್ಲರಿಗೂ ಸ್ಫೂರ್ತಿಯಾಗಿರುವ ರಾಮೋಜಿ ರಾವ್ ಅವರು ನೀಡಿದ ಈ ದೇಣಿಗೆಯಿಂದ ಬಡ ಮಕ್ಕಳಿಗಾಗಿ ಲ್ಯಾಬ್ ಸ್ಥಾಪಿಸಲಾಗುವುದು. ಉತ್ತಮ ಶಿಕ್ಷಣ ಪಡೆದುಕೊಳ್ಳು ಸಾಧ್ಯವಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಪ್ರವಾಹ ಪೀಡಿತರಿಗೆ ನೆರವು: 2018 ರಲ್ಲಿ ಕೇರಳದಲ್ಲಿ ಭೀಕರ ಪ್ರವಾಹ ಉಂಟಾಗಿ, ಮನೆ ಕಳೆದುಕೊಂಡ ನಿರಾಶ್ರಿತರಿಗೆ ರಾಮೋಜಿ ರಾವ್ ಸಮೂಹ ವಿಶೇಷ ಆಸಕ್ತಿ ಮತ್ತು ಕಾಳಜಿ ವಹಿಸಿದ ಅಲಪ್ಪುಜದಲ್ಲಿ 121 ಪ್ರವಾಹಪೀಡಿತ ಕುಟುಂಬಗಳಿಗೆ ಸುಸಜ್ಜಿತ ಮನೆಗಳನ್ನು ನಿರ್ಮಿಸಿಕೊಟ್ಟು ಸಂಕಷ್ಟದ ಕಾಲದಲ್ಲಿ ನೆರವು ನೀಡಿತ್ತು.
ಒಟ್ಟು ₹7 ಕೋಟಿ 77 ಲಕ್ಷ ರೂ. ವೆಚ್ಚದಲ್ಲಿ ಮೊದಲು 116 ಮನೆಗಳನ್ನು ಕಟ್ಟಲು ಪ್ಲಾನ್ ಮಾಡಲಾಗಿತ್ತು. ಕಾಮಗಾರಿಯ ಗುತ್ತಿಗೆ ಪಡೆದ ಸಂಸ್ಥೆಯು ಕಡಿಮೆ ವೆಚ್ಚದಲ್ಲಿ ಬೇಗನೆ ಮನೆ ನಿರ್ಮಿಸಲು ಯಶಸ್ವಿಯಾದ ಪರಿಣಾಮ, ಉಳಿದ ಮೊತ್ತದಲ್ಲಿ ಹೆಚ್ಚುವರಿ 5 ಮನೆಗಳನ್ನು ಕಟ್ಟಲಾಗಿದೆ. ಕುಡುಂಬಶ್ರೀ ಮತ್ತು 'ಐ ಆಮ್ ಫಾರ್ ಅಲೆಪ್ಪಿ' ಯೋಜನೆಯ ಸಹಕಾರದೊಂದಿಗೆ ಪ್ರತಿ ಮನೆಯನ್ನು 40 ದಿನಗಳ ಅವಧಿಯಲ್ಲಿ ನಿರ್ಮಿಸಲಾಗಿತ್ತು.
ಕುಡುಂಬಶ್ರೀ (ಮಹಿಳಾ ಸ್ವಸಹಾಯ ಗುಂಪುಗಳು) ಅಡಿಯಲ್ಲಿ ಕಾರ್ಯ ನಿರ್ವಹಿಸುವ ಮಹಿಳೆಯರೇ ಈ ಮನೆಗಳನ್ನು ನಿರ್ಮಿಸಿದ್ದು, ಅವರೆಲ್ಲರಿಗೂ ಈನಾಡು ಗ್ರೂಪ್ ವ್ಯವಸ್ಥಾಪಕ ನಿರ್ದೇಶಕ ಚೆರುಕುರಿ ಕಿರಣ್ ಧನ್ಯವಾದ ತಿಳಿಸಿದ್ದರು.
ರಾಮೋಜಿ ಸಂಸ್ಥೆ ನಿರ್ಮಿಸಿದ ಮನೆಗಳನ್ನು ಕೇರಳ ಸಿಎಂ ಪಿಣರಾಯಿ ವಿಜಯನ್ ಅವರು ಫಲಾನುಭವಿಗಳಿಗೆ ಹಸ್ತಾಂತರಿಸಿದ್ದರು. ಸಮಾರಂಭದಲ್ಲಿ ಈನಾಡು ಮ್ಯಾನೇಜಿಂಗ್ ಡೈರೆಕ್ಟರ್ ಸಿ.ಹೆಚ್‌.ಕಿರಣ್, ಮಾರ್ಗದರ್ಶಿ ಚಿಟ್ ಫಂಡ್ ಮ್ಯಾನೇಜಿಂಗ್ ಡೈರೆಕ್ಟರ್ ಶೈಲಜಾ ಕಿರಣ್, ಕೇರಳ ಹಣಕಾಸು ಸಚಿವ ಥಾಮಸ್ ಐಸಾಕ್, ಪಿಡಬ್ಲೂಡಿ ಸಚಿವ ಜಿ.ಸುಧಾಕರನ್, ಸಚಿವರು, ಶಾಸಕರು ಸೇರಿದಂತೆ ಗಣ್ಯರು ಹಾಜರಿದ್ದರು.
ಓದಿ: ಕೇರಳದಲ್ಲಿ ರಾಮೋಜಿ ಗ್ರೂಪ್ ಮಾನವೀಯ ಕಾರ್ಯ: 7.77 ಕೋಟಿ ವೆಚ್ಚದಲ್ಲಿ ಪ್ರವಾಹ ಸಂತ್ರಸ್ತರಿಗೆ ಮನೆಗಳ ಹಂಚಿಕೆ
