ಕೇರಳದಲ್ಲಿ ಕಳೆದಿದ್ದ ಏರ್​ಪಾಡ್ಸ್​​ ಗೋವಾದಲ್ಲಿ ಪತ್ತೆ; ಪೊಲೀಸರಿಗೆ ಧನ್ಯವಾದ ಅರ್ಪಿಸಿದ ವ್ಯಕ್ತಿ

ವ್ಯಕ್ತಿಯೊಬ್ಬರು ಕೇರಳದಲ್ಲಿ ಕಳೆದುಕೊಂಡ ಏರ್​ಪಾಡ್ಸ್​ ​ಗೋವಾದಲ್ಲಿ ಪತ್ತೆಯಾಗಿವೆ. ಸಾಮಾಜಿಕ ಜಾಲತಾಣ ಬಳಸಿಕೊಂಡು ವ್ಯಕ್ತಿಯು ಪೊಲೀಸರ ಸಹಾಯದಿಂದ ಏರ್​ಪಾಡ್ಸ್​ ಪತ್ತೆ ಹಚ್ಚಿದ್ದಾರೆ.

ಹೈದರಾಬಾದ್​ : ನಮ್ಮ ಯಾವುದೇ ವಸ್ತುಗಳು ಕಳೆದು ಹೋದರೆ ಕೆಲವೊಮ್ಮೆ ದಿಕ್ಕು ತೋಚದೆ ತಲೆ ಮೇಲೆ ಕೈ ಇಟ್ಟು ಕುಳಿತುಕೊಳ್ಳುತ್ತೇವೆ. ಕೆಲವರು ವಸ್ತು ಕಳೆದು ಹೋದ ಬಗ್ಗೆ ಪೊಲೀಸ್​ ಠಾಣೆಗೆ ದೂರು ನೀಡುತ್ತಾರೆ. ಇನ್ನೂ ಕೆಲವರು ಇಂದು ವ್ಯಾಪಕವಾಗಿ ಬಳಕೆಯಾಗುವ ಸಾಮಾಜಿಕ ಜಾಲತಾಣ, ತಂತ್ರಜ್ಞಾನವನ್ನು ಬಳಸಿಕೊಂಡು ತಮ್ಮ ಕಳೆದುಹೋದ ವಸ್ತುಗಳನ್ನು ಪತ್ತೆ ಹಚ್ಚುತ್ತಾರೆ.

ಅಂತೆಯೇ ವ್ಯಕ್ತಿಯೊಬ್ಬರು ತಾವು ಕೇರಳದಲ್ಲಿ ಕಳೆದುಕೊಂಡಿದ್ದ ಏರ್​ಪಾಡ್ಸ್​​ಅನ್ನು ದೂರದ ಗೋವಾದಲ್ಲಿ ಪತ್ತೆ ಹಚ್ಚಿ ಮರಳಿ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಜೊತೆಗೆ ತನ್ನ ಏರ್​ಪಾಡ್ಸ್​​ನ್ನು ಹುಡುಕಿಕೊಟ್ಟ ಪೊಲೀಸರಿಗೆ ಧನ್ಯವಾದ ಅರ್ಪಿಸಿದ್ದಾರೆ.

ಮುಂಬೈ ಮೂಲದ ಆನ್​ಲೈನ್​ ಮಾರ್ಕೆಟಿಂಗ್​ ವೃತ್ತಿಪರರಾದ ನಿಖಿಲ್​ ಜೈನ್​ ಎಂಬವರು ಇತ್ತೀಚೆಗೆ ಕೇರಳಕ್ಕೆ ಭೇಟಿ ನೀಡಿದ್ದರು. ಈ ಸಂದರ್ಭ ತಮ್ಮ ಏರ್​ಪಾಡ್ಸ್​ಗಳನ್ನು ಕಳೆದುಕೊಂಡಿದ್ದರು. ಬಳಿಕ ಈ ಏರ್​ಪಾಡ್ಸ್​ನ ಅನ್ವೇಷಣೆ ವೇಳೆ ಇದು ಗೋವಾದಲ್ಲಿ ಇರುವುದು ಪತ್ತೆಯಾಗಿತ್ತು. ಈ ಬಗ್ಗೆ ಸಹಾಯ ಕೋರಿ ಸಾಮಾಜಿಕ ಜಾಲತಾಣ ಎಕ್ಸ್​ನಲ್ಲಿ ಪೋಸ್ಟ್​ವೊಂದನ್ನು ಹಾಕಿದ್ದರು. ಇದಕ್ಕೆ ಸ್ಪಂದಿಸಿರುವ ಪೊಲೀಸರು ಕಳೆದುಹೋಗಿದ್ದ ಏರ್​ಪಾಡ್ಸ್​ಅನ್ನು ಪತ್ತೆ ಹಚ್ಚಿ ನಿಖಿಲ್​ ಜೈನ್​ಗೆ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಅದಕ್ಕೆ ಪ್ರತಿಯಾಗಿ ಏರ್​ಪಾಡ್ಸ್​ಗಳನ್ನು ಹುಡುಕಿಕೊಟ್ಟ ಗೋವಾ ಮತ್ತು ಕೇರಳ ಪೊಲೀಸರಿಗೆ ಧನ್ಯವಾದವನ್ನು ಜೈನ್ ತಿಳಿಸಿದ್ದಾರೆ. ಈ ಬಗ್ಗೆ ಎಕ್ಸ್​ನಲ್ಲಿ ಪೋಸ್ಟ್​ ಮಾಡಿರುವ ನಿಖಿಲ್, ನೀವು ನಂಬಬಹುದೇ!!? ಏಂಜಲ್ ಸಂಕೇತ್, ಗೋವಾ ಪೊಲೀಸ್, ಕೇರಳ ಪೊಲೀಸ್, ಟ್ವಿಟರ್, ಈ ಟ್ವೀಟ್‌ಗೆ ಪ್ರತಿಕ್ರಿಯಿಸಿದ ಪ್ರತಿಯೊಬ್ಬರಿಗೂ ಧನ್ಯವಾದಗಳು! ಎಂತಹ ಸುಂದರ ಕಥೆ. ಪ್ರಪಂಚವು ತುಂಬಾ ದೊಡ್ಡದಾಗಿದೆ ಮತ್ತು ಇನ್ನೂ ಚಿಕ್ಕದಾಗಿದೆ ಎಂದು ಬರೆದುಕೊಂಡಿದ್ದಾರೆ.

