ರಾಂಚಿ: ಐಷಾರಾಮಿ ಕಾರುಗಳನ್ನು ಹೊಂದುವುದನ್ನು ಪ್ರತಿಷ್ಠೆಯ ಸಂಗತಿ ಎಂದೇ ಪರಿಗಣಿಸಲಾಗುತ್ತದೆ. ಆದರೆ, ರಾಂಚಿಯಲ್ಲಿ 90 ಲಕ್ಷ ರೂ. ಐಷಾರಾಮಿ ಬಿಎಂಡಬ್ಲ್ಯು ಕಾರನ್ನು ತ್ಯಾಜ್ಯ ಸಾಗಿಸಲು ಬಳಸಲಾಗುತ್ತದೆ.
ಹೌದು, ಅಚ್ಚರಿಯಾದ್ರೂ ಇದು ಸತ್ಯ. ರಾಂಚಿಯ ಪ್ರಿನ್ಸ್ ಶ್ರೀವಾಸ್ತವ್ ಅವರು ಒಂದೂವರೆ ವರ್ಷಗಳ ಹಿಂದೆ 90 ಲಕ್ಷ ರೂ. ಕೊಟ್ಟು ಬಿಎಂಡಬ್ಲ್ಯು ಕಾರನ್ನು ಖರೀದಿಸಿದ್ದರು. ಅದನ್ನು ಅವರು ತಂದೆಗೆ ಉಡುಗೊರೆಯಾಗಿ ನೀಡಿದ್ದರು. ಆದರೆ, ಕೇವಲ ಒಂದೂವರೆ ವರ್ಷದಲ್ಲಿ ಕಾರಿನ ಸೇವೆಯಿಂದ ಬೇಸರಗೊಂಡಿದ್ದಾರೆ. ಹೀಗಾಗಿ, ಅದರಲ್ಲಿ ಕಸವನ್ನು ಎತ್ತಿ ಸಾಗಿಸುತ್ತಿದ್ದಾರೆ. ಬಿಎಂಡಬ್ಲ್ಯು ಕಾರಿನಿಂದ ಕಸ ವಿಲೇವಾರಿ ಮಾಡುವ ವಿಡಿಯೋಗಳನ್ನು ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದಾರೆ. ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.
ಎಂಬಿಬಿಎಸ್ ಓದಿದವಳು ಡಾಕ್ಟರ್ ಆಗುವ ಬದಲು ಭಿಕ್ಷುಕಿಯಾದ ಕಥೆ!
ಈ ದುಬಾರಿ ಕಾರಿನ ಸೇವೆಯಿಂದ ಅಸಮಾಧಾನಗೊಂಡು ಕಸ ಸಾಗಿಸಲು ಪ್ರಾರಂಭಿಸಿದ್ದೇನೆ. ಕಾರನ್ನು ಖರೀದಿಸಿದಾಗ ಮಾರಾಟಗಾರರು ಉತ್ತಮ ಸೇವೆಯ ಭರವಸೆ ನೀಡಿದ್ದರು. ಕಾರಿನಲ್ಲಿ ಯಾವುದೇ ತಾಂತ್ರಿಕ ನ್ಯೂನ್ಯತೆಗಳಿದ್ದರೆ ತಲೆಕೆಡಿಸಿಕೊಳ್ಳಬೇಕಾಗಿಲ್ಲ, ನಾವು ಸರಿಪಡಿಸುತ್ತೇವೆ ಎಂಬ ಆಶ್ವಾಸನೆ ಕೊಟ್ಟಿದ್ದರು. ಆದರೆ, ಕಾರು ಖರೀದಿಸಿದ 10ನೇ ದಿನ ಕಾರಿನ ಟೈರ್ ಹಾಳಾಯಿತು. 20ನೇ ದಿನ ಎರಡನೇ ಟೈರ್ ಸಿಡಿಯಿತು ಎಂದು ಪ್ರಿನ್ಸ್ ತಿಳಿಸಿದರು.
ಕಾರು ಮಾರಾಟಗಾರರ ಸೇವಾ ವ್ಯತ್ಯಯದ ಬಗ್ಗೆ ದೂರಿ, ಐಷರಾಮಿ ಕಾರನ