ಪ್ರಯಾಗರಾಜ್ (ಉತ್ತರಪ್ರದೇಶ): 2025ರಲ್ಲಿ ನಡೆಯಲಿರುವ ಬೃಹತ್ ಧಾರ್ಮಿಕ ಕಾರ್ಯಕ್ರಮ ಮಹಾಕುಂಭಮೇಳದಲ್ಲಿ ಭಾಗವಹಿಸಲು ಬಯಸುವ ಭಕ್ತರಿಗೆ ಅನುಕೂಲವಾಗುವಂತೆ ಭಾರತೀಯ ರೈಲ್ವೇ ದೇಶದ ವಿವಿಧ ಭಾಗಗಳಿಂದ 1,200 ವಿಶೇಷ ರೈಲುಗಳನ್ನು ಓಡಿಸಲಿದೆ. ಕಾರ್ಯಕ್ರಮಕ್ಕೆ ಸುಮಾರು 40 ಕೋಟಿ ಭಕ್ತರು ಪ್ರಯಾಗ್‌ರಾಜ್‌ಗೆ ಆಗಮಿಸುವ ನಿರೀಕ್ಷೆಯಿದೆ. 2019ರ ಕುಂಭದಲ್ಲಿ 24 ಕೋಟಿಗೂ ಹೆಚ್ಚು ಜನ ಪಾಲ್ಗೊಂಡಿದ್ದರು.
ಪ್ರಯಾಣಿಕರ ಅನುಕೂಲಕ್ಕಾಗಿ ನಗರದಲ್ಲಿ 19 ರೈಲು ಮೇಲ್ಸೇತುವೆಗಳು ಮತ್ತು ರೈಲು ಕೆಳಸೇತುವೆಗಳ ನಿರ್ಮಾಣಕ್ಕಾಗಿ 837 ಕೋಟಿ ರೂ. ಅನುದಾನಕ್ಕೆ ರೈಲ್ವೆ ಇಲಾಖೆ ಅನುಮೋದನೆ ನೀಡಿದೆ. 19 ಮೇಲ್ಸೇತುವೆಗಳು ಮತ್ತು ಕೆಳಸೇತುವೆಗಳ ಪೈಕಿ ನಾಲ್ಕರಲ್ಲಿ ಕೆಲಸವು ಬಹುತೇಕ ಮುಗಿದಿದೆ ಮತ್ತು ಈ ತಿಂಗಳಲ್ಲೇ ಇವು ಕಾರ್ಯಾರಂಭ ಮಾಡಲಿವೆ. ಏಳರಲ್ಲಿ ಕಾಮಗಾರಿ ನಡೆಯುತ್ತಿದ್ದು, ಎಂಟು ಕಾಮಗಾರಿಗಳು ಆರಂಭವಾಗಬೇಕಿವೆ.
ಮಹಾಕುಂಭ ಮೇಳಕ್ಕಾಗಿ ರೈಲ್ವೆ ಇಲಾಖೆ ಮಾಡಿಕೊಳ್ಳುತ್ತಿರುವ ಸಿದ್ಧತೆಗಳ ಬಗ್ಗೆ ಉತ್ತರ ಮಧ್ಯ ರೈಲ್ವೆಯ (ಎನ್‌ಸಿಆರ್) ಪ್ರಯಾಗ್‌ರಾಜ್ ವಿಭಾಗದ ಡಿವಿಜನಲ್ ರೈಲ್ವೇ ಮ್ಯಾನೇಜರ್ (ಡಿಆರ್‌ಎಂ) ಹಿಮಾಂಶು ಬಡೋನಿ ಮಾಹಿತಿ ನೀಡಿದರು. 2019 ರ ಕುಂಭದಲ್ಲಿ ಎಂಟು ಬೋಗಿಗಳನ್ನು ಹೊಂದಿರುವ 800 ರೈಲುಗಳನ್ನು ಓಡಿಸಲಾಗಿತ್ತು. ಈ ಬಾರಿ ಪ್ರತಿ ರೈಲು 16 ಬೋಗಿಗಳನ್ನು ಹೊಂದಿರುತ್ತದೆ ಮತ್ತು ರೈಲುಗಳ ಸಂಖ್ಯೆಯನ್ನು ಹೆಚ್ಚಿಸಲಾಗಿದೆ. ಅಗತ್ಯವಿದ್ದರೆ ಅದನ್ನು ಇನ್ನಷ್ಟು ಹೆಚ್ಚಿಸಬಹುದು ಎಂದು ಅವರು ಹೇಳಿದರು.
