ಡಬ್ಲಿನ್ (ಐರ್ಲೆಂಡ್): ಭಾರತೀಯ ವೇಗದ ಬೌಲರ್ ಭುವನೇಶ್ವರ್ ಕುಮಾರ್ ಟಿ-20 ಕ್ರಿಕೆಟ್ ಪವರ್ ಪ್ಲೇ ಇತಿಹಾಸದಲ್ಲೇ ಅತಿ ಹೆಚ್ಚು ವಿಕೆಟ್ ಪಡೆದು ದಾಖಲೆ ಬರೆದಿದ್ದಾರೆ.
ಇಲ್ಲಿನ ಮಾಲಾಹೈಡ್ ಕ್ರಿಕೆಟ್ ಕ್ಲಬ್ನಲ್ಲಿ ಭಾನುವಾರ ನಡೆದ ಐರ್ಲೆಂಡ್ ವಿರುದ್ಧದ ಮೊದಲ ಟಿ-20 ಪಂದ್ಯದಲ್ಲಿ ಭುವನೇಶ್ವರ್ ಕುಮಾರ್ ಈ ದಾಖಲೆ ಮಾಡಿದ್ದಾರೆ. ಇನ್ನಿಂಗ್ಸ್ನ 5ನೇ ಎಸೆತದಲ್ಲಿ ಐರ್ಲೆಂಡ್ ಕ್ಯಾಪ್ಟನ್ ಆ್ಯಂಡ್ರೂ ಬಾಲ್ಬಿರ್ನಿ ಅವರನ್ನು ಔಟ್ ಮಾಡುವ ಮೂಲಕ ಟಿ-20 ಪವರ್ ಪ್ಲೇ ನಲ್ಲಿ 34ನೇ ವಿಕೆಟ್ ಪಡೆದು ಐತಿಹಾಸಿಕ ದಾಖಲೆ ಮಾಡಿದರು.
ತಲಾ 33 ವಿಕೆಟ್ ಪಡೆದ ಮಾಜಿ ವೆಸ್ಟ್ ಇಂಡೀಸ್ ಸ್ಪಿನ್ನರ್ ಸ್ಯಾಮುಯೆಲ್ ಬಾದ್ರೀ ಮತ್ತು ನ್ಯೂಜಿಲ್ಯಾಂಡ್ ವೇಗದ ಬೌಲರ್ ಟಿಮ್ ಸೌತೀ ಅವರನ್ನು ಈ ಮೂಲಕ ಭುವನೇಶ್ವರ್ ಕುಮಾರ್ ಹಿಂದಿಕ್ಕಿದ್ದಾರೆ.
ಪಂದ್ಯದ ಬಗ್ಗೆ ನೋಡುವುದಾದರೆ, ದೀಪಕ ಹೂಡಾ ಮತ್ತು ಹಾರ್ದಿಕ ಪಾಂಡ್ಯ ಅವರ ಅತ್ಯುತ್ತಮ ಆಟದಿಂದ ಟೀಂ ಇಂಡಿಯಾ ಐರ್ಲೆಂಡ್ ವಿರುದ್ಧ ಜಯ ಗಳಿಸಿತು. ಪಂದ್ಯದ ವೇಳೆ ಮಳೆ ಬಂದ ಕಾರಣದಿಂದ ಎರಡೂ ಇನ್ನಿಂಗ್ಸ್ ತಲಾ 12 ಓವರ್ಗಳಿಗೆ ಮಾತ್ರ ಸೀಮಿತವಾಗಿದ್ದವು. ಒಂದರಿಂದ ನಾಲ್ಕನೇ ಓವರಿನವರೆಗೆ ಮಾತ್ರ ಪವರ್ ಪ್ಲೇ ನಡೆಯಿತು ಹಾಗೂ ಮೂರು ಬೌಲರ್ಗಳು ಎರಡು ಓವರ್ ಮತ್ತು ಇಬ್ಬರು ಬೌಲರ್ ಮೂರು ಓವರ್ ಬೌಲಿಂಗ್ ಮಾಡಲು ಅವಕಾಶ ನೀಡಲಾಗಿತ್ತು.
ತಮ್ಮ ಮೂರು ವಿಕೆಟ್ಗಳ ಬೌಲಿಂಗ್ನಲ್ಲಿ ಭುವನೇಶ್ವರ್ ಕುಮಾರ್ 16 ರನ್ ನೀಡಿ ಒಂದು ವಿಕೆಟ್ ಪಡೆದರು. ಹೂಡಾ 29 ಎಸೆತಗಳಲ್ಲಿ 47 ರನ್ ಹಾಗೂ ಹಾರ್ದಿಕ್ 12 ಎಸೆತಗಳಲ್ಲಿ 24 ರನ್ ಬಾರಿಸಿ ಭಾರತಕ್ಕೆ ಉತ್ತಮ ಅಡಿಪಾಯ ಹಾಕಿದ್ದರು. ಐರ್ಲೆಂಡ್ ನೀಡಿದ್ದ 109 ರನ್ಗಳ ಗುರಿಯನ್ನು 9.2 ಓವರುಗಳಲ್ಲಿ 7 ವಿಕೆಟ್ ಇರುವಂತೆಯೇ ತಲುಪಿದ ಟೀಂ ಇಂಡಿಯಾ ಭರ್ಜರಿ ಗೆಲುವು ಸಾಧಿಸಿತು.
