ಹೈದರಾಬಾದ್: ಸಣ್ಣ ವಯಸ್ಸಿನಲ್ಲೇ ಚೆಸ್ ಆಟದಲ್ಲಿ ಅಂತಾರಾಷ್ಟ್ರೀಯ ಖ್ಯಾತಿ ಗಳಿಸಿದ್ದ ತೆಲಂಗಾಣ ಚೆಸ್ ಆಟಗಾರ ಉಪ್ಪಳ ಪ್ರಣೀತ್ (16)ಗೆ ವಿಶ್ವ ಚೆಸ್ ಫೆಡರೇಷನ್ 'ಗ್ರ್ಯಾಂಡ್ ಮಾಸ್ಟರ್' ಪ್ರಶಸ್ತಿ ಘೋಷಿಸಿದೆ. ಇದಕ್ಕೆ ತೆಲಂಗಾಣ ಮುಖ್ಯಮಂತ್ರಿ ಕೆ.ಚಂದ್ರಶೇಖರ ರಾವ್ ಸಂತಸ ವ್ಯಕ್ತಪಡಿಸಿದ್ದಾರೆ.
ಪ್ರಣೀತ್ ಹಾಗೂ ಪೋಷಕರನ್ನು ಸಿಎಂ ಕೆಸಿಆರ್ ಸೋಮವಾರ ಸೆಕ್ರೆಟರಿಯೇಟ್‌ಗೆ ಆಹ್ವಾನಿಸಿದರು. ಭವಿಷ್ಯದಲ್ಲಿ ಚೆಸ್‌ನಲ್ಲಿ 'ಸೂಪರ್ ಗ್ರ್ಯಾಂಡ್ ಮಾಸ್ಟರ್' ಆಗಲು ಪ್ರಣೀತ್‌ಗೆ ಅಗತ್ಯವಿರುವ ತರಬೇತಿ ಮತ್ತು ಇತರ ವೆಚ್ಚಗಳಿಗಾಗಿ ಸಿಎಂ 2.5 ಕೋಟಿ ರೂ.ಗಳನ್ನು ಘೋಷಿಸಿದರು. ಅಲ್ಲದೇ ಪ್ರಣೀತ್‌ಗೆ ಅಗತ್ಯ ತರಬೇತಿ ನೀಡಿದ್ದಕ್ಕಾಗಿ ಪೋಷಕರನ್ನು ಶ್ಲಾಘಿಸಿದರು.
ಸಿಎಂ ಅಭಿನಂದನೆ: "ಪ್ರಣೀತ್‌ಗೆ ಚೆಸ್ ಮೇಲಿನ ಒಲವು ಮತ್ತು ಕಠಿಣ ಪರಿಶ್ರಮವೇ ಅವರನ್ನು ಗ್ರ್ಯಾಂಡ್ ಮಾಸ್ಟರ್ ಆಗುವಂತೆ ಮಾಡಿದೆ. ಗ್ರ್ಯಾಂಡ್ ಮಾಸ್ಟರ್ ಅವರ ವೃತ್ತಿಜೀವನ ಇನ್ನೂ ಎತ್ತರಕ್ಕೆ ಏರಲಿ. ಭವಿಷ್ಯದಲ್ಲಿ ಪ್ರಣೀತ್ ತೆಲಂಗಾಣ ಮತ್ತು ಭಾರತಕ್ಕೆ ದೊಡ್ಡ ಹೆಸರು ಮತ್ತು ಕೀರ್ತಿ ತರಲಿ" ಎಂದು ಸಿಎಂ ಹಾರೈಸಿದರು. ಈ ಸಂದರ್ಭದಲ್ಲಿ ಪ್ರಣೀತ್ ಪೋಷಕರು ಮುಖ್ಯಮಂತ್ರಿಗಳಿಗೆ ಕೃತಜ್ಞತೆ ಸಲ್ಲಿಸಿದರು.
ರಾಜ್ಯ ಸರ್ಕಾರ ಕ್ರೀಡಾ ಪಟುಗಳಿಗೆ ಪ್ರೋತ್ಸಾಹ ನೀಡುತ್ತಿದೆ. ಕ್ರೀಡಾ ಕ್ಷೇತ್ರದ ಅಭಿವೃದ್ಧಿಗೆ ಕೈಗೊಂಡಿರುವ ಕ್ರಮಗಳು ಫಲ ನೀಡುತ್ತಿವೆ ಎಂಬುದಕ್ಕೆ ಪ್ರಣೀತ್ ಗ್ರ್ಯಾಂಡ್ ಮಾಸ್ಟರ್ ಆಗಿರುವುದು ಸಾಕ್ಷಿಯಾಗಿದೆ ಎಂದು ಸಿಎಂ ಕೆಸಿಆರ್ ಹೇಳಿದರು. ಗ್ರ್ಯಾಂಡ್ ಮಾಸ್ಟರ್ ಆಗಿರುವ ಪ್ರಣೀತ್ ಅವರನ್ನು ರಾಜ್ಯ ಕ್ರೀಡಾ ಸಚಿವ ಶ್ರೀನಿವಾಸ್ ಗೌಡ್ ಕೂಡ ಅಭಿನಂದಿಸಿದ್ದಾರೆ.
