ನವದೆಹಲಿ: ರಾಜಕಾರಣ ಇರುವುದು ಜನಸೇವೆಗೆ. ಭತ್ಯೆ, ವೇತನ, ಸೌಲಭ್ಯ ಸೇರಿ ರಾಜಕಾರಣಿಗಳು ಜನರ ಹಣದಲ್ಲಿ ಲಕ್ಷಗಟ್ಟಲೆ ತಿಂಗಳಿಗೆ ಪಡೆಯುತ್ತಿದ್ದಾರೆ. ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ನೇತೃತ್ವದ ದೆಹಲಿ ಸರ್ಕಾರ ಶಾಸಕರ ವೇತನದಲ್ಲಿ 66 ಪ್ರತಿಶತ ಹೆಚ್ಚಿಸಿದ್ದು, ಇದಕ್ಕೆ ರಾಷ್ಟ್ರಪತಿಗಳು ಅಂಗೀಕಾರ ನೀಡಿದ್ದಾರೆ.
ಮಾರ್ಚ್ 17 ರಿಂದ ಪ್ರಾರಂಭವಾಗಲಿರುವ ದೆಹಲಿ ಬಜೆಟ್ ಅಧಿವೇಶನಕ್ಕೆ ಮುಂಚಿತವಾಗಿ ಶಾಸಕರು ಮತ್ತು ಸಚಿವರ ವೇತನ ಮತ್ತು ಭತ್ಯೆಗಳನ್ನು ಶೇಕಡಾ 66 ಕ್ಕಿಂತ ಹೆಚ್ಚು ಏರಿಸಲಾಗಿದೆ. ದೆಹಲಿ ಸರ್ಕಾರದ ಕಾನೂನು ಇಲಾಖೆಯ ಅಧಿಸೂಚನೆಯ ಪ್ರಕಾರ, ಶಾಸಕರು ಈಗ ಪ್ರತಿ ತಿಂಗಳು 90,000 ರೂ.ಗಳನ್ನು ಪಡೆಯಲಿದ್ದಾರೆ. ಈ ಹಿಂದೆ ಶಾಸಕರ ಸಂಬಳ 54,000 ರೂಪಾಯಿ ಇತ್ತು.
ಮೂಲವೇತನ, ದಿನಭತ್ಯೆ ಸೇರಿದಂತೆ ಎಲ್ಲವೂ ಹೆಚ್ಚಳ ಮಾಡಲಾಗಿದೆ. 12,000 ರೂ.ಗಳಷ್ಟಿದ್ದ ಶಾಸಕರ ಮೂಲ ವೇತನ ಈಗ 30,000 ರೂ.ಗೆ ಏರಿದೆ. ದಿನಭತ್ಯೆಯನ್ನು 1,000 ರೂ.ನಿಂದ 1,500 ರೂ.ಗೆ ಹೆಚ್ಚಿಸಲಾಗಿದೆ. ಇದಲ್ಲದೇ, ಮುಖ್ಯಮಂತ್ರಿ, ವಿಧಾನಸಭಾಧ್ಯಕ್ಷ ಮತ್ತು ವಿರೋಧ ಪಕ್ಷದ ನಾಯಕರ ವೇತನ ಮತ್ತು ಭತ್ಯೆಯನ್ನೂ ಪರಿಷ್ಕರಿಸಲಾಗಿದ್ದು, ಮಾಸಿಕವಾಗಿ 1.70 ಲಕ್ಷ ರೂ. ಪಡೆಯಲಿದ್ದಾರೆ. ಈ ಹಿಂದೆ ಇವರಿಗೆ ತಿಂಗಳಿಗೆ 72 ಸಾವಿರ ರೂ. ಸಿಗುತ್ತಿತ್ತು.
ದೆಹಲಿ ವಿಧಾನಸಭೆಯ ಶಾಸಕರು ಮತ್ತು ಮಂತ್ರಿಗಳ ವೇತನವನ್ನು ಹೆಚ್ಚಿಸುವ ಪ್ರಸ್ತಾಪವನ್ನು 2022 ರಲ್ಲಿ ಅಂಗೀಕರಿಸಿತ್ತು. ಇದನ್ನು ಕೇಂದ್ರ ಗೃಹ ವ್ಯವಹಾರಗಳ ಸಚಿವಾಲಯಕ್ಕೆ ಕಳುಹಿಸಿತ್ತು. ಇದೀಗ ರಾಷ್ಟ್ರಪತಿಗಳು ಕೂಡ ಸಹಿ ಹಾಕಿ ಪ್ರಸ್ತಾವನೆ ಪಾಸು ಮಾಡಿದ್ದಾರೆ.