ಈ ರೈಲುಗಳು ನಗರದ ಪ್ರಯಾಗ್‌ರಾಜ್ ಜಂಕ್ಷನ್, ಸುಬೇದರ್‌ಗಂಜ್, ನೈನಿ, ಚಿಯೋಕಿ, ಪ್ರಯಾಗ್‌ರಾಜ್ ರಾಮ್‌ಬಾಗ್, ಜುನ್ಸಿ, ಪ್ರಯಾಗ್ ರಾಜ್ ಸಂಗಮ್, ಪ್ರಯಾಗ್ ಮತ್ತು ಫಾಫಮೌ ನಿಲ್ದಾಣಗಳಿಂದ ಕಾರ್ಯನಿರ್ವಹಿಸಲಿವೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ಅಕ್ಟೋಬರ್ 2024 ರೊಳಗೆ ಎಲ್ಲಾ ರೈಲ್ವೆ ಸಂಬಂಧಿತ ಕಾಮಗಾರಿಗಳನ್ನು ಪೂರ್ಣಗೊಳಿಸಲು ಗುರಿಯನ್ನು ನಿಗದಿಪಡಿಸಲಾಗಿದೆ. ಆರು ಪ್ರಮುಖ ದಿನಗಳಲ್ಲಿ 15 ಕೋಟಿಗೂ ಹೆಚ್ಚು ಜನರು ನಗರಕ್ಕೆ ಆಗಮಿಸುವ ನಿರೀಕ್ಷೆಯಿದೆ ಎಂದು ಅಧಿಕಾರಿ ಹೇಳಿದರು.
45 ದಿನಗಳ ಕಾಲ ನಡೆಯಲಿದೆ ಕುಂಭಮೇಳ: ಯುಪಿ ಪ್ರವಾಸೋದ್ಯಮ ಇಲಾಖೆಯ ಹೋರ್ಡಿಂಗ್‌ಗಳಲ್ಲಿ ಉಲ್ಲೇಖಿಸಲಾದ ಮಾಹಿತಿಯ ಪ್ರಕಾರ, 2025ರ ಮಹಾಕುಂಭ ಮೇಳ 45 ದಿನಗಳ ಕಾಲ ನಡೆಯಲಿದೆ ಮತ್ತು ಎಲ್ಲಾ ಮೂರು ಸಾಹಿ ಸ್ನಾನಗಳು ಮೊದಲ 21 ದಿನಗಳಲ್ಲಿ ನಡೆಯುತ್ತವೆ. ಮಹಾಕುಂಭವು 2025ರ ಜನವರಿ 13 ರಂದು ಪೌಶ್ ಪೂರ್ಣಿಮಾದೊಂದಿಗೆ ಪ್ರಾರಂಭವಾಗುತ್ತದೆ.
ಮೂರು ಶಾಹಿ ಸ್ನಾನಗಳ ದಿನಾಂಕಗಳು ಮಕರ ಸಂಕ್ರಾಂತಿ (ಜನವರಿ 14), ಮೌನಿ ಅಮಾವಾಸ್ಯೆ (ಜನವರಿ 29) ಮತ್ತು ಬಸಂತ್ ಪಂಚಮಿ (ಫೆಬ್ರವರಿ 3). ಇತರ ಪ್ರಮುಖ ಸ್ನಾನದ ದಿನಗಳು ಫೆಬ್ರವರಿ 4 ರಂದು ಅಚಲ ಸಪ್ತಮಿ, ಫೆಬ್ರವರಿ 12 ರಂದು ಮಾಘಿ ಪೂರ್ಣಿಮೆ ಮತ್ತು ಸ್ನಾನದ ಕೊನೆಯ ದಿನಗಳು, ಅಂದರೆ ಫೆಬ್ರವರಿ 26 ರಂದು ಮಹಾಶಿವರಾತ್ರಿ ಸ್ನಾನವನ್ನು ಸಹ ಘೋಷಿಸಲಾಗಿದೆ.
ಇದನ್ನೂ ಓದಿ : IT return ಫೈಲಿಂಗ್ಗೆ ಜುಲೈ 31ರ ಗಡುವು; ಈ ಬಾರಿ ಅವಧಿ ವಿಸ್ತರಣೆ ಸಾಧ್ಯತೆ ಕಡಿಮೆ
