ಹೈದರಾಬಾದ್; ಡೆಡ್ಲಿ ಕೊರೊನಾ ವೈರಸ್ಗೆ ಔಷಧಿ, ವ್ಯಾಕ್ಸಿನ್ ಕಂಡು ಹಿಡಿಯುವ ನಿಟ್ಟಿನಲ್ಲಿ ವಿಶ್ವಾದ್ಯಂತ ಹಲವಾರು ಸಂಶೋಧನೆಗಳು ನಡೆದಿವೆ. ಈ ಮಧ್ಯೆ ನ್ಯಾನೊಸ್ಪಾಂಜ್ಗಳನ್ನು ಬಳಸಿ ಕೊರೊನಾ ವೈರಸ್ ವಿರುದ್ಧ ಹೋರಾಡುವ ವ್ಯವಸ್ಥೆಯೊಂದನ್ನು ಅಮೆರಿಕದ ವಿಜ್ಞಾನಿಗಳು ಅಭಿವೃದ್ಧಿಪಡಿಸುತ್ತಿರುವುದು ಆಶಾದಾಯಕ ಬೆಳವಣಿಗೆಯಾಗಿದೆ.
ಮಾನವ ಶ್ವಾಸಕೋಶದ ಜೀವಕೋಶಗಳ ಪೊರೆಯಲ್ಲಿ (human lung cell membranes) ಮತ್ತು ಮಾನವ ಪ್ರತಿರಕ್ಷಣಾ ಕೋಶಗಳ ಪೊರೆಯಲ್ಲಿ (human immune cell membranes) ಸೇರಿಸಲಾದ ನ್ಯಾನೊಪಾರ್ಟಿಕಲ್ಗಳು ಕೋವಿಡ್-19 ವೈರಸ್ ಅನ್ನು ತಮ್ಮೆಡೆಗೆ ಸೆಳೆದು ಅದನ್ನು ತಟಸ್ಥಗೊಳಿಸಬಲ್ಲವು ಹಾಗೂ ಮಾನವ ಶರೀರದ ಜೀವಕೋಶಗಳನ್ನು ಹೊಕ್ಕು ವೈರಸ್ನ ಸಂತಾನೋತ್ಪತ್ತಿ ಮಾಡುವ ಸಾಮರ್ಥ್ಯವನ್ನು ನಾಶಪಡಿಸಬಲ್ಲವು ಎಂದು "ನ್ಯಾನೊ ಲೆಟರ್ಸ್" ಜರ್ನಲ್ನಲ್ಲಿ ಪ್ರಕಟವಾದ ವರದಿಯಲ್ಲಿ ಹೇಳಲಾಗಿದೆ. ಸ್ಯಾನ್ ಡಿಯೆಗೊ ಯುನಿವರ್ಸಿಟಿ ಆಫ್ ಕ್ಯಾಲಿಫೋರ್ನಿಯಾದ ಎಂಜಿನೀಯರ್ಗಳು ಇಂಥ ನ್ಯಾನೊಸ್ಪಾಂಜ್ಗಳನ್ನು ಅಭಿವೃದ್ಧಿಪಡಿಸಿದ್ದು, ಬೋಸ್ಟನ್ ಯುನಿವರ್ಸಿಟಿಯ ವಿಜ್ಞಾನಿಗಳು ಇವುಗಳನ್ನು ಬಳಸಿ ಸಂಶೋಧನೆ ಕೈಗೊಂಡಿದ್ದಾರೆ.
ನ್ಯಾನೊ-ಸ್ಕೇಲ್ ಪಾರ್ಟಿಕಲ್ಗಳು ರೋಗಕಾರಕಗಳು ಮತ್ತು ಜೀವಾಣುಗಳನ್ನು ಹೀರಿಕೊಳ್ಳುವುದರಿಂದ ಇವನ್ನು "ನ್ಯಾನೊಸ್ಪಾಂಜಸ್" ಎಂದು ಯುಸಿ ಸ್ಯಾನ್ ಡಿಯೆಗೊ ಸಂಶೋಧಕರು ಹೆಸರಿಸಿದ್ದಾರೆ.
