ಲಖನೌ(ಉತ್ತರ ಪ್ರದೇಶ) : ಭ್ರಷ್ಟಾಚಾರ ಪ್ರಕರಣ ಸಂಬಂಧ ಕಾನ್ಪುರ ವಿಶ್ವ ವಿದ್ಯಾಲಯದ ಉಪಕುಲಪತಿ ವಿನಯ್ ಪಾಠಕ್ ವಿರುದ್ಧ ಎಫ್ಐಆರ್ ದಾಖಲಿಸಿದ್ದ ಡೇವಿಡ್ ಮರಿಯೋ ಡೆನ್ನಿಸ್ ಅವರನ್ನು ಶುಕ್ರವಾರ ಇಡಿ ಅಧಿಕಾರಿಗಳು ಬಂಧಿಸಿದ್ದಾರೆ. ಆಗ್ರಾ ವಿಶ್ವವಿದ್ಯಾಲಯದ ಎಂಬಿಬಿಎಸ್ ಮತ್ತು ಬಿಎಎಂಎಸ್ ಪರೀಕ್ಷೆಯಲ್ಲಿ ಅಕ್ರಮ ನಡೆಸಿರುವ ಬಗ್ಗೆ ಬಂಧಿಸಿರುವುದಾಗಿ ತಿಳಿದುಬಂದಿದೆ. ಡೇವಿಡ್ ವಿರುದ್ಧ ಇಡಿ ಅಧಿಕಾರಿಗಳು ಅಕ್ರಮ ಹಣ ವರ್ಗಾವಣೆ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದಾರೆ. ಪ್ರಕರಣ ಸಂಬಂಧ ಕಳೆದ ಜೂನ್ 28ರಂದು ಆಗ್ರಾ, ಲಖನೌ, ಕಾನ್ಪುರ್, ಕಾಸ್ಗಂಜ್, ಫಿರೋಜಾಬಾದ್, ದೆಹಲಿಯ ವಿವಿದೆಡೆ ಇಡಿ ಅಧಿಕಾರಿಗಳು ದಾಳಿ ನಡೆಸಿದ್ದರು.
ಉಪ ಕುಲಪತಿ ವಿನಯ್ ಪಾಠಕ್ ದೂರಿನ ಮೇಲೆ ಬಂಧನ : ಪ್ರಕರಣ ಸಂಬಂಧ 2022ರ ಆಗಸ್ಟ್ 27ರಂದು ಆಗ್ರಾ ವಿಶ್ವ ವಿದ್ಯಾಯಲದ ಅಂದಿನ ಉಪಕುಲಪತಿಯಾಗಿದ್ದ ವಿನಯ್ ಕುಮಾರ್ ಪಾಠಕ್ ಅವರ ಸೂಚನೆ ಮೇರೆಗೆ ಗಣಿತ ವಿಭಾಗದ ಮುಖ್ಯಸ್ಥ ಸಂಜೀವ್ ಕುಮಾರ್ ಹರಿ ಪರ್ವತ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು. ಈ ಸಂಬಂಧ ಸೇಂಟ್ ಜಾನ್ ಕಾಲೇಜಿನ ಪರೀಕ್ಷಾ ಕೇಂದ್ರದಿಂದ ಉತ್ತರ ಪತ್ರಿಕೆಗಳನ್ನು ಸಾಗಿಸುತ್ತಿದ್ದ ಟೆಂಪೋ ಚಾಲಕ ದೇವೆಂದ್ರ ಎಂಬಾತನನ್ನು ಬಂಧಿಸಲಾಗಿತ್ತು. ಇವರ ಜೊತೆಗೆ ಭಿಕಂ ಸಿಂಗ್, ಶೈಲೇಂದ್ರ ಭಗೇಲ್ ಅಲಿಯಾಸ್ ಶೈಲು, ಉಮೇಶ್, ವಿದ್ಯಾರ್ಥಿ ನಾಯಕ ರಾಹುಲ್ ಪರಾಶರ್, ಶಿವಕುಮಾರ್ ದಿವಾಕರ್, ಕಾಸ್ಗಂಜ್ ನಿವಾಸಿ ಪುನೀತ್, ಕಾನ್ಪುರ್ ನಿವಾಸಿ ಅತುಲ್, ಜಾನ್ಪುರ್ ನಿವಾಸಿ ದುರ್ಗೇಶ್ ಕುಮಾರ್ನನ್ನು ಪೊಲೀಸರು ಬಂಧಿಸಿದ್ದರು.
