ನವದೆಹಲಿ: ಉತ್ತರ ಪ್ರದೇಶದ ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್-ಬಿಎಸ್ಪಿ ಮೈತ್ರಿಗೆ ಸಂಬಂಧಿಸಿದಂತೆ ರಾಹುಲ್ ಗಾಂಧಿ ನೀಡಿದ್ದ ಹೇಳಿಕೆಗೆ ಮಾಯಾವತಿ ತಿರುಗೇಟು ನೀಡಿದ್ದಾರೆ. ನಮ್ಮ ಪಕ್ಷದ ಬಗ್ಗೆ ಮಾತನಾಡುವ ಮುನ್ನ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ನೂರು ಬಾರಿ ಯೋಚಿಸಬೇಕೆಂದು ವಾಗ್ದಾಳಿ ನಡೆಸಿದ್ದಾರೆ. ಆಡಳಿತಾರೂಢ ಬಿಜೆಪಿಗೆ ಬಿಎಸ್ಪಿ ಭಯಪಟ್ಟಿದೆ. ಹೀಗಾಗಿ ಚುನಾವಣಾ ಮೈತ್ರಿ ಮತ್ತು ಮುಖ್ಯಮಂತ್ರಿ ಪದವಿಯ ಆಹ್ವಾನ ನೀಡಿದ್ದರೂ ಒಪ್ಪಲಿಲ್ಲ ಎಂಬ ರಾಹುಲ್ ಗಾಂಧಿ ಹೇಳಿಕೆ ಸಂಪೂರ್ಣ ಸುಳ್ಳು ಎಂದು ಅವರು ಆಕ್ರೋಶ ಹೊರಹಾಕಿದರು.
ಸಂಸತ್ತಿನಲ್ಲಿ ಒತ್ತಾಯ ಪೂರ್ವಕವಾಗಿ ಪ್ರಧಾನಿಯನ್ನು ಅಪ್ಪಿಕೊಳ್ಳುವ ರಾಹುಲ್ ಗಾಂಧಿ ನಾಯಕರಂತಹ ಪಕ್ಷ ನಮ್ಮದಲ್ಲ. ಜಗತ್ತಿನಾದ್ಯಂತ ಅಪಹಾಸ್ಯಕ್ಕೆ ಒಳಗಾಗಿರುವ ಪಕ್ಷವೂ ನಮ್ಮದಲ್ಲ. ಕಾಂಗ್ರೆಸ್ ಅಧಿಕಾರದಲ್ಲಿದ್ದಾಗ ಮತ್ತು ಅಧಿಕಾರದಲ್ಲಿ ಇಲ್ಲದೇ ಇದ್ದಾಗಲೂ ಏನೂ ಮಾಡಿಲ್ಲ ಎಂದು ಕಿಡಿಕಾರಿದರು.
ಬಿಜೆಪಿ ಮತ್ತು ಆರ್ಎಸ್ಎಸ್ ಕೇವಲ 'ಕಾಂಗ್ರೆಸ್ ಮುಕ್ತ ಭಾರತ' ಮಾಡುವ ಪ್ರಯತ್ನದಲ್ಲಿಲ್ಲ. ಅವರು ತಮ್ಮ 'ವಿರೋಧ ಮುಕ್ತ' ಭಾರತ ಮಾಡಲು ಹೊರಟಿದ್ದಾರೆ. ಚೀನಾದ ರಾಜಕೀಯ ವ್ಯವಸ್ಥೆಯಂತೆ ಗ್ರಾಮದಿಂದ ರಾಷ್ಟ್ರ ಮಟ್ಟದವರೆಗೆ ಒಂದೇ ಪ್ರಬಲ ಪಕ್ಷ ಸ್ಥಾಪಿಸುವ ಗುರಿ ಹೊಂದಿದ್ದಾರೆ. ಕಾಂಗ್ರೆಸ್ ತನ್ನ ದಾರಿಯನ್ನಷ್ಟೇ ಯೋಚಿಸಬಾರದು ಮತ್ತು ತನ್ನ ಮನೆಯಲ್ಲೇ ಕುಳಿತು ನಮ್ಮ ವಿಷಯಗಳ ಬಗ್ಗೆ ಆದೇಶಿಸಬಾರದು. ರಾಹುಲ್ ಗಾಂಧಿ ಹೇಳಿಕೆಯು ದುರುದ್ದೇಶದಿಂದ ಕೂಡಿದೆ ಮತ್ತು ದಲಿತರು ಮತ್ತು ಬಿಎಸ್ಪಿಯನ್ನು ಕೀಳುಮಟ್ಟದಿಂದ ನೋಡುವುದಾಗಿದೆ ಎಂದು ಅವರು ಟೀಕಾ ಪ್ರಹಾರ ಮಾಡಿದ್ದಾರೆ.