ಪ್ರಯೋಗಾಲಯದಲ್ಲಿ ನಡೆಸಲಾದ ಪ್ರಯೋಗಗಳ ಸಂದರ್ಭದಲ್ಲಿ, ಶ್ವಾಸನಾಳ ಜೀವಕೋಶ ಹಾಗೂ ಪ್ರತಿರಕ್ಷಣಾ ಕೋಶ ಮಾದರಿಯ ನ್ಯಾನೊಸ್ಪಾಂಜ್ಗಳು ಡೋಸ್-ಅವಲಂಬಿತವಾಗಿ ಕೋವಿಡ್-19 ವೈರಸ್ನ ಸಾಂಕ್ರಾಮಿಕ ಹರಡುವಿಕೆಯ ಸಾಮರ್ಥ್ಯವನ್ನು (viral infectivity) ಶೇ 90 ರಷ್ಟು ಹಾಳು ಮಾಡಿದ್ದವು. ದಾಳಿ ಮಾಡುವ ಶರೀರದ ಜೀವಕೋಶಗಳನ್ನು ಹೊಕ್ಕು ಅವುಗಳಲ್ಲಿ ತಮ್ಮ ಸಂಖ್ಯೆಯನ್ನು ಬೆಳೆಸುವ ವೈರಸ್ಗಳ ಗುಣವನ್ನು ಸಾಂಕ್ರಾಮಿಕ ಹರಡುವಿಕೆಯ ಸಾಮರ್ಥ್ಯ ಎಂದು ಕರೆಯಲಾಗುತ್ತದೆ.
ವೈರಸ್ಗಳನ್ನೇ ಗುರಿಯಾಗಿಸಿಕೊಳ್ಳುವ ಬದಲು ಈ ನ್ಯಾನೊ ಸ್ಪಾಂಜ್ಗಳು, ವೈರಸ್ ದಾಳಿಗೆ ತುತ್ತಾಗಬಹುದಾದ ಆರೋಗ್ಯವಂತ ಜೀವಕೋಶಗಳನ್ನು ಸಂರಕ್ಷಣೆ ಮಾಡುತ್ತವೆ. "ಸಾಂಕ್ರಾಮಿಕ ರೋಗಗಳಿಗೆ ಔಷಧಿ ಕಂಡು ಹಿಡಿಯಲು, ರೋಗ ಉಂಟುಮಾಡುವ ಜೀವಾಣುವನ್ನು ಆಳವಾಗಿ ಅಧ್ಯಯನ ಮಾಡುವ ಕ್ರಮವನ್ನು ಬಹಳ ಹಿಂದಿನಿಂದಲೂ ಅನುಸರಿಸಲಾಗುತ್ತಿದೆ. ಆದರೆ ನಮ್ಮ ಕಾರ್ಯಶೈಲಿ ಭಿನ್ನವಾಗಿದೆ. ವೈರಸ್ ದಾಳಿಗೆ ತುತ್ತಾಗಬಹುದಾದ ಜೀವಕೋಶಗಳನ್ನು ಗುರುತಿಸುವುದೇ ನಮ್ಮ ಮುಖ್ಯ ಗುರಿಯಾಗಿದೆ. ನಂತರ ಆ ಜೀವಕೋಶಗಳನ್ನು ಸಂರಕ್ಷಿಸುವ ವ್ಯವಸ್ಥೆ ಅಭಿವೃದ್ಧಿಪಡಿಸುವತ್ತ ನಾವು ಗಮನಹರಿಸುತ್ತೇವೆ." ಎಂದು ಯುಸಿ ಸ್ಯಾನ್ ಡಿಯೆಗೊ ಜಾಕೋಬ್ಸ್ ಸ್ಕೂಲ್ ಆಫ್ ಎಂಜಿನೀಯರಿಂಗ್ನ ನ್ಯಾನೊ ಎಂಜಿನೀಯರಿಂಗ್ ಪ್ರಾಧ್ಯಾಪಕ ಲಿಯಾಂಗಫಾಂಗ್ ಝಾಂಗ್.
ಲಿಯಾಂಗಫಾಂಗ್ ತಮ್ಮ ಪ್ರಯೋಗಾಲಯದಲ್ಲಿ ಬಯೋಮಿಮೆಟಿಕ್ ನ್ಯಾನೊಸ್ಪಾಂಜ್ಗಳನ್ನು ದಶಕದ ಹಿಂದೆಯೇ ಅಭಿವೃದ್ಧಿಪಡಿಸಿದ್ದು, ಹಲವಾರು ರೀತಿಯಲ್ಲಿ ಬಳಸಲು ಸಂಶೋಧನೆ ನಡೆಸುತ್ತಿದ್ದಾರೆ. ಕೊರೊನಾ ವೈರಸ್ ಮಹಾಮಾರಿ ಕಾಣಿಸಿಕೊಂಡ ನಂತರ ತಕ್ಷಣವೇ ನ್ಯಾನೊಸ್ಪಾಂಜ್ಗಳನ್ನು ಇದರ ತಡೆಗಟ್ಟುವಿಕೆಗಾಗಿ ಪ್ರಯೋಗಿಸಬಹುದು ಎಂಬ ವಿಚಾರ ಲಿಯಾಂಗಫಾಂಗ್ ಅವರಿಗೆ ಹೊಳೆದಿತ್ತು.
