ಪುರಿ: ಆರ್ಥಿಕ ಬಿಕ್ಕಟ್ಟಿನ ಸುಳಿಗೆ ಸಿಲುಕಿರುವ ಯೆಸ್ ಬ್ಯಾಂಕ್ನಲ್ಲಿಟ್ಟಿರುವ ತನ್ನ 545 ಕೋಟಿ ರೂಪಾಯಿಗಳನ್ನು ಪುರಿಯ ಜಗನ್ನಾಥ ಮಂದಿರ ಗುರುವಾರ ಹಿಂಪಡೆದುಕೊಳ್ಳಲಿದೆ.
ಸದ್ಯ ಯೆಸ್ ಬ್ಯಾಂಕಿನಿಂದ ಗ್ರಾಹಕರೊಬ್ಬರು 50 ಸಾವಿರ ರೂಪಾಯಿಗಳಿಗಿಂತ ಹೆಚ್ಚು ಮೊತ್ತವನ್ನು ಹಿಂಪಡೆಯದಂತೆ ಮಿತಿ ಹೇರಲಾಗಿದೆ. ಈ ಮಿತಿಯ ನಿರ್ಬಂಧವು ಬುಧವಾರ ಸಂಜೆ 6ಕ್ಕೆ ಅಂತ್ಯಗೊಳ್ಳಲಿದೆ. ಹೀಗಾಗಿ ಗುರುವಾರದಂದು ಜಗನ್ನಾಥ ದೇವಾಲಯ ತನ್ನ ಬಹುದೊಡ್ಡ ಮೊತ್ತವನ್ನು ಹಿಂದಕ್ಕೆ ಪಡೆಯಲು ನಿರ್ಧರಿಸಿದೆ.
ಎರಡು ಪ್ರತ್ಯೇಕ ಇ-ಟ್ರಾನ್ಸಫರ್ಗಳ ಮೂಲಕ ಯೆಸ್ ಬ್ಯಾಂಕಿನಲ್ಲಿರುವ ಹಣವನ್ನು ಪುರಿಯ ಯುಕೋ ಬ್ಯಾಂಕ್ ಮುಖ್ಯ ಶಾಖೆಗೆ ವರ್ಗಾಯಿಸಲಾಗುವುದು ಎಂದು ಶ್ರೀ ಜಗನ್ನಾಥ ದೇವಸ್ಥಾನ ಆಡಳಿತ ಮಂಡಳಿಯ ಅಜಯ್ ಕುಮಾರ ಜೆನಾ ತಿಳಿಸಿದ್ದಾರೆ.
