ಪಾಕಿಸ್ತಾನದ​ ಮಂತ್ರಿಯಿಂದಲೇ 'ಉಗ್ರ' ಸತ್ಯ ಬಹಿರಂಗ!

ಪಾಕಿಸ್ತಾನದ ನ್ಯಾಷನಲ್ ಅಸೆಂಬ್ಲಿಯಲ್ಲಿ ಅಲ್ಲಿನ ಸಚಿವನೋರ್ವ ಪ್ರಧಾನಿ ಇಮ್ರಾನ್​​ ಖಾನ್​ ಅವರ ನಿಜ ಸ್ವರೂಪವನ್ನು ಬಯಲು ಮಾಡಿದ್ದಾರೆ. ಪುಲ್ವಾಮಾ ಮೇಲೆ ದಾಳಿ ಮಾಡಿದ್ದೇ ಇಮ್ರಾನ್​ ಸರ್ಕಾರದ ಅತಿದೊಡ್ಡ ಸಾಧನೆ ಎಂದು ಪಾಕಿಸ್ತಾನದ ಮುಖವಾಡವನ್ನು ಕಳಚಿದ್ದಾರೆ.

ಇಸ್ಲಾಮಾಬಾದ್ (ಪಾಕಿಸ್ತಾನ): 2019 ಫೆಬ್ರವರಿ 14ರಂದು ಭಾರತದ ಸೈನಿಕರ ಮೇಲೆ ನಡೆದ ಪುಲ್ವಾಮಾ ದಾಳಿ ಇಮ್ರಾನ್​ ಖಾನ್ ನೇತೃತ್ವದ ಪಾಕ್​ ಸರ್ಕಾರದ ಅತಿ ದೊಡ್ಡ ಸಾಧನೆ ಎಂದು ನ್ಯಾಷನಲ್​ ಅಸೆಂಬ್ಲಿಯಲ್ಲಿ ಪಾಕಿಸ್ತಾನ ಮಂತ್ರಿ ಫವಾದ್ ಚೌಧರಿ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.

ಮಾಹಿತಿ ಮತ್ತು ಪ್ರಚಾರ ಖಾತೆ ಸಚಿವರಾಗಿರುವ ಅವರು ಈ ರೀತಿಯಾಗಿ ಹೇಳಿಕೆ ನೀಡಿದ್ದು ಮಾತ್ರವಲ್ಲದೆ ಇಂತಹ ನಾಯಕನ ಬಗ್ಗೆ ದೇಶವೇ ಹೆಮ್ಮೆ ಪಡಬೇಕು ಎಂದಿದ್ದು, ಪಾಕಿಸ್ತಾನದ ಭೂ ಪ್ರದೇಶದೊಳಗೆ ಭಾರತ ಅತಿಕ್ರಮಿಸಿತ್ತು ಎಂಬ ಉದ್ಧಟತನದ ಹೇಳಿಕೆ ನೀಡಿದ್ದಾರೆ.

ಈ ಮೂಲಕ ಭಾರತದ 40ಕ್ಕೂ ಹೆಚ್ಚು ಯೋಧರು ಹುತಾತ್ಮರಾಗಲು ಕಾರಣವಾದ ಪುಲ್ವಾಮಾ ದಾಳಿಯಲ್ಲಿ ಪಾಕಿಸ್ತಾನದ ಪಾತ್ರ ಇದೆ ಎಂದು ಸ್ವತಃ ಕಪಟಿ ಪಾಕ್​ ಒಪ್ಪಿಕೊಂಡಂತಾಗಿದೆ.