ನವಾಡ (ಬಿಹಾರ): ಜೀವನದಲ್ಲಿ ಏನನ್ನಾದರೂ ಸಾಧಿಸಬೇಕೆಂಬ ಬಯಕೆ, ಹಂಬಲ ಇದ್ದರೆ, ನಮ್ಮ ಹಾದಿಯಲ್ಲಿ ಯಾವುದೇ ತೊಂದರೆಗಳು ಬಂದರೂ ಅಡ್ಡಿಯಾಗುವುದಿಲ್ಲ. ಈಗಾಗಲೇ ಅಂತಹ ಅನೇಕ ಉದಾಹರಣೆಗಳು ನಮ್ಮ ಕಣ್ಮುಂದೆ ಇದೆ. ಇವೆಲ್ಲದರ ಮಧ್ಯೆ ಇದೀಗ ಬಿಹಾರದ ನವಾಡ್ನಲ್ಲೂ ಅಂತಹ ಘಟನೆ ನಡೆದಿದ್ದು, ಬಡ ಕುಟುಂಬದಲ್ಲಿ ಬೆಳೆದ ಸಹೋದರಿಯರಾದ ಪೂಜಾ, ಪ್ರಿಯಾ ಇದೀಗ ಇನ್ಸ್ಪೆಕ್ಟರ್ ಆಗಿ ಆಯ್ಕೆಯಾಗಿದ್ದಾರೆ.
ಬಿಹಾರದ ಇನ್ಸ್ಪೆಕ್ಟರ್ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದು, ಕೆಲ ದಿನಗಳಲ್ಲಿ ಅಧಿಕಾರ ಸ್ವೀಕಾರ ಮಾಡಲಿದ್ದಾರೆ. ನವಾಡ ಜಿಲ್ಲೆಯವರಾದ ಸಹೋದರಿಯರಿಬ್ಬರು ಒಟ್ಟಿಗೆ ಈ ಸಾಧನೆ ಮಾಡಿದ್ದು, ಇತರ ಹೆಣ್ಣು ಮಕ್ಕಳಿಗೂ ಸ್ಪೂರ್ತಿಯಾಗಿದೆ. ಈ ಸಹೋದರಿಯರ ತಂದೆ ಸಣ್ಣ ಅಂಗಡಿ ನಡೆಸುತ್ತಿದ್ದಾರೆ.
ಇದನ್ನೂ ಓದಿರಿ: 'ದಿ ಕಾಶ್ಮೀರಿ ಫೈಲ್ಸ್' ಹೀರೋ ದರ್ಶನ್ ಕುಮಾರ್ ಜೊತೆ ಈಟಿವಿ ಭಾರತ ಸಂದರ್ಶನ
ಪೂಜಾ-ಪ್ರಿಯಾ ಸಾಧನೆ: ಜಿಲ್ಲೆಯ ಪ್ರಕಿಬರವಾನ್ ಮಾರ್ಕೆಟ್ ನಿವಾಸಿಗಳಾದ ಮದನ್ ಸಾವೋ ಮತ್ತು ರೇಖಾದೇವಿ ಅವರ ಪುತ್ರಿಯರಾದ ಪೂಜಾ ಕುಮಾರಿ ಮತ್ತು ಪ್ರಿಯಾ ಕುಮಾರಿ ಇನ್ಸ್ಪೆಕ್ಟರ್ ತಯಾರಿ ನಡೆಸುತ್ತಿದ್ದರು. ಪೂಜಾ ಮೊದಲ ಪ್ರಯತ್ನದಲ್ಲಿ ತೇರ್ಗಡೆಯಾಗಿದ್ದು, ಪ್ರಿಯಾ ಎರಡನೇ ಪ್ರಯತ್ನದಲ್ಲಿ ತಮ್ಮ ಗುರಿ ಮುಟ್ಟಿದ್ದಾರೆ.
ಕಳೆದ ಕೆಲ ವರ್ಷಗಳಿಂದ ಬಿಹಾರ ಪೊಲೀಸ್ ಇಲಾಖೆ ತಯಾರಿ ನಡೆಸುತ್ತಿದ್ದ ಇಬ್ಬರೂ ಕನಿಷ್ಠ ಸಬ್ ಇನ್ಸ್ಪೆಕ್ಟರ್ ಆಗಬೇಕೆಂಬ ಕನಸು ಕಾಣುತ್ತಿದ್ದರು. ಅಧ್ಯಯನದ ಜೊತೆ ದೈಹಿಕ ತಯಾರಿ ನಡೆಸುತ್ತಿದ್ದ ಇವರು, ಒಂದು ಹೆಜ್ಜೆ ಮೇಲಿಟ್ಟಿದ್ದಾರೆ. ಹಳ್ಳಿಯಲ್ಲೇ ಪ್ರಾಥಮಿಕ ಶಿಕ್ಷಣ ಪಡೆದುಕೊಂಡಿರುವ ಇಬ್ಬರು, ತದನಂತರ ಪ್ಲಸ್ 2 ಶಿಕ್ಷಣವನ್ನ ಕೃಷಕ್ ಮಹಾವಿದ್ಯಾಲಯ ದೇವಾಹದಲ್ಲಿ ಪಡೆದುಕೊಂಡಿದ್ದಾರೆ.