ವೀರವಳ್ಳಿ ನಂದಿತಾಗೆ 50 ಲಕ್ಷ ನೆರವು: ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚೆಸ್‌ನಲ್ಲಿ ಅಮೋಘ ಸಾಧನೆ ಮಾಡಿ ವಿಶ್ವ ಚೆಸ್ ಫೆಡರೇಶನ್‌ನಿಂದ 'ವುಮನ್ ಕ್ಯಾಂಡಿಡೇಟ್ ಮಾಸ್ಟರ್' ಎಂದು ಗುರುತಿಸಿಕೊಂಡಿರುವ ವೀರ್ಲಪಲ್ಲಿ ನಂದಿತಾ (19) ಅವರನ್ನು ಸಿಎಂ ಕೆಸಿಆರ್ ಅಭಿನಂದಿಸಿದ್ದಾರೆ. ನಂದಿತಾ ಅವರು ಅಂತಾರಾಷ್ಟ್ರೀಯ ಖ್ಯಾತಿಯ ಇನ್ನೂ ಹಲವು ಶಿಖರಗಳನ್ನು ಏರಲು ಅಗತ್ಯವಿರುವ ತರಬೇತಿ ಮತ್ತು ಇತರ ವೆಚ್ಚಗಳಿಗಾಗಿ 50 ಲಕ್ಷ ರೂಪಾಯಿಗಳ ಸಹಾಯವನ್ನು ಸಿಎಂ ಘೋಷಿಸಿದ್ದಾರೆ.
ಚೆಸ್‌ನಲ್ಲಿ ಗ್ರ್ಯಾಂಡ್ ಮಾಸ್ಟರ್ (GM) ಸ್ಥಾನಮಾನ ಪಡೆಯಲು ಒಬ್ಬರು ಮೂರು ಮಾನದಂಡಗಳನ್ನು ಸಾಧಿಸಬೇಕು ಮತ್ತು 2500 Elo ರೇಟಿಂಗ್ ಅಂಕಗಳನ್ನು ಗಳಿಸಬೇಕು. ಅಜರ್‌ ಬೈಜಾನ್‌ನಲ್ಲಿ ನಡೆದ ಬಾಕು ಓಪನ್ ಟೂರ್ನಿಯಲ್ಲಿ ಪ್ರಣೀತ್ ಅದ್ಭುತ ಪ್ರದರ್ಶನ ನೀಡಿದರು. ಅವರು ಗ್ರ್ಯಾಂಡ್ ಮಾಸ್ಟರ್ ಸ್ಥಾನಮಾನಕ್ಕೆ ಅಗತ್ಯವಿರುವ 2500 ಅಲೋ ರೇಟಿಂಗ್ ಅನ್ನು ಮೀರಿಸಿದ್ದಾರೆ.
ದೇಶದ 82ನೇ ಆಟಗಾರ: ನಲ್ಗೊಂಡ ಜಿಲ್ಲೆಯ ಮಿರ್ಯಾಲಗುಡ ಮಂಡಲದ ಅಲಗಪದ ಗ್ರಾಮದ ಪ್ರಣೀತ್ ತನ್ನ 15ನೇ ವಯಸ್ಸಿನಲ್ಲಿ ಗ್ರ್ಯಾಂಡ್ ಮಾಸ್ಟರ್ ಸ್ಥಾನಮಾನವನ್ನು ಪಡೆದರು. ಈ ಸಾಧನೆ ಮಾಡಿದ ಭಾರತದ 82ನೇ ಆಟಗಾರ ಇವರು. ತೆಲಂಗಾಣ ಪ್ರತ್ಯೇಕ ರಾಜ್ಯ ರಚನೆಯಾದ ಬಳಿಕ ಪ್ರಣೀತ್ ಅವರಿಗೆ ರಾಜ್ಯದಿಂದ 5ನೇ ಗ್ರ್ಯಾಂಡ್ ಮಾಸ್ಟರ್ ಸ್ಥಾನಮಾನ ಸಿಕ್ಕಿದೆ.
ಇದನ್ನೂ ಓದಿ: ಏಷ್ಯಾ ಬುಕ್ ಆಫ್ ರೆಕಾರ್ಡ್ಗೆ ಸೇರಿ ‘ಗ್ರ್ಯಾಂಡ್ ಮಾಸ್ಟರ್’ ಬಿರುದು ಪಡೆದ 2 ವರ್ಷದ ಪೋರ..!