ಪ್ರತಿಯೊಂದು ಕೋವಿಡ್-19 ನ್ಯಾನೊಸ್ಪಾಂಜ್ ಮಾನವನ ಒಂದು ಕೂದಲೆಳೆಯ ಅಗಲಕ್ಕಿಂತ ಸಾವಿರ ಪಟ್ಟು ಸಣ್ಣದಾಗಿರುತ್ತದೆ. ಶ್ವಾಸಕೋಶದ ಎಪಿಥೆಲಿಯಲ್ ಟೈಪ್-2 ಜೀವಕೋಶಗಳು ಅಥವಾ ಮ್ಯಾಕ್ರೊಫೇಜ್ ಸೆಲ್ಗಳಿಂದ ಹೊರತೆಗೆಯಲಾದ ಪಾಲಿಮರ್ ಕೋರ್ ಕೋಟಿಂಗ್ ಮಾಡಲಾದ ಸೆಲ್ ಮೆಂಬ್ರೇನ್ಗಳನ್ನು ಈ ನ್ಯಾನೊಸ್ಪಾಂಜ್ಗಳು ಹೊಂದಿರುತ್ತವೆ.
ಕೊರೊನಾ ವೈರಸ್ ವಿರುದ್ಧ ಪ್ರಯೋಗಿಸಲು ವಿಭಿನ್ನ ಸಾಮರ್ಥ್ಯದ ನ್ಯಾನೊಸ್ಪಾಂಜ್ಗಳನ್ನು ಸಂಶೋಧಕರು ತಯಾರಿಸಿದ್ದಾರೆ. ನ್ಯಾನೊಸ್ಪಾಂಜ್ಗಳು ಕೋವಿಡ್-19 ವೈರಸ್ನ ಪ್ರಭಾವವನ್ನು ಕಡಿಮೆ ಮಾಡುವ ಸಾಮರ್ಥ್ಯವನ್ನು ಸ್ವತಂತ್ರವಾಗಿ ಅಧ್ಯಯನ ಮಾಡುವಂತೆ ಬೋಸ್ಟನ್ ಯುನಿವರ್ಸಿಟಿಯ ನ್ಯಾಷನಲ್ ಎಮರ್ಜಿಂಗ್ ಇನ್ಫೆಕ್ಷಿಯಸ್ ಡಿಸೀಸ್ ಲ್ಯಾಬೊರೇಟರಿಗೆ (National Emerging Infectious Diseases Laboratories -NEIDL) ಆಹ್ವಾನ ನೀಡಲಾಗಿತ್ತು.
ಉನ್ನತ ಮಟ್ಟದ ಜೈವಿಕ ಸುರಕ್ಷತಾ ಪ್ರಮಾಣೀಕರಿಸಿದ BSL-4 ಪ್ರಯೋಗಾಲಯವನ್ನು ಎನ್ಇಐಡಿಎಲ್ ಹೊಂದಿದೆ. ಬೋಸ್ಟನ್ ವಿವಿಯ ಸಹಪ್ರಾಧ್ಯಾಪಕ ಅಂಥೋನಿ ಗ್ರಿಫಿತ್ಸ್ ಇಲ್ಲಿ ನ್ಯಾನೊಸ್ಪಾಂಜ್ಗಳ ಕುರಿತು ಅಧ್ಯಯನ ನಡೆಸಿದ್ದಾರೆ.
ಈ ನ್ಯಾನೊಸ್ಪಾಂಜ್ಗಳು ಯಾವುದೇ ರೀತಿಯ ಕೊರೊನಾ ವೈರಸ್ ಅಥವಾ ಬೇರಾವುದೇ ರೀತಿಯ ಶ್ವಾಸಕೋಶದ ವೈರಸ್ಗಳು ಸೇರಿದಂತೆ ಭವಿಷ್ಯದಲ್ಲಿ ಎರಗಬಹುದಾದ ಹೊಸ ಶ್ವಾಸಕೋಶದ ವೈರಸ್ಗಳ ವಿರುದ್ಧ ಸಮರ್ಥವಾಗಿ ಹೋರಾಡಬಲ್ಲವು ಎಂದು ಸಂಶೋಧಕರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
