ಪಾಟ್ನಾ: ಬಿಹಾರದಲ್ಲಿನ 243 ಕ್ಷೇತ್ರಗಳಿಗೆ ಮೂರು ಹಂತಗಳಲ್ಲಿ ವೋಟಿಂಗ್ ನಡೆಯುತ್ತಿದ್ದು, ಈಗಾಗಲೇ ಎರಡು ಹಂತದ ಮತದಾನ ಮುಕ್ತಾಯಗೊಂಡಿದೆ. ನವೆಂಬರ್ 7ರಂದು ಕೊನೆಯ ಹಂತದ ವೋಟಿಂಗ್ ನಡೆಯಲಿದ್ದು, ಅದಕ್ಕೂ ಮುಂಚಿತವಾಗಿ ಈಟಿವಿ ಭಾರತ ಜತೆ ಚಿರಾಗ್ ಪಾಸ್ವಾನ್ ಮಾತನಾಡಿದ್ದಾರೆ.
ಎನ್ಡಿಎ ಮೈತ್ರಿಕೂಟದಿಂದ ಹೊರಬಂದು ಏಕಾಂಗಿಯಾಗಿ ಕಣಕ್ಕಿಳಿದಿರುವ ಲೋಕ ಜನಶಕ್ತಿ ಪಕ್ಷದ ಮುಖ್ಯಸ್ಥನಾಗಿರುವ ಚಿರಾಗ್, ನಿತೀಶ್ ಕುಮಾರ್ ವಿರುದ್ಧ ವಾಗ್ದಾಳಿ ನಡೆಸಿದ್ದು, ಬಿಹಾರದಲ್ಲಿ ಎನ್ಡಿಎ ಸರ್ಕಾರ ಜೆಡಿಯು ಸಹಾಯವಿಲ್ಲದೇ ಸರ್ಕಾರ ರಚನೆ ಮಾಡಲಿದೆ ಎಂದು ತಿಳಿಸಿದ್ದಾರೆ.
ಬಿಹಾರದಲ್ಲಿ ಬಿಜೆಪಿ-ಜೆಡಿಯು ಮೈತ್ರಿ ಮಾಡಿಕೊಂಡು ಚುನಾವಣೆ ಎದುರಿಸುತ್ತಿದ್ದು, ಎಲ್ಜೆಪಿ ಏಕಾಂಗಿಯಾಗಿ ಕಣಕ್ಕಿಳಿದಿದೆ. ಈ ಹಿಂದಿನಿಂದಲೂ ನಿತೀಶ್ ಕುಮಾರ್ ವಿರುದ್ಧ ವಾಗ್ದಾಳಿ ನಡೆಸುತ್ತಿರುವ ಚಿರಾಗ್ ಇದೀಗ ಮತ್ತೊಮ್ಮೆ ಹರಿಹಾಯ್ದಿದ್ದಾರೆ. ನವೆಂಬರ್ 7ರಂದು 78 ಕ್ಷೇತ್ರಗಳಲ್ಲಿ ವೋಟಿಂಗ್ ನಡೆಯಲಿದ್ದು, ಇದರ ಫಲಿತಾಂಶ ನವೆಂಬರ್ 10ರಂದು ಬಹಿರಂಗಗೊಳ್ಳಲಿದೆ.
ಇದೇ ವೇಳೆ ತೇಜಸ್ವಿ ಯಾದವ್ ವಿರುದ್ಧ ಕೂಡ ಟೀಕಾಪ್ರಹಾರ ನಡೆಸಿರುವ ಚಿರಾಗ್, ರಾಜ್ಯದಲ್ಲಿ 10 ಲಕ್ಷ ನೌಕರಿ ನೀಡುವ ಬಗ್ಗೆ ಮಾತನಾಡುತ್ತಾರೆ. ಇದು ಹೇಗೆ ಸಾಧ್ಯ ಎಂಬುದರ ಬಗ್ಗೆ ಅವರು ಮಾತನಾಡಿಲ್ಲ. ತೇಜಸ್ವಿ ಯಾದವ್ಗೆ ಯಾವುದೇ ರೀತಿಯ ರೋಡ್ಮ್ಯಾಪ್ ಇಲ್ಲ ಎಂದು ಹೇಳಿದ್ದಾರೆ.
