ದೆಹಲಿ: ಜನವರಿ 26 ರಂದು ರಾಜಧಾನಿಯಲ್ಲಿ ನಡೆಯುವ ಗಣರಾಜ್ಯೋತ್ಸವದ ಪಥಸಂಚಲನದಲ್ಲಿ ದೆಹಲಿಯ ಮೂರು ಶಾಲೆಗಳು ಮತ್ತು ರಾಜಸ್ಥಾನದ ಉದಯಪುರ ಕೇಂದ್ರದ ಶಾಲಾ ಮಕ್ಕಳು ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ.
ರಾಜಧಾನಿಯಲ್ಲಿ ನಡೆಯುವ ಗಣರಾಜ್ಯೋತ್ಸವದ ಪಥಸಂಚಲನಕ್ಕೆ ರಕ್ಷಣಾ ಸಚಿವಾಲಯ ಮತ್ತು ದೆಹಲಿ ಸರ್ಕಾರ, ವಿವಿಧ ಶಾಲೆಗಳಿಂದ 636 ಮಕ್ಕಳನ್ನು (474 ಬಾಲಕಿಯರು ಮತ್ತು 162 ಬಾಲಕರು) ಆಯ್ಕೆ ಮಾಡಲಾಗಿದೆ ಎಂದು ರಕ್ಷಣಾ ಸಚಿವಾಲಯ ಶುಕ್ರವಾರ ತಿಳಿಸಿದೆ. ದೆಹಲಿಯ ಮಾಡೆಲ್ ಟೌನ್‌ನ ಡಿಎವಿ ಸೆಂಟೆನರಿ ಪಬ್ಲಿಕ್ ಶಾಲೆಯ ವಿದ್ಯಾರ್ಥಿಗಳು, ಉದಯಪುರದ ಪಶ್ಚಿಮ ವಲಯ ಸಾಂಸ್ಕೃತಿಕ ಕೇಂದ್ರದ ಹೊರತಾಗಿ ಬಂಗಾಳಿ ಹಿರಿಯ ಮಾಧ್ಯಮಿಕ ಶಾಲೆ, ಸರೋಜಿನಿ ನಗರ, ಮತ್ತು ಜನಕ್‌ಪುರಿಯ ಸರ್ವೋದಯ ಕನ್ಯಾ ವಿದ್ಯಾಲಯ ಗಣರಾಜ್ಯೋತ್ಸವದಲ್ಲಿ ಭಾಗವಹಿಸಲಿದ್ದಾರೆ.
ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಈಗಿಂದಲೇ ಸಿದ್ಧತೆ ನಡೆಸುತ್ತಿದ್ದು, "ಯೋಗ್ - ವಿಶ್ವ ಶಕ್ತಿ ಕಿ ಓರೆ" ಡಿಎವಿ ಶತಮಾನೋತ್ಸವ ಸಾರ್ವಜನಿಕ ಶಾಲೆಯ ವಿಷಯವಾಗಿದ್ದರೆ, ಬಂಗಾಳಿ ಹಿರಿಯ ಮಾಧ್ಯಮಿಕ ಶಾಲೆಯು ಬೌಲ್ಸ್(ಐತಿಹಾಸಿಕ ಬಂಗಾಳ ಪ್ರದೇಶದಲ್ಲಿ ಕಂಡುಬರುವ ಮಧ್ಯಕಾಲೀನ ಯುರೋಪಿಯನ್ ಮನರಂಜನೆಕಾರರ ತಂಡ) ಎಂಬ ವಿಷಯವನ್ನು ಆಯ್ಕೆ ಮಾಡಿಕೊಂಡಿದೆ.
ಜನಕ್ ಪುರಿಯ ಸರ್ವೋದಯ ಕನ್ಯಾ ವಿದ್ಯಾಲಯದ ಮಕ್ಕಳು ಮಹರೋ ರಂಗ್ ರಂಗೀಲೋ ರಾಜಸ್ಥಾನ ಎಂಬ ವಿಷಯವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಇನ್ನು ಉದಯಪುರದ ಪಶ್ಚಿಮ ವಲಯದ ಸಾಂಸ್ಕೃತಿಕ ಕೇಂದ್ರವು ಮೆರವಣಿಗೆಯಲ್ಲಿ ಗಾರ್ಬಾ - ಗುಜರಾತ್‌ನ ಜಾನಪದ ನೃತ್ಯವನ್ನು ಪ್ರಸ್ತುತಿ ಪಡಿಸುತ್ತಿದೆ.