ಇದನ್ನೂ ಓದಿ: ಮಾಯಾವತಿಗೆ ಯುಪಿ ಸಿಎಂ ಹುದ್ದೆ ಆಫರ್ ನೀಡ್ಲಾಗಿತ್ತು.. ಆದರೆ, ಸಿಐಬಿ,ಇಡಿ ಭಯದಿಂದ ಅವರು ಸ್ಪಂದಿಸಲಿಲ್ಲ : ರಾಹುಲ್ ಗಾಂಧಿ
ಖರ್ಗೆ ಪ್ರತಿಕ್ರಿಯೆ: ಬಿಜೆಪಿ ಹಾಗೂ ಆರ್ಎಸ್ಎಸ್ ದೇಶದಲ್ಲಿ ಒಂದೇ ಪಕ್ಷ ಉಳಿಯಬೇಕೆಂದು ಬಯಸುತ್ತಿದ್ದಾರೆ. ಪ್ರಜಾಪ್ರಭುತ್ವದ ಮೇಲೆ ನಂಬಿಕೆಯಳ್ಳುವರು ಬೇರೆ ಪಕ್ಷದ ಸದಸ್ಯರನ್ನು ಕಳ್ಳದಾರಿ ಮೂಲಕ ಸೆಳೆಯುವುದಿಲ್ಲ. ಆದರೆ, ಬಿಜೆಪಿ ತನಗೆ ಎಲ್ಲ ಗೆಲ್ಲಲು ಸಾಧ್ಯವಾಗಿಲ್ಲವೋ ಅಲ್ಲಿ ಬೇರೆ ಪಕ್ಷದವರನ್ನೇ ಸೆಳೆಯುವ ಕೆಲಸ ಮಾಡಿದೆ. ಮಾಯಾವತಿ ಹೇಳಿರುವುದನ್ನೇ ರಾಹುಲ್ ಗಾಂಧಿ ಕೂಡ ಹೇಳಿದ್ದಾರೆ. ಒಟ್ಟಿಗೆ ಹೋರಾಡುವುದು ಮತ್ತು ಶಕ್ತಿಯುತವಾಗಿರುವುದಕ್ಕೆ ನಾವು ಮಹತ್ವ ಕೊಡಬೇಕೆಂದು ರಾಜ್ಯಸಭೆಯ ವಿರೋಧ ಪಕ್ಷದ ನಾಯಕ, ಕಾಂಗ್ರೆಸ್ ಹಿರಿಯ ಮುಖಂಡ ಮಲ್ಲಿಕಾರ್ಜುನ ಖರ್ಗೆ ತಿಳಿಸಿದ್ದಾರೆ.
ಕಾಂಗ್ರೆಸ್ ಏನೂ ಮಾಡಿಲ್ಲ ಎಂಬ ಮಾಯಾವತಿ ಹೇಳಿಕೆ ಸರಿಯಲ್ಲ. ಕಾಂಗ್ರೆಸ್ ಪಕ್ಷ ಸದಾ ಜನತೆಯ ಜೊತೆಗಿದೆ. ಎಲ್ಲ ಸಮಸ್ಯೆಗಳ ವಿರುದ್ಧ ಸಂಸತ್ತಿನ ಹೊರಗೆ ಮತ್ತು ಒಳಗೂ ಹೋರಾಟ ಮಾಡುತ್ತಿವೆ ಎಂದು ಖರ್ಗೆ ಹೇಳಿದ್ದಾರೆ. ಇದೇ ವೇಳೆ ಬಿಎಸ್ಪಿ ಜೊತೆ ಮೈತ್ರಿಗೆ ಈಗಲೂ ಬಾಗಿಲು ತೆರೆದಿದೆಯೇ? ಎಂಬ ಪ್ರಶ್ನೆಗೆ, ಈಗ ಮಾತನಾಡಿ ಪ್ರಯೋಜನವಿಲ್ಲ. ಸಮಯ ಬಂದಾಗಲೇ ನಿರ್ಧಾರ ಮಾಡಬೇಕು ಎಂದರು.
ಇದನ್ನೂ ಓದಿ: ಪ್ರಧಾನಿ ಮೋದಿ- ಆರ್ಎಸ್ಎಸ್ ಮುಖ್ಯಸ್ಥ ಭಾಗವತ್ ಬಗ್ಗೆ ಆಕ್ಷೇಪಾರ್ಹ ಚಿತ್ರಗಳ ಫೋಸ್ಟ್
