ಹೈದರಾಬಾದ್(ತೆಲಂಗಾಣ): ನಗರದ ಸರ್ಕಾರಿ ಶಾಲೆಯೊಂದರಲ್ಲಿ 10ನೇ ತರಗತಿ ವಿದ್ಯಾರ್ಥಿಯೊಬ್ಬನ ಬಳಿ ಗಾಂಜಾ ಪತ್ತೆಯಾಗಿರುವ ಆಘಾತಕಾರಿ ಘಟನೆ ನಡೆದಿದೆ. ವಿದ್ಯಾರ್ಥಿ ತನ್ನ ಸ್ನೇಹಿತರಿಗೆ ಪ್ಯಾಕೆಟ್ವೊಂದನ್ನು ತೋರಿಸುತ್ತಿರುವುದನ್ನು ಗಮನಿಸಿದ ಶಿಕ್ಷಕ, ಆತನ ಬಳಿಯಿಂದ ಪ್ಯಾಕೆಟ್ ಅನ್ನು ಪಡೆದುಕೊಂಡು ಪರಿಶೀಲಿಸಿ ಅದರಲ್ಲಿ ಗಾಂಜಾ ಇರುವುದನ್ನು ಕಂಡು ಬೆಚ್ಚಿಬಿದ್ದಿದ್ದಾರೆ. ಇನ್ನು ಪೊಲೀಸರು ವಿದ್ಯಾರ್ಥಿಯನ್ನು ವಿಚಾರಣೆಗೊಳಪಡಿಸಿದಾಗ, ತನ್ನ ಕಾಲೋನಿಯಲ್ಲಿರುವ ಯುವಕನೊಬ್ಬ ಗಾಂಜಾ ಇರುವ ಪ್ಯಾಕೆಟ್ಗಳನ್ನು ತನ್ನ ಜೇಬಿನಲ್ಲಿಟ್ಟು, ಯಾರಾದರೂ ಬೇಕು ಎಂದು ಕೇಳಿದರೆ ಅವರಿಗೆ ಕೊಡು ಎಂದು ಹೇಳಿರುವುದಾಗಿ ಎಂದು ತಿಳಿಸಿದ್ದಾನೆ. ಗಾಂಜಾವನ್ನು ಓಲ್ಡ್ ಟೌನ್ನಿಂದ ತಂದು ಶಾಲಾ ಮಕ್ಕಳ ಬಳಿ ಅಡಗಿಸಿ ಇಡಲಾಗುತ್ತಿತ್ತು ಎಂದು ತನಿಖೆಯಲ್ಲಿ ತಿಳಿದು ಬಂದಿದೆ.
ಮತ್ತೊಂದೆಡೆ, ಸಿಕಂದರಾಬಾದ್ನ ಶಾಲೆಯೊಂದರ ಆರನೇ ತರಗತಿಯಲ್ಲಿ ಓದುತ್ತಿದ್ದ 10 ವಿದ್ಯಾರ್ಥಿಗಳ ಬಳಿ ಸಿಗರೇಟ್ ವಾಸನೆ ಬರುತ್ತಿರುವುದನ್ನು ಗಮನಿಸಿದ ಶಿಕ್ಷಕ, ಅವರ ಬ್ಯಾಗ್ಗಳನ್ನು ಪರಿಶೀಲಿಸಿದಾಗ ಗಾಂಜಾ ಮತ್ತು ಕೆಲವು ಮಾತ್ರೆಗಳು ಕಂಡು ಬಂದಿವೆ. ಈ ಬಗ್ಗೆ ಶಿಕ್ಷಕ ಶಾಲಾ ಆಡಳಿತ ಮಂಡಳಿಗೆ ಮಾಹಿತಿ ನೀಡಿದ್ದಾರೆ.
ಗಾಂಜಾ ಪೂರೈಕೆಗೆ ಶಾಲಾ ಮಕ್ಕಳ ಬಳಕೆ: ಇತ್ತೀಚೆಗೆ ಹೈದರಾಬಾದ್ನಲ್ಲಿ ಪೊಲೀಸರ ತಪಾಸಣೆ ಮತ್ತು ಬಂಧನಗಳಿಂದ ಭಯಭೀತರಾಗಿರುವ ಮಾದಕ ವಸ್ತು ಕಳ್ಳಸಾಗಣೆದಾರರು ಇವುಗಳನ್ನು ಸಾಗಿಸಲು ಹೊಸ ಮಾರ್ಗಗಳನ್ನು ಹುಡುಕಿಕೊಂಡಿದ್ದು, ಇದಕ್ಕೆ ಶಾಲಾ ಮಕ್ಕಳನ್ನು ಬಳಸಿಕೊಳ್ಳುತ್ತಿದ್ದಾರೆ. ವಿದ್ಯಾರ್ಥಿಗಳಾಗಿರುವುದರಿಂದ ಇವರ ಮೇಲೆ ಯಾರಿಗೂ ಅನುಮಾನ ಬರುವುದಿಲ್ಲ ಎಂಬ ಉದ್ದೇಶದಿಂದ ಅವರನ್ನು ಮಾದಕ ವಸ್ತು ಪೂರೈಕೆದಾರರನ್ನಾಗಿ ಪರಿವರ್ತಿಸುತ್ತಿದ್ದಾರೆ.
