ವಿಡಿಯೋ ವೈರಲ್​: ಹಳಿ ಮೇಲೆ ವಿಡಿಯೋ ಮಾಡ್ತಿದ್ದಾಗ ಅವಘಡ.. ರೈಲಿಗೆ ಸಿಲುಕಿ ಯುವಕ ದುರ್ಮರಣ

ರೈಲ್ವೆ ಹಳಿ ಮೇಲೆ ನಿಂತುಕೊಂಡು ವಿಡಿಯೋ ಮಾಡ್ತಿದ್ದಾಗ ಯುವಕನ ಪ್ರಾಣವೇ ಹಾರಿಹೋಗಿರುವ(deadly passion youth making video on railway track) ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.

ಹೋಶಂಗಾಬಾದ್​​(ಮಧ್ಯಪ್ರದೇಶ): ಕೆಲವೊಂದು ಸಂದರ್ಭಗಳಲ್ಲಿ ನಾವು ಮಾಡುವ ಎಡವಟ್ಟಿನ ಹವ್ಯಾಸಗಳೇ ನಮ್ಮ ಜೀವನಕ್ಕೆ ಕುತ್ತು ತಂದುಬಿಡುತ್ತವೆ. ಇದಕ್ಕೆ ಸಾಕ್ಷಿಯಂತಿದೆ ಮಧ್ಯಪ್ರದೇಶದ ಹೋಶಂಗಾಬಾದ್​​ನಲ್ಲಿ ಭಾನುವಾರ ನಡೆದಿರುವ ಘಟನೆ.

ಹೋಶಂಗಾಬಾದ್​​​ನ ಇಟಾರ್ಸಿಯಲ್ಲಿ ಯುವಕನೋರ್ವನಿಗೆ ರೈಲು ಡಿಕ್ಕಿ(Man died in Railway track) ಹೊಡೆದು ಪ್ರಾಣ ಕಳೆದುಕೊಂಡಿದ್ದಾನೆ. ಈ ಘಟನೆಯ ವಿಡಿಯೋ ಎಲ್ಲೆಡೆ ವೈರಲ್(Video Viral)​​ ಆಗುತ್ತಿದೆ. 22 ವರ್ಷದ ಸಂಜು ಎಂಬ ಯುವಕ ತನ್ನ ಸ್ನೇಹಿತನೊಂದಿಗೆ ಇಟಾರ್ಸಿಯಲ್ಲಿರುವ ಶರದ್ದೇವರ ಭೇಟಿಗೆ ಬಂದಿದ್ದನು. ದೇಗುಲಕ್ಕೆ ತೆರಳಿ ಅಲ್ಲಿಂದ ವಾಪಸ್​​ ಬಂದಿರುವ ಇಬ್ಬರು ಅಲ್ಲಿನ ರೈಲ್ವೆ ಹಳಿ ಬಳಿ ಮೊಬೈಲ್​ನಲ್ಲಿ ವಿಡಿಯೋ ಮಾಡುತ್ತಿದ್ದರು. ಈ ವೇಳೆ ರೈಲಿಗೆ ಸಿಲುಕಿ ಸಂಜು ತನ್ನ ಪ್ರಾಣ ಕಳೆದುಕೊಂಡಿದ್ದಾನೆ.

ಹಳಿ ಮೇಲೆ ರೈಲು ಬರುತ್ತಿದ್ದಾಗ ಸಂಜು ಅದರ ಮುಂದೆ ನಿಂತುಕೊಂಡಿದ್ದು, ತನ್ನ ಸ್ನೇಹಿತನಿಗೆ ವಿಡಿಯೋ ಮಾಡುವಂತೆ ತಿಳಿಸಿದ್ದಾನೆ. ಈ ವೇಳೆ ರೈಲು ಬಡಿದು ಸಾವನ್ನಪ್ಪಿದ್ದಾನೆ. ಶವದ ಮರಣೋತ್ತರ ಪರೀಕ್ಷೆ ನಡೆಸಿ, ಈಗಾಗಲೇ ಕುಟುಂಬಸ್ಥರಿಗೆ ಹಸ್ತಾಂತರ ಮಾಡಲಾಗಿದೆ. ಇದಕ್ಕೆ ಸಂಬಂಧಿಸಿದಂತೆ ಆತನ ಸ್ನೇಹಿತನ ವಿಚಾರಣೆ ನಡೆಸಲಾಗಿದೆ ಎಂದು ಪೊಲೀಸ್​ ವರಿಷ್ಠಾಧಿಕಾರಿ ನಾಗೇಶ್ ವರ್ಮಾ ತಿಳಿಸಿದ್ದಾರೆ.