ಮಳೆಯಿಂದ ರಸ್ತೆ ಹಾಳು... ರೋಗಿಯನ್ನು 25 ಕಿ.ಮೀ ಹೆಗಲ ಮೇಲೆ ಹೊತ್ತು ಆಸ್ಪತ್ರೆಗೆ ಸಾಗಿಸಿದ ಜನ..!

ಮಳೆಯಿಂದ ರಸ್ತೆ ಹಾಳಾದ ಹಿನ್ನೆಲೆಯಲ್ಲಿ ಸುಮಾರು 25 ಕಿ.ಮೀ ರೋಗಿಯನ್ನು ಹೆಗಲ ಮೇಲೆ ಹೊತ್ತು ಆಸ್ಪತ್ರೆ ಸೇರಿಸಿರುವ ಘಟನೆ ಕೇರಳದಲ್ಲಿ ನಡೆದಿದೆ.

ಇಡುಕ್ಕಿ:ಮಳೆಯಿಂದ ರಸ್ತೆ ಹಾಳಾದ ಕಾರಣ ರೋಗಿಯನ್ನು ಹೆಗಲ ಮೇಲೆ ಹೊತ್ತು ಸುಮಾರು 25 ಕಿ.ಮೀ. ನಡೆದು ಆಸ್ಪತ್ರೆಗೆ ಸೇರಿಸಿರುವ ದಾರುಣ ಘಟನೆ ಕೇರಳ ರಾಜ್ಯದ ಇಡುಕ್ಕಿ ಜಿಲ್ಲೆಯ ಎಡಮಲಕುಕ್ಡಿ ಯಲ್ಲಿ ನಡೆದಿದೆ.

ಅಂಡವಾಂಕುಡಿ ನಿವಾಸಿಯಾದ ನಟರಾಜನ್​ ತೀವ್ರ ಜ್ವರದಿಂದ ಬಳಲುತ್ತಿದ್ದು, ಊರಿನಲ್ಲಿ ರಸ್ತೆ ಸರಿಯಿಲ್ಲದ ಕಾರಣ ಯಾವುದೇ ವಾಹನ ಅಲ್ಲಿಗೆ ಬರಲಾಗಿಲ್ಲ. ಈ ಹಿನ್ನೆಲೆ ಸುಮಾರು 50 ಜನರು ಸೇರಿ ಬಟ್ಟೆಯಿಂದ ತಯಾರಿಸಿದ ಸ್ಟ್ರೆಚರ್​ ನಲ್ಲಿ ಕಾಡಿನ ಮಾರ್ಗದ ಮೂಲಕ ಅವರನ್ನ ಸುಮಾರು 25 ಕಿ.ಮೀ. ದೂರ ಹೆಗಲ ಮೇಲೆ ಹೊತ್ತು ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಕಳೆದ ಆಗಸ್ಟ್​ನಲ್ಲಿ ಸುರಿದ ಭಾರೀ ಮಳೆಯಿಂದಾಗಿ ಎಡಮಲಕುಕ್ಡಿ ಹಾಗೂ ಪೆಟ್ಟಿಮುಡಿ ನಡುವಿನ ರಸ್ತೆ ಮಾರ್ಗ ಸಂಪೂರ್ಣ ಹಾಳಾಗಿದೆ. ಹೀಗಾಗಿ ಈ ಭಾಗದ ಜನ ಕಾಡು ಪ್ರಾಣಿಗಳಿರುವ ಕಾಡಿನ ಮಧ್ಯೆಯೇ ಕಾಲ್ನಡಿಗೆಯಲ್ಲೆ ಜೀವಭಯದಿಂದ ತೊರುಗಾಡುವಂತ ದಾರುಣ ಪರಿಸ್ಥಿತಿ ಎದುರಾಗಿದ್ದು, ತಕ್ಷಣವೇ ರಸ್ತೆ ಮಾರ್ಗ ಸರಿ ಪಡಿಸುವಂತೆ ಇಲ್ಲಿನ ಜನ ಒತ್ತಾಯಿಸಿದ್ದಾರೆ.