ವೇತನ ಹೆಚ್ಚಳವಾದರೂ ಕಡಿಮೆಯೇ: ದೆಹಲಿ ಸರ್ಕಾರ ಬರೋಬ್ಬರಿ 12 ವರ್ಷಗಳ ಬಳಿಕ ಶಾಸಕರ ವೇತನವನ್ನು ಹೆಚ್ಚಳ ಮಾಡಿದೆ. ಹೊಸ ವೇತನದ ನಿಯಮ ಇದೇ ಫೆಬ್ರವರಿ 14 ರಿಂದ ಜಾರಿಗೆ ಬರಲಿದೆ. ಹೆಚ್ಚಳದ ನಂತರವೂ ದೆಹಲಿಯ ಶಾಸಕರು ದೇಶದ ಅತ್ಯಂತ ಕಡಿಮೆ ಸಂಭಾವನೆ ಪಡೆಯುವ ಶಾಸಕರಾಗಿದ್ದಾರೆ.
ದೆಹಲಿಯ ಶಾಸಕರ ವೇತನ ಮತ್ತು ಭತ್ಯೆಗಳು ಇತರ ರಾಜ್ಯಗಳಿಗೆ ಹೋಲಿಸಿದರೆ ತೀರಾ ಕಡಿಮೆ ಇದೆ. ಹೀಗಾಗಿ ಸಂಬಳವನ್ನು ಹೆಚ್ಚಳವನ್ನು ಏರಿಕೆ ಮಾಡಬೇಕು. ಬಿಜೆಪಿ ಮತ್ತು ಕಾಂಗ್ರೆಸ್ ಆಡಳಿತದ ರಾಜ್ಯಗಳು 1.5 ರಿಂದ 2 ಪಟ್ಟು ಹೆಚ್ಚಿನ ಸಂಬಳ ಮತ್ತು ಭತ್ಯೆಗಳನ್ನು ನೀಡುತ್ತಿವೆ ಎಂದು ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಸರ್ಕಾರ ಕೇಂದ್ರಕ್ಕೆ ಮನವಿ ಮಾಡಿತ್ತು.
ಇತರೆ ರಾಜ್ಯಗಳಲ್ಲಿ ಸಂಬಳ ಹೇಗಿದೆ?: ತೆಲಂಗಾಣ ಶಾಸಕರು ದೇಶದಲ್ಲಿಯೇ ಅತಿಹೆಚ್ಚು ಸಂಬಳ ಪಡೆಯುತ್ತಿದ್ದಾರೆ. ತಿಂಗಳಿಗೆ ಮೂಲವೇತನ 20,000 ಇದ್ದರೂ, ವಾರ್ಷಿಕವಾಗಿ ಅವರೆಲ್ಲರೂ 2.3 ಲಕ್ಷ ರೂಗಳಷ್ಟು ಭತ್ಯೆ ಮತ್ತು ಸರ್ಕಾರಿ ಸೌಲಭ್ಯಗಳನ್ನು ಪಡೆಯುತ್ತಿದ್ದಾರೆ. ಹಿಮಾಚಲ ಪ್ರದೇಶದಲ್ಲಿ 90,000 ರೂ. ಕ್ಷೇತ್ರ ಭತ್ಯೆಯೊಂದಿಗೆ ಮಾಸಿಕ 55,000 ರೂ. ಪಡೆದರೆ, ದೈನಂದಿನ ಭತ್ಯೆ 1,800 ರೂ. ಗಿಟ್ಟಿಸಿಕೊಳ್ಳುತ್ತಿದ್ದಾರೆ. ಆಂಧ್ರಪ್ರದೇಶದಲ್ಲಿ 1.13 ಲಕ್ಷ ರೂಪಾಯಿ, ಉತ್ತರಾಖಂಡದಲ್ಲಿ 1.98 ಲಕ್ಷ ರೂ., ಹರಿಯಾಣದಲ್ಲಿ 1.55 ಲಕ್ಷ (ರೂ., ಬಿಹಾರ ಶಾಸಕರು 1.3 ಲಕ್ಷ ರೂ., ರಾಜಸ್ಥಾನ ಶಾಸಕರು 1.42 ಲಕ್ಷ ರೂ ಸಂಬಳ, ಸೌಲಭ್ಯ ಪಡೆಯುತ್ತಿದ್ದಾರೆ.
ಓದಿ: ಸಂಸತ್‌ ಬಜೆಟ್ ಅಧಿವೇಶನದಲ್ಲಿ ಪ್ರತಿಪಕ್ಷಗಳ ಗದ್ದಲ; 2 ಗಂಟೆಗೆ ಉಭಯ ಸದನ ಮುಂದೂಡಿಕೆ
