ರೂರ್ಕೆಲಾ(ಒಡಿಶಾ): ಡಿಜಿಟಲ್ ಸಹಾಯದಿಂದ ಕ್ಷಣಮಾತ್ರದಲ್ಲೇ ಯಾರಿಗೆ, ಎಲ್ಲಿಗೆ ಬೇಕಾದರೂ ಈಗ ಹಣ ಪಾವತಿಸಬಹುದು. ಆದರೆ, ಈ ಸ್ಟೋರಿ ಮಾತ್ರ ಸ್ವಲ್ಪ ವಿಚಿತ್ರವಾಗಿದೆ. 100 ಕಿಮೀ ದೂರದಲ್ಲಿರುವ ತನ್ನ ಸಹೋದರಿಗೆ ಅಣ್ಣನೊಬ್ಬ ಮಾಡಿದ್ದ 500 ರೂಪಾಯಿ ಮನಿ ಆರ್ಡರ್ ಬರೋಬ್ಬರಿ 4 ವರ್ಷಗಳ ಬಳಿಕ ಮನೆ ತಲುಪಿ ಅಚ್ಚರಿ ಮೂಡಿಸಿದೆ.
ಒಡಿಶಾದ ಸುಂದರ್ಗಢ ಜಿಲ್ಲೆಯಲ್ಲಿ ಈ ವಿಷಯ ಬೆಳಕಿಗೆ ಬಂದಿದೆ. ನವೆಂಬರ್ 26 ರಂದು ಪೋಸ್ಟ್ಮ್ಯಾನ್ ಮನಿ ಆರ್ಡರ್ ರಸೀದಿ ನೀಡಿದಾಗ ಘಟನೆ ಮುನ್ನೆಲೆಗೆ ಬಂದಿದೆ.
ಏನಾಗಿತ್ತು?: ರಾಯಗಢದಲ್ಲಿ ಕೆಲಸ ಮಾಡುತ್ತಿದ್ದ ಅಣ್ಣನೊಬ್ಬ ತನ್ನ ತಂಗಿಗೆ 2018 ರ ಮೇ 9 ರಂದು ಪೂರ್ವ ಮಾಹಿತಿ ನೀಡದೇ ಖರ್ಚಿಗೆಂದು 500 ರೂಪಾಯಿ ಹಣವನ್ನು ಪೋಸ್ಟ್ ಆಫೀಸಿನಲ್ಲಿ ಮನಿ ಆರ್ಡರ್ ಮಾಡಿದ್ದರು. ಇದಕ್ಕಾಗಿ ಅವರು ದಾಖಲೆಯನ್ನೂ ಪಡೆದಿದ್ದರು. ಹಣ ಮುಟ್ಟಿದ ಬಗ್ಗೆ ಅಣ್ಣ ಈವರೆಗೂ ವಿಚಾರಿಸಿರಲೇ ಇಲ್ಲ.
ಅಂದು ಮಾಡಿದ ಮನಿ ಆರ್ಡರ್ ಬರೋಬ್ಬರಿ ನಾಲ್ಕು ವರ್ಷ ಅಂದರೆ ಕಳೆದ ತಿಂಗಳ ನವೆಂಬರ್ 26 ರಂದು ನಮೂದಿಸಿದ ವಿಳಾಸಕ್ಕೆ ಬಂದಿದೆ. ಪೋಸ್ಟ್ಮ್ಯಾನ್ ಹಣವಿದ್ದ ಪೊಟ್ಟಣವನ್ನು ನೀಡಿ ಮಹಿಳೆಯಿಂದ ಸಹಿ ಪಡೆದಿದ್ದಾರೆ. ಇದನ್ನು ತೆರೆದು ನೋಡಿದಾಗ ಅದರಲ್ಲಿ 500 ರೂಪಾಯಿ ಹಣ ಇರುವುದು ಕಂಡು ಬಂದಿದೆ.
ಈ ಬಗ್ಗೆ ಮನೆಯವರನ್ನು ವಿಚಾರಿಸಿದಾಗ ಇದು ಯಾರೂ ಕಳಿಸಿಲ್ಲ ಎಂಬುದು ಗೊತ್ತಾಗಿದೆ. ಬಳಿಕ ತನ್ನ ಅಣ್ಣನನ್ನು ಕೇಳಿದಾಗ ತಾನು 2018 ರಲ್ಲಿ ಮನಿ ಆರ್ಡರ್ ಮಾಡಿದ್ದು ನೆನಪಿಸಿಕೊಂಡಿದ್ದಾರೆ. 100 ಕಿಮೀ ದೂರವಿರುವ ಗ್ರಾಮಕ್ಕೆ 2018 ರಲ್ಲಿ ಮಾಡಿದ ಮನಿ ಆರ್ಡರ್ 2022 ಕ್ಕೆ ಬಂದು ತಲುಪಿದ್ದು, ಅಚ್ಚರಿಯ ಜೊತೆಗೆ ಕರ್ತವ್ಯಲೋಪವನ್ನು ತೋರಿಸುತ್ತದೆ. ಬಳಿಕ ಈ ಬಗ್ಗೆ ಅಂಚೆ ಇಲಾಖೆಗೆ ದೂರು ನೀಡಿದ್ದು, ಈ ಬಗ್ಗೆ ಅಧಿಕಾರಿಗಳು ಇಲಾಖಾ ತನಿಖೆಗೆ ಆದೇಶಿಸಿದ್ದಾರೆ.
ಓದಿ: ಸುನಂದಾ ಪುಷ್ಕರ್ ನಿಗೂಢ ಸಾವು ಪ್ರಕರಣ: ಹೈಕೋರ್ಟ್‌ಗೆ ಮರುಪರಿಶೀಲನಾ ಅರ್ಜಿ ಸಲ್ಲಿಸಿದ ಪೊಲೀಸರು