ಪೊಲೀಸರ ತನಿಖೆಯಲ್ಲಿ, ಆರೋಪಿ ಟೆಂಪೋ ಚಾಲಕ ದೇವೇಂದ್ರ ಎಂಬಿಬಿಎಸ್ ಮತ್ತು ಬಿಎಎಂಎಸ್ ಉತ್ತರ ಪತ್ರಿಕೆಗಳನ್ನು ಒಂದು ಏಜೆನ್ಸಿಗೆ ಕಳುಹಿಸುತ್ತಿದ್ದ. ಇಲ್ಲಿ ಮಥುರಾದ ವಿದ್ಯಾರ್ಥಿ ನಾಯಕ ರಾಹುಲ್ ಪರಾಶರ್ ಈ ಉತ್ತರ ಪತ್ರಿಕೆಗಳನ್ನು ಪಡೆದುಕೊಳ್ಳುತ್ತಿದ್ದ. ಇದಾದ ಬಳಿಕ ರಾಹುಲ್ ಪರಾಶರ್ ತನ್ನ ಸಂಗಡಿಗರೊಂದಿಗೆ ಈ ಉತ್ತರ ಪತ್ರಿಕೆಗಳ ಪ್ರತಿಗಳನ್ನು ಬದಲಾಯಿಸುತ್ತಿದ್ದ ಎಂದು ತಿಳಿದುಬಂದಿದೆ. ಈ ಸಂಬಂಧ ಪೊಲೀಸರು ನ್ಯಾಯಾಲಯಕ್ಕೆ ದೋಷರೋಪ ಪಟ್ಟಿ ಸಲ್ಲಿಸಿದ್ದರು.
ಡೇವಿಡ್ ಅವರನ್ನು ಬಂಧಿಸಿದ ಇಡಿ : ಉತ್ತರ ಪತ್ರಿಕೆಗಳನ್ನು ಪಡೆಯುತ್ತಿದ್ದ ಡಿಜಿಟೆಕ್ಸ್ ಟೆಕ್ನಾಲಜೀಸ್ ಏಜೆನ್ಸಿ ಬಗ್ಗೆ ಮತ್ತು ಇದರ ವ್ಯವಸ್ಥಾಪಕ ನಿರ್ದೇಶಕ ಡೇವಿಡ್ ಬಗ್ಗೆ ವಿಚಾರಣೆಯಲ್ಲಿ ಗೊತ್ತಾದ ಬಳಿಕ ಇಡಿ ಅಧಿಕಾರಿಗಳು ಡೇವಿಡ್ನನ್ನು ಬಂಧಿಸಿದ್ದಾರೆ. ಇದಕ್ಕೂ ಮುನ್ನ ಡೇವಿಡ್ನನ್ನು ಹಲವು ಬಾರಿ ವಿಚಾರಣೆಗೆ ಕರೆಸಲಾಗಿತ್ತು. ಇವರ ಜೊತೆಗೆ ಜಾಮೀನಿನ ಮೇಲೆ ಹೊರಗಿದ್ದ ರಾಹುಲ್ ಪರಾಶರ್ ಮತ್ತು ಟೆಂಪೋ ಚಾಲಕನನ್ನು ಇಡಿ ಅಧಿಕಾರಿಗಳು ಬಂಧಿಸಿದ್ದಾರೆ.
