ಭೋಪಾಲ್ (ಮಧ್ಯಪ್ರದೇಶ): ಆನ್ಲೈನ್ ಗೇಮ್ಗೆ ಮಾರುಹೋಗಿದ್ದ ಹಾಗೂ ವ್ಯಸನಿಯಾಗಿದ್ದ ಬಾಲಕನೊಬ್ಬ ಪೋಷಕರ ವಿರೋಧದಿಂದಾಗಿ ಮನನೊಂದು ಆತ್ಮಹತ್ಯೆಗೆ ಶರಣಾದ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.
ಬಾಲಕನ ಈ ಸಾವು ಈಗ ಮಧ್ಯಪ್ರದೇಶ ಸರ್ಕಾರವನ್ನು ಎಚ್ಚೆತ್ತುಕೊಳ್ಳುವಂತೆ ಮಾಡಿದೆ. ರಾಜ್ಯ ಸರ್ಕಾರ ಆನ್ಲೈನ್ ಗೇಮ್ಗಳನ್ನು ನಿಯಂತ್ರಿಸಲು ಕಾಯ್ದೆಯನ್ನು ತರಲಿದೆ ಎಂದು ಮಧ್ಯಪ್ರದೇಶ ಗೃಹ ಸಚಿವ ನರೋತ್ತಮ್ ಮಿಶ್ರಾ ಹೇಳಿದ್ದಾರೆ.
ಆನ್ಲೈನ್ ಮೊಬೈಲ್ ಗೇಮ್‌ನ ಚಟದಿಂದಾಗಿ ಮಕ್ಕಳು ಮತ್ತು ಯುವಕರು ಸಾವಿಗೆ ಶರಣಾಗುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಮಾತನಾಡಿರುವ ಅಲ್ಲಿನ ಗೃಹ ಸಚಿವರು, ಆನ್ಲೈನ್ ಆಟಗಳು ಇತ್ತೀಚಗೆ ಗಂಭೀರ ಸಮಸ್ಯೆಗಳಾಗಿ ಪರಿಣಮಿಸಿವೆ. ಇಂತಹ ದುರಂತಗಳನ್ನು ತಡೆಯುವ ಉದ್ದೇಶದಿಂದ, ನಾವು ಮಧ್ಯಪ್ರದೇಶದಲ್ಲಿ ಆನ್ಲೈನ್ ಗೇಮಿಂಗ್ ನಿಯಂತ್ರಿಸುವ ಕಾಯಿದೆ ತರುತ್ತಿದ್ದೇವೆ. ಈ ಸಂಬಂಧ ಕರಡು ಸಹ ಸಿದ್ಧಪಡಿಸಲಾಗಿದೆ. ಅದಕ್ಕೆ ಶೀಘ್ರ ಅಂತಿಮ ರೂಪ ನೀಡುತ್ತೇವೆ ಎಂದು ಘೋಷಿಸಿದ್ದಾರೆ.
11 ವರ್ಷದ ಬಾಲಕ ಸತ್ತಿದ್ದೇಕೆ?
ಭೋಪಾಲ್‌ನಲ್ಲಿ ತನ್ನ ಮನೆಯ ಮೇಲ್ಛಾವಣಿಗೆ ಅಳವಡಿಸಲಾಗಿದ್ದ ಪಂಚಿಂಗ್ ಬ್ಯಾಗ್‌ನ ಹಗ್ಗಕ್ಕೆ 11 ವರ್ಷದ ಬಾಲಕ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದ. ಈ ಬಾಲಕ ಹೆತ್ತವರ ಅನುಮತಿಯಿಲ್ಲದೇ ಆನ್ಲೈನ್ ಗೇಮ್ಗೆ ಸುಮಾರು 6,000 ರೂ. ಖರ್ಚು ಮಾಡಿದ್ದ. ಇದನ್ನು ಗಮಿಸಿದ ಪೋಷಕರು ಬಾಲಕನ ಮೊಬೈಲ್ನಿಂದ ಗೇಮಿಂಗ್ ಅಪ್ಲಿಕೇಷನ್ ಅನ್ನು ಡಿಲೀಟ್ ಮಾಡಿದ್ದರು. ಇದರಿಂದ ಮನನೊಂದ ಬಾಲಕ ಮೇಲ್ಚಾವಣಿಗೆ ತೆರಳಿ ಆತ್ಮಹತ್ಯೆಗೆ ಶರಣಾಗಿದ್ದ ಎಂದು ಭೋಪಾಲ್‌ನ ಹೆಚ್ಚುವರಿ ಪೊಲೀಸ್ ಕಮಿಷನರ್ ಸಚಿನ್ ಅತುಲ್ಕರ್ ಮಾಹಿತಿ ನೀಡಿದ್ದಾರೆ.
ಇಂತಹ ಹಲವು ಘಟನೆಗಳು ವರದಿ ಆಗಿರುವ ಹಿನ್ನೆಲೆಯಲ್ಲಿ ಮಧ್ಯಪ್ರದೇಶ ಸರ್ಕಾರ ಆನ್ಲೈನ್ ಗೇಮ್ಗಳನ್ನೇ ನಿಷೇಧಿಸಲು ನಿರ್ಧರಿಸಿದೆ. ಅಲ್ಲದೇ ಈ ಸಂಬಂಧ ಕಾನೂನು ಜಾರಿಗೆ ಕೂಡಾ ನಿರ್ಧರಿಸಿದೆ.
ಇದನ್ನೂ ಓದಿ:ಬಿಲ್ಡರ್‌ಗಳಿಗೆ 125 ಕೋಟಿ ರೂ.ವಂಚನೆ ಆರೋಪ; BSF ಉಪ ಕಮಾಂಡೆಂಟ್‌ ಸೇರಿ ನಾಲ್ವರ ಬಂಧನ, 13 ಕೋಟಿ ರೂ.ವಶ
