ಪುಣೆ: ಮಹಾರಾಷ್ಟ್ರದ ಪುಣೆ ಮೂಲದ ಶಾಂತಾಬಾಯಿ ಪವಾರ್ ಎಂಬ 85 ವರ್ಷದ ಅಜ್ಜಿ ರಸ್ತೆಗಿಳಿದು, ಸಮರ ಕಲೆ ಪ್ರದರ್ಶನ ಮಾಡ್ತಿದ್ದ ವಿಡಿಯೋ ವೈರಲ್ ಆಗಿತ್ತು. ಆ ವೇಳೆ ವಾರಿಯರ್ ಅಜ್ಜಿ ನೆರವಿಗೆ ಧಾವಿಸಿದ್ದ ನಟ ಸೋನು ಸೂದ್ ಸಹಾಯ ಮಾಡಿದ್ದರು.
ಇದೀಗ ಮತ್ತೊಮ್ಮೆ ರಸ್ತೆಗಿಳಿದು ವಾರಿಯರ್ ಅಜ್ಜಿ ಸಮರ ಕಲೆ ಪ್ರದರ್ಶನ ಮಾಡ್ತಿದ್ದಾರೆ. ಹೌದು, ಶಾಂತಾಬಾಯಿ ಪವಾರ್ ಅವರ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಅನೇಕರು ಆರ್ಥಿಕ ಸಹಾಯ ಮಾಡಿದ್ದರು. ಆದರೆ, ಇದೀಗ ಮತ್ತೆ ಹಣದ ಕೊರತೆ ಉಂಟಾಗಿರುವ ಕಾರಣ ಬೀದಿಗಿಳಿದು ಸಮರ ಕಲೆ ಪ್ರದರ್ಶನ ಮಾಡ್ತಿದ್ದಾರೆ.
ಪುಣೆಯ ವಿವಿಧ ರಸ್ತೆಗಳಲ್ಲಿ ದೊಣ್ಣೆ ವರಸೆ ಪ್ರದರ್ಶನ ಮಾಡುತ್ತಿರುವ ವಿಡಿಯೋ ಇದೀಗ ಮತ್ತೊಮ್ಮೆ ವೈರಲ್ ಆಗಿವೆ. ಈ ಹಿಂದೆ ಆಕೆಗೆ ಸಿಕ್ಕಿರುವ ಹಣದಿಂದ ಸಂಬಂಧಿಕರ ಸಾಲ ಮರುಪಾವತಿ ಮಾಡಿದ್ದು, ಕೆಲ ಸಂಬಂಧಿಕರು ಹಣ ಪಡೆದು ಖರ್ಚು ಮಾಡಿದ್ದಾರೆ ಎಂದು ತಿಳಿಸಿದ್ದಾಳೆ. ಬ್ಯಾಂಕ್ ಬ್ಯಾಲೆನ್ಸ್ ಖಾಲಿಯಾಗಿರುವ ಕಾರಣ ಅಜ್ಜಿ ಮತ್ತೆ ಬೀದಿಗಳಲ್ಲಿ ಪ್ರದರ್ಶನ ಮಾಡ್ತಿದ್ದಾರೆ.
ಸುಮಾರು 12ರಿಂದ 13 ಮೊಮ್ಮಕ್ಕಳ ಜವಾಬ್ದಾರಿ ತನ್ನ ಮೇಲಿರುವ ಕಾರಣ ಇದೀಗ ಈ ಕೆಲಸ ಪುನರ ಆರಂಭಿಸಿದ್ದೇನೆ ಎಂದಿರುವ ಅಜ್ಜಿ, ಸಾಧ್ಯವಾದಷ್ಟು ಸಹಾಯ ನೀಡುವಂತೆ ವಿನಂತಿ ಮಾಡಿದ್ದಾರೆ.