ವಿನಯ್ ಪಾಠಕ್ ವಿರುದ್ಧ ಎಫ್ಐಆರ್ ದಾಖಲಿಸಿರುವ ಡೇವಿಡ್ : ಪ್ರಕರಣ ಸಂಬಂಧ ಸದ್ಯ ಕಾನ್ಪುರ ವಿಶ್ವವಿದ್ಯಾಲಯ ಉಪಕುಲಪತಿಯಾಗಿರುವ ವಿನಯ್ ಪಾಠಕ್ ವಿರುದ್ಧ ಡೇವಿಡ್ ಎಫ್ಐಆರ್ ದಾಖಲಿಸಿದ್ದಾರೆ.
ಕಳೆದ 2014ರಿಂದ ಆಗ್ರಾ ವಿಶ್ವವಿದ್ಯಾಲಯದ ಎಲ್ಲ ಪರೀಕ್ಷಾ ಕೆಲಸಗಳನ್ನು ಒಪ್ಪಂದದ ಮೇರೆಗೆ ಡಿಜಿಟೆಕ್ಸ್ ಕಂಪನಿ ನಡೆಸಿಕೊಂಡು ಬಂದಿದೆ. ವಿಶ್ವ ವಿದ್ಯಾಲಯದ ಎಲ್ಲಾ ಪರೀಕ್ಷೆಯ ಪತ್ರಿಕೆಗಳನ್ನು ಇಲ್ಲೇ ಮುದ್ರಿಸಿ, ಇಲ್ಲಿಂದ ವಿಶ್ವ ವಿದ್ಯಾಲಯಕ್ಕೆ ಪೂರೈಕೆ ಮಾಡಲಾಗುತ್ತಿತ್ತು ಎಂದು ಡೇವಿಡ್ ಹೇಳಿದ್ದಾರೆ. 2019ರಲ್ಲಿ ಡಿಜಿಟೆಕ್ಸ್ ಕಂಪನಿಯ ಒಪ್ಪಂದ ಮುಗಿದಿತ್ತು. ಆದರೆ 2020ರಿಂದ 2022 ವರೆಗಿನ ವಿಶ್ವ ವಿದ್ಯಾಲಯದ ಕೆಲಸಕ್ಕೆ ಕೋಟಿ ರೂ. ಬಿಲ್ ಬಾಕಿ ಇದೆ. ಇದನ್ನು ಕೇಳಿದಾಗ ಬಿಲ್ ಪಾವತಿ ಮಾಡಲು ಉಪಕುಲಪತಿ ವಿನಯ್ ಪಾಠಕ್ ಕಮಿಷನ್ಗೆ ಬೇಡಿಕೆ ಇಟ್ಟಿರುವುದಾಗಿ ಆರೋಪಿಸಿದ್ದಾರೆ.
ಈ ಸಂಬಂಧ ಎಸ್ಟಿಎಫ್ ತನಿಖೆ ಆರಂಭಿಸಿದೆ. ಅಲ್ಲದೆ ವಿನಯ್ ಪಾಠಕ್ ವಿರುದ್ಧ ಸಾಕ್ಷ್ಯಗಳನ್ನು ಕೆಲ ಹಾಕಿದೆ. ಜೊತೆಗೆ ವಿನಯ್ ಪಾಠಕ್ ಆಪ್ತರಾದ ಅಜಯ್ ಮಿಶ್ರಾ, ಅಜಯ್ ಜೈನ್, ಸಂತೋಷ್ ಸಿಂಗ್ ಅವರನ್ನು ಎಸ್ಟಿಎಫ್ ಬಂಧಿಸಿದೆ. ಈ ಪ್ರಕರಣವನ್ನು ಸಿಬಿಐ ತನಿಖೆ ನಡೆಸುತ್ತಿದೆ.
ಇದನ್ನೂ ಓದಿ : ಪ್ರತಿಭಟನೆ ವೇಳೆ ಗೋರಖ್ಪುರ ವಿವಿ ಕುಲಪತಿ, ರಿಜಿಸ್ಟ್ರಾರ್ ಮೇಲೆ ಎಬಿವಿಪಿ ಪ್ರತಿಭಟನಾಕಾರರಿಂದ ತೀವ್ರ ಹಲ್ಲೆ
