ತಮಿಳುನಾಡಿನಲ್ಲಿ ಹಿಂದಿ ಹೇರಿಕೆ ವಿರುದ್ಧದ ಟಿ-ಶರ್ಟ್​ಗಳಿಗೆ ಭಾರೀ ಬೇಡಿಕೆ!

ತಮಿಳುನಾಡಿನಲ್ಲಿ ಹಿಂದಿ ಹೇರಿಕೆಯ ವಿರುದ್ಧ ಘೋಷಣೆಗಳನ್ನು ಹೊಂದಿರುವ ಟಿ-ಶರ್ಟ್​‌ಗಳ ಬೇಡಿಕೆ ಹೆಚ್ಚಾಗಿದ್ದು, ಅವುಗಳನ್ನು ಧರಿಸಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಮಾಡಲಾಗುತ್ತಿದೆ.

ಚೆನ್ನೈ: ಪ್ರಸಿದ್ಧ ಸಿನಿ ಸಂಗೀತ ಸಂಯೋಜಕ ಯುವನ್ ಶಂಕರ್ ರಾಜ ಮತ್ತು 'ಮೆಟ್ರೋ' ಚಲನಚಿತ್ರ ನಟ ಸಿರಿಶ್ ಸರವಣನ್ ಹಿಂದಿ ಹೇರಿಕೆಯ ವಿರುದ್ಧ ಘೋಷಣೆಗಳೊಂದಿಗೆ ಟಿ-ಶರ್ಟ್ ಧರಿಸಿದ ಫೋಟೋಗಳು ವೈರಲ್ ಆಗಿವೆ. ಇದು ರಾಜ್ಯದಲ್ಲಿ ಚರ್ಚೆಯ ವಿಷಯವಾಗಿ ಮಾರ್ಪಟ್ಟಿದೆ.

ಸೆಪ್ಟೆಂಬರ್ 5ರಂದು, ಸರವಣನ್ ಅವರು ಯುವನ್ ಶಂಕರ್ ರಾಜಾ ಅವರೊಂದಿಗೆ ಇರುವ ತಮ್ಮ ಚಿತ್ರವನ್ನು ಟ್ವೀಟ್ ಮಾಡಿದ್ದಾರೆ. ಇದರಲ್ಲಿ ಇಬ್ಬರೂ ಹಿಂದಿ ಹೇರಿಕೆಯ ವಿರುದ್ಧದ ಘೋಷಣೆಗಳನ್ನು ಹೊಂದಿರುವ ಟಿ-ಶರ್ಟ್ ಧರಿಸಿದ್ದರು.

ಫೋಟೋಗಳನ್ನು ಪೋಸ್ಟ್ ಮಾಡಿದ ಕೂಡಲೇ ಅವರ ಆಸಕ್ತಿದಾಯಕ ಬಟ್ಟೆಯ ಆಯ್ಕೆಯಿಂದಾಗಿ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಲು ಪ್ರಾರಂಭಿಸಿತು. ಇತರರು ಸಹ ಇದೇ ರೀತಿಯ ಟಿ-ಶರ್ಟ್ ಧರಿಸಿ ತಮ್ಮ ಚಿತ್ರಗಳನ್ನು ಪೋಸ್ಟ್ ಮಾಡಲು ಪ್ರಾರಂಭಿಸಿದಾಗ ಈ ಪ್ರವೃತ್ತಿ ಹೆಚ್ಚಾಯಿತು.

ಐಶ್ವರ್ಯ ರಾಜೇಶ್, ಶಾಂತನು ಭಾಗ್ಯರಾಜ್, ಕರುಣಾಕರನ್, ವೆಟ್ರಿಮಾರನ್ ಸೇರಿದಂತೆ ತಮಿಳು ಚಿತ್ರರಂಗದ ಪ್ರಸಿದ್ಧ ವ್ಯಕ್ತಿಗಳು 'ನನಗೆ ಹಿಂದಿ ಗೊತ್ತಿಲ್ಲ', ಮತ್ತು 'ನಾನು ತಮಿಳು ಮಾತನಾಡುವ ಭಾರತೀಯ' ಎಂಬ ಘೋಷಣೆಗಳಿರುವ ಟಿ-ಶರ್ಟ್ ಧರಿಸಿ ತಮ್ಮ ಚಿತ್ರಗಳನ್ನು ಪೋಸ್ಟ್ ಮಾಡುತ್ತಿದ್ದಾರೆ.

ಡಿಎಂಕೆ ನಾಯಕಿ ಕನಿಮೋಳಿ ಮತ್ತು ಉದಯನಿಧಿ ಸ್ಟಾಲಿನ್ ಕೂಡ ಇದೇ ರೀತಿಯ ಫೋಟೋಗಳನ್ನು ಅಪ್‌ಲೋಡ್ ಮಾಡುತ್ತಿರುವುದು ಕಂಡು ಬಂದಿದೆ.

ತಮಿಳುನಾಡಿನಲ್ಲಿ "ಹಿಂದಿ ಹೇರಿಕೆ" ವಿರೋಧಿಸುವ ಸಲುವಾಗಿ ಕಾಲಿವುಡ್ ತಾರೆಗಳು ಮತ್ತು ರಾಜಕಾರಣಿಗಳು ಟಿ-ಶರ್ಟ್ ಧರಿಸಲು ಮುಂದಾಗಿದ್ದಾರೆ.