ಕೇರಳದಲ್ಲಿ ಕಳೆದುಹೋಗಿದ್ದ ಏರ್​ಪಾಡ್ಸ್​ ಟ್ರಾಕಿಂಗ್​ ವೇಳೆ ಗೋವಾದ ಮಾರ್ಗಾಂವ್​ ಪೊಲೀಸ್​ ಠಾಣೆಯಲ್ಲಿರುವುದು ಪತ್ತೆಯಾಗಿತ್ತು. ಈ ಬಗ್ಗೆ ನಿಖಿಲ್​ ಮತ್ತೆ ಸಾಮಾಜಿಕ ಜಾಲತಾಣ ಎಕ್ಸ್​ನಲ್ಲಿ ಮಾಹಿತಿ ಹಂಚಿಕೊಂಡಿದ್ದರು. ಅಲ್ಲದೆ ಕಳೆದುಹೋದ ಏರ್​ಪಾಡ್ಸ್​ ಸಿಕ್ಕಿದ್ದ ವ್ಯಕ್ತಿ ಪೊಲೀಸ್​ ಠಾಣೆಗೆ ನೀಡಿರಬಹುದೆಂದು ನಿಖಿಲ್​ ಭಾವಿಸಿದ್ದರು.

ಇದಕ್ಕೂ ಮುನ್ನ ಪೋಸ್ಟ್​ ಹಾಕಿದ್ದ ನಿಖಿಲ್​, ನಾನು ಕಳೆದ ಕೆಲವು ದಿನಗಳ ಹಿಂದೆ ಕೇರಳದಲ್ಲಿ ನನ್ನ ಏರ್​ಪಾಡ್ಸ್​ಅನ್ನು ಕಳೆದುಕೊಂಡಿದ್ದೆ. ವ್ಯಕ್ತಿಯೊಬ್ಬ ಗೋವಾದಲ್ಲಿ ಏರ್​ಪಾಡ್ಸ್​ನೊಂದಿಗೆ ಕಳೆದ ಎರಡು ದಿನಗಳಿಂದ ಸಂಚರಿಸುತ್ತಿದ್ದಾನೆ. ದಕ್ಷಿಣ ಗೋವಾದ ಸಾಲ್ಸೆಟೆಯ ಡಾ. ಅಲ್ವಾರೊ ಡಿ ಲೊಯೊಲಾ ಫುರ್ಟಾಡೊ ರಸ್ತೆಯಲ್ಲಿ ಆ ವ್ಯಕ್ತಿ ಸಂಚರಿಸುತ್ತಿದ್ದಾನೆ. ಸುತ್ತಲೂ ಯಾರಾದರೂ ಇದ್ದರೆ ಏರ್​ಪಾಡ್ಸ್​ ಮರಳಿ ಪಡೆಯಲು ಸಹಾಯ ಮಾಡಿ ಎಂದು ಬರೆದುಕೊಂಡಿದ್ದರು. ಅಂತೂ ವ್ಯಕ್ತಿ ಸಾಮಾಜಿಕ ಜಾಲತಾಣವನ್ನು ಬಳಸಿಕೊಂಡು ತಾನು ಕಳೆದುಕೊಂಡಿದ್ದ ಏರ್​ಪಾಡ್ಸ್​ ಮರಳಿ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಇದನ್ನೂ ಓದಿ : ಮೂರನೇ ವ್ಯಕ್ತಿಯೊಂದಿಗೆ ತಮ್ಮ ದತ್ತಾಂಶ ಸೋರಿಕೆ ಬಗ್ಗೆ ಚಿಂತಿತರಾಗಿದ್ದಾರೆ 10ರಲ್ಲಿ 6 ಭಾರತೀಯರು