ಧೂಲ್‌ಪೇಟೆ, ಮಂಗಲ್‌ಹಟ್‌, ಓಲ್ಡ್ ಸಿಟಿ ಭಾಗದ ಕೆಲ ಯುವಕರು 1 ರಿಂದ 2 ಕೆಜಿ ಗಾಂಜಾ ಖರೀದಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ. ಅವುಗಳನ್ನು 5 ಮತ್ತು 10 ಗ್ರಾಂ ಪ್ಯಾಕೆಟ್‌ಗಳಾಗಿ ಮಾಡಿ ಶಾಲಾ ವಿದ್ಯಾರ್ಥಿಗಳ ಜೇಬು ಮತ್ತು ಬ್ಯಾಗ್‌ಗಳಲ್ಲಿ ಇರಿಸಿ, ಇವರನ್ನೂ ಪೂರೈಕೆದಾರರನ್ನಾಗಿ ಮಾಡಿಕೊಳ್ಳುತ್ತಿದ್ದಾರೆ. ಮಾದಕ ವಸ್ತು ಪೂರೈಕೆಗೆ ಸಹಕರಿಸಿದ ಮಕ್ಕಳಿಗೆ 100 ರಿಂದ 200 ರೂ. ಕಮಿಷನ್ ಸಹ ನೀಡಲಾಗುತ್ತದೆ. ಹೆಚ್ಚು ಪ್ಯಾಕೆಟ್ಗಳನ್ನು ಪೂರೈಸಿದರೆ ಅವರಿಗೆ ಹೊಸ ಮೊಬೈಲ್ ಫೋನ್‌ಗಳನ್ನು ಡ್ರಗ್ಸ್ ಪೆಡ್ಲರ್ಗಳು ಕೊಡಿಸುತ್ತಿದ್ದರು ಎಂಬ ಅಂಶ ಪೊಲೀಸರ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ತಮ್ಮ ಕಾಲೋನಿಗಳಲ್ಲಿನ ಯುವಕರು ಮತ್ತು ಸ್ನೇಹಿತರ ಪ್ರಭಾವದಿಂದ ಮಕ್ಕಳು ಗಾಂಜಾಕ್ಕೆ ವ್ಯಸನಿಗಳಾಗುತ್ತಿದ್ದಾರೆ. ಮಕ್ಕಳ ದೌರ್ಬಲ್ಯವನ್ನು ಅರಿತುಕೊಂಡಿರುವ ಗಾಂಜಾ ಕಳ್ಳಸಾಗಣೆದಾರರು ಅವರಿಗೆ ಉಚಿತವಾಗಿ ಮಾದಕ ವಸ್ತುಗಳನ್ನು ನೀಡಿ ವ್ಯಸನಿಗಳನ್ನಾಗಿ ಮಾಡುತ್ತಿದ್ದಾರೆ ಎಂದು ನಗರದ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಸೀತಾಫಲಮಂಡಿ, ವಿದ್ಯಾನಗರ, ಅಲ್ವಾಲ್, ಚಂದ್ರಯ್ಯನಗುಟ್ಟ, ಲಕ್ಡಿಕಾಪೂಲ್, ರೈಲು ನಿಲ್ದಾಣಗಳು ಸೇರಿಂದತೆ ಮುಂತಾದ ಪ್ರದೇಶಗಳು ಮಾದಕ ವಸ್ತುಗಳ ಮಾರಾಟ ಅಡ್ಡೆಗಳಾಗಿವೆ ಎಂದು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: ಬೆಂಗಳೂರು.. ಅಕ್ರಮ ಜೂಜು ಅಡ್ಡೆ ಮೇಲೆ ಸಿಸಿಬಿ ದಾಳಿ: 86.87 ಲಕ್ಷ ರೂ. ಜಪ್ತಿ
