ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ಮಾಧ್ಯಮದ ಕತ್ತು ಹಿಸುಕುವ ದೃಷ್ಟಿಯಿಂದಲೇ 'ಈಟಿವಿ ಭಾರತ' ವರದಿಗಾರನ ವಿರುದ್ಧ ದೂರುಗಳನ್ನು ದಾಖಲಿಸಲಾಗಿದೆ ಎಂದು ಕಲ್ಕತ್ತಾ ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ. ಬೀರ್ಭೂಮ್ ಜಿಲ್ಲೆಗೆ ಸೇರಿದ ಈಟಿವಿ ಭಾರತ ವರದಿಗಾರ ಅಭಿಷೇಕ್ ದತ್ತಾ ರಾಯ್ ಅವರ ಜಾಮೀನು ಅರ್ಜಿ ವಿಚಾರಣೆ ವೇಳೆ ಈ ರೀತಿಯಾಗಿ ಕೋರ್ಟ್ ವ್ಯಾಖ್ಯಾನ ನೀಡಿದೆ.
ಅಭಿಷೇಕ್ ಪರವಾಗಿ ನ್ಯಾಯವಾದಿಗಳಾದ ಜಯಂತ ನಾರಾಯಣ ಚಟ್ಟೋಪಾಧ್ಯಾಯ, ನಜೀರ್ ಅಹ್ಮದ್ ವಾದ ಮಂಡಿಸಿದ್ದರು. ವಾದ ಮಂಡನೆಯಾದ ನಂತರ ನ್ಯಾಯಮೂರ್ತಿ ವಿವೇಕ್ ಚೌಧರಿ, ನ್ಯಾಯಮೂರ್ತಿ ಸೌಮೇಂದ್ರ ಸೇನ್ ಅವರಿದ್ದ ಪೀಠ ಈ ದೂರುಗಳು ಅಕ್ರಮವೆಂದು ಅಭಿಪ್ರಾಯಪಟ್ಟು, ಈಟಿವಿ ಭಾರತ ವರದಿಗಾರನಿಗೆ ಜಾಮೀನು ಮಂಜೂರು ಮಾಡಿದೆ.
ಅಕ್ರಮ ಚಟುವಟಿಕೆಗಳಿಗೆ ಸಂಬಂಧಿಸಿದಂತೆ ಸರಿಯಾಗಿ ಸುದ್ದಿಯನ್ನು ಪ್ರಕಟಿಸುವ ಹಕ್ಕು ಮಾಧ್ಯಮಗಳಿಗಿದೆ. ಅಕ್ರಮಗಳ ವಿರುದ್ಧದ ತನಿಖೆಗಾಗಿ ಈ ಸುದ್ದಿಗಳು ಸಹಕರಿಸುತ್ತವೆ. ಇದನ್ನು ಹೊರತುಪಡಿಸಿ ಮಾಧ್ಯಮಗಳ ಕತ್ತು ಹಿಸುಕಲು ದೂರುಗಳು ದಾಖಲಾಗಿರುವುದು ಗೊತ್ತಾಗುತ್ತಿದೆ.
- ಕಲ್ಕತ್ತಾ ಹೈಕೋರ್ಟ್
ವಿಚಾರಣೆಗೆ ಆದೇಶ
ಈಟಿವಿ ಭಾರತ ವರದಿಗಾರ ಅಭಿಷೇಕ್ ಮೇಲೆ ಎಫ್ಐಆರ್ ದಾಖಲಿಸಿದ ವಿಚಾರಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸಬೇಕೆಂದು ಬೀರ್ಭೂಮ್ ಎಸ್ಪಿಗೆ ಹೈಕೋರ್ಟ್ ಆದೇಶ ನೀಡಿದೆ. ಇದರ ಜೊತೆಗೆ ವರದಿಗಾರರು ಬೆಳಕಿಗೆ ತಂದಿದ್ದ ಅಕ್ರಮ ಮರಳು ದಂಧೆಯ ಬಗ್ಗೆ ತನಿಖೆ ನಡೆಸಬೇಕೆಂದು ಆದೇಶಿಸಿದೆ.
ನಡೆದಿದ್ದೇನು?
ಈಟಿವಿ ಭಾರತದ ವರದಿಗಾರ ಅಭಿಷೇಕ್ ದತ್ತಾ ರಾಯ್ ಬೆಳಕಿಗೆ ತಂದಿದ್ದ ಅಕ್ರಮ ಮರಳು ದಂಧೆಯ ವಿರುದ್ಧ ಕ್ರಮ ಕೈಗೊಳ್ಳದ ಪೊಲೀಸರು, ವರದಿಗಾರನ ವಿರುದ್ಧವೇ ಮೂರು ಕಡೆಗಳಲ್ಲಿ ದೂರು ದಾಖಲಿಸಿಕೊಂಡಿದ್ದರು. ಈ ಹಿನ್ನೆಲೆಯಲ್ಲಿ ಅಭಿಷೇಕ್ ದತ್ತಾ ರಾಯ್ ಜಾಮೀನಿಗಾಗಿ ಕಲ್ಕತ್ತಾ ಹೈಕೋರ್ಟ್ ಮೆಟ್ಟಿಲೇರಿದ್ದರು.
