ಪಂಜಾಬ್​ನಲ್ಲಿ ರಾಜಕೀಯ ಅಸ್ಥಿರತೆ.. ಇಬ್ಬರು ಸಚಿವರ ರಾಜೀನಾಮೆ ಒಪ್ಪಿಕೊಳ್ಳದ 'ಕ್ಯಾಪ್ಟನ್'

ಪಂಜಾಬ್ ಪ್ರದೇಶ ಕಾಂಗ್ರೆಸ್ ಕಮಿಟಿಯ ಮುಖ್ಯಸ್ಥರಾದ ಸುನಿಲ್ ಜಾಕರ್ ಮತ್ತು ಕ್ಯಾಬಿನೆಟ್ ಸಚಿವ ಸುಖ್ವಿಂದರ್ ಸಿಂಗ್ ರಾಂಧಾವಾ ರಾಜೀನಾಮೆ ಸಲ್ಲಿಸಿದ್ದಾರೆ. ಈ ರಾಜೀನಾಮೆಯನ್ನು ಒಪ್ಪಿಕೊಳ್ಳಲು ಕ್ಯಾಪ್ಟನ್ ಅಮರೀಂದರ್ ಸಿಂಗ್ ನಿರಾಕರಿಸಿದ್ದಾರೆ.

ಚಂಡೀಗಢ(ಪಂಜಾಬ್): ಕೊರೊನಾ ಹಾವಳಿ ದೇಶವನ್ನೇ ಬೆಚ್ಚಿ ಬೀಳಿಸುತ್ತಿರುವ ಈ ವೇಳೆ ಪಂಜಾಬ್​ನಲ್ಲಿ ರಾಜಕೀಯ ಬಿಕ್ಕಟ್ಟು ಆರಂಭಕ್ಕೆ ಮುನ್ನುಡಿ ಶುರುವಾಗಿದೆ. ಕ್ಯಾಬಿನೆಟ್ ಸಭೆಯ ವೇಳೆ ಕೋಲಾಹಲ ನಡೆದಿದ್ದು, ಸಿಎಂ ಕ್ಯಾಪ್ಟನ್ ಅಮರೀಂದರ್ ಸಿಂಗ್ ಅವರನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ.

ಕೋಟ್ಕಾಪುರ ಫೈರಿಂಗ್ ಕೇಸ್ ಕೋಲಾಹಲಕ್ಕೆ ಕಾರಣವಾಗಿದ್ದು, ರಾಜ್ಯ ಹೈಕೋರ್ಟ್​​ ವಿಶೇಷ ತನಿಖಾ ದಳದ ವರದಿಯನ್ನು ತಳ್ಳಿ ಹಾಕಿದ ನಂತರ ಹೊಸ ಎಸ್​ಐಟಿಯನ್ನು ರಚಿಸಲು ಕ್ಯಾಬಿನೆಟ್​ನಲ್ಲಿ ಅನುಮತಿ ನೀಡಲಾಗಿದೆ.

ಈ ವಿಚಾರವಾಗಿ ಪಂಜಾಬ್ ಪ್ರದೇಶ ಕಾಂಗ್ರೆಸ್ ಕಮಿಟಿಯ ಮುಖ್ಯಸ್ಥರಾದ ಸುನಿಲ್ ಜಾಕರ್ ಮತ್ತು ಕ್ಯಾಬಿನೆಟ್ ಸಚಿವ ಸುಖ್ವಿಂದರ್ ಸಿಂಗ್ ರಾಂಧಾವಾ ರಾಜೀನಾಮೆ ಸಲ್ಲಿಸಿದ್ದು, ಈ ರಾಜೀನಾಮೆಯನ್ನು ಒಪ್ಪಿಕೊಳ್ಳಲು ಕ್ಯಾಪ್ಟನ್ ಅಮರೀಂದರ್ ಸಿಂಗ್ ನಿರಾಕರಿಸಿದ್ದಾರೆ.

ಪಂಜಾಬ್ ಮಾಜಿ ಐಜಿಪಿ ಕುನ್ವರ್ ವಿಜಯ್ ಪ್ರತಾಪ್ ನೇತೃತ್ವದ ಎಸ್‌ಐಟಿ ಕೋಟ್ಕಾಪುರ ಫೈರಿಂಗ್ ಕೇಸ್​ನ ತನಿಖೆ ನಡೆಸಿದ್ದು, ಈ ತನಿಖಾ ವರದಿಯನ್ನು ಹೈಕೋರ್ಟ್ ರದ್ದು ಮಾಡಿತ್ತು. ಈ ಬಗ್ಗೆ ಚರ್ಚಿಸುವ ಸಲುವಾಗಿ ಸಿಎಂ ಅಮರೀಂದರ್ ಸಿಂಗ್ ಸಭೆ ಕರೆದಿದ್ದರು.

ಈ ಸಭೆಯಲ್ಲಿ ಪಕ್ಷದ ಕೆಲವು ಸದಸ್ಯರಿಂದ ಸರ್ಕಾರದ ಟೀಕೆಗೆ ಸಿಎಂ ಬೇಸರ ವ್ಯಕ್ತಪಡಿಸಿದ್ದು, ಕೋಟ್ಕಾಪುರ ತನಿಖೆ ವಿಚಾರವಾಗಿ ಹೈಕೋರ್ಟ್ ತೀರ್ಪಿನ ವಿರುದ್ಧ ಸುಪ್ರೀಂ ಕೋರ್ಟ್​ಗೆ ಮೇಲ್ಮನವಿ ಸಲ್ಲಿಸುವುದಾಗಿ ಹೇಳಿದ್ದಾರೆ.