ಸಾಮೂಹಿಕ ಅತ್ಯಾಚಾರ ಮಾಡಿ ಸಂತ್ರಸ್ತೆಯ ಕಾಲು ತುಂಡರಿಸಿದ ಕೀಚಕರು!

ಉತ್ತರಪ್ರದೇಶದ ಮಥುರಾದಲ್ಲಿ ಸಾಮೂಹಿಕ ಅತ್ಯಾಚಾರ ಘಟನೆ ತಡವಾಗಿ ಬೆಳಕಿಗೆ- ಸಂತ್ರಸ್ತೆ ಎಡಕಾಲನ್ನು ತುಂಡರಿಸಿ ಕ್ರೌರ್ಯ ಮೆರೆದ ಆರೋಪಿಗಳು- ಪ್ರಕರಣದಲ್ಲಿ ಇಬ್ಬರ ಬಂಧನ.

ಮಥುರಾ(ಉತ್ತರಪ್ರದೇಶ): ಉತ್ತರಪ್ರದೇಶದಲ್ಲಿ ಹೃದಯ ವಿದ್ರಾವಕ ಘಟನೆಯೊಂದು ತಡವಾಗಿ ಬೆಳಕಿಗೆ ಬಂದಿದೆ. ಮಹಿಳೆಗೆ ಮತ್ತು ಬರುವ ಪಾನೀಯ ಕುಡಿಸಿ ಸಾಮೂಹಿಕ ಅತ್ಯಾಚಾರ ನಡೆಸಿದ್ದಲ್ಲದೇ, ಆಕೆಯ ಕಾಲಿನ ಮೇಲೆ ಬೈಕ್​ ಹತ್ತಿಸಿ, ಕಾಲನ್ನೇ ತುಂಡರಿಸಿದ ಕ್ರೂರ ಘಟನೆ ನಡೆದಿದೆ. ಪ್ರಕರಣದಲ್ಲಿ ಇಬ್ಬರು ಆರೋಪಿಗಳನ್ನು ಬಂಧಿಸಲಾಗಿದೆ.

ಮಥುರಾ ಜಿಲ್ಲೆಯ ಖರೋಟ್ ಎಂಬ ಗ್ರಾಮದಲ್ಲಿ ಮೇ 24 ರಂದು ಈ ಘಟನೆ ನಡೆದಿದೆ ಎನ್ನಲಾಗಿದೆ. 30 ವರ್ಷದ ಮಹಿಳೆಯೊಬ್ಬರು ಬ್ಯಾಂಕ್​ನಿಂದ ಹಣ ಬಿಡಿಸಿಕೊಂಡು ಬಸ್​ಗಾಗಿ ಕಾಯುತ್ತಿದ್ದಾಗ ಪರಿಚಯದ ಯುವಕನೊಬ್ಬ ಬೈಕ್​ ಮೇಲೆ ಬಂದಿದ್ದಾನೆ. ಈ ವೇಳೆ, ಆಕೆಯನ್ನು ಮನೆಗೆ ಡ್ರಾಪ್​ ಮಾಡುವುದಾಗಿ ತಿಳಿಸಿ ಬೈಕ್​ ಹತ್ತಿಸಿಕೊಂಡಿದ್ದಾನೆ.

ಮಾರ್ಗ ಮಧ್ಯೆ ಆತ ತನ್ನ ಗೆಳೆಯನನ್ನೂ ಬೈಕ್​ ಮೇಲೆ ಹತ್ತಿಸಿಕೊಂಡಿದ್ದಾನೆ. ಈ ವೇಳೆ, ಮಹಿಳೆಗೆ ಮತ್ತು ಬರುವ ಪಾನೀಯ ಕುಡಿಸಿದ್ದಾರೆ. ಮಹಿಳೆ ಪ್ರಜ್ಞೆ ತಪ್ಪಿದ ಬಳಿಕ ಗೆಳೆಯರನ್ನು ಕರೆಯಿಸಿದ ಆರೋಪಿಗಳು ಸಾಮೂಹಿಕ ಅತ್ಯಾಚಾರ ಮಾಡಿದ್ದಾರೆ.

ಅಷ್ಟಕ್ಕೇ ಬಿಡದ ಕ್ರೂರಿಗಳು ಆಕೆಯ ಎಡಕಾಲಿನ ಮೇಲೆ ಬೈಕ್​ ಹತ್ತಿಸಿ, ಕಾಲನ್ನೇ ತುಂಡರಿಸಿದ್ದಾರೆ. ಬಳಿಕ ಆಕೆಯನ್ನು ಅದೇ ಬೈಕ್​ ಮೇಲೆ ಎತ್ತಿಕೊಂಡು ಹೋಗಿ ಕಾಲುವೆಯೊಂದರ ಪೊದೆಯಲ್ಲಿ ಬಿಸಾಡಿದ್ದಾರೆ. ಪ್ರಜ್ಞೆ ಮರಳಿದ ನಂತರ ಸಂತ್ರಸ್ತೆ ತನ್ನ ಮನೆಗೆ ತಲುಪಿದ್ದಾಳೆ. ಹತ್ತಿರದ ಆರೋಗ್ಯ ಕೇಂದ್ರದಲ್ಲಿ ಚಿಕಿತ್ಸೆ ಪಡೆದಿದ್ದಾಳೆ.

ಕೇಸ್ ದಾಖಲು, ಇಬ್ಬರ ಬಂಧನ​: ನಡೆದ ಘಟನೆಯನ್ನು ಸಂತ್ರಸ್ತೆ ಕುಟುಂಬಸ್ಥರಿಗೆ ತಿಳಿಸಿದ್ದಾಳೆ. ಕುಟುಂಬದವರು ಪೊಲೀಸ್​ ಠಾಣೆಯಲ್ಲಿ ಸಾಮೂಹಿಕ ಅತ್ಯಾಚಾರ ಎಸಗಿ ಪ್ರಕರಣ ದಾಖಲಿಸಿದ್ದಾರೆ. ಪೊಲೀಸರು ಕೆಲವೇ ಗಂಟೆಗಳಲ್ಲಿ ಇಬ್ಬರು ಪ್ರಮುಖ ಆರೋಪಿಗಳನ್ನು ಬಂಧಿಸಿ, ಜೈಲಿಗಟ್ಟಿದ್ದು, ಇವರ ಉಳಿದ ಸಹಚರರಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.

ಓದಿ: ರಾಮಸೇನಾದ ಜಿಲ್ಲಾಧ್ಯಕ್ಷನಿಂದ ಪ್ರೇಯಸಿಯ ಕೊಲೆ ಯತ್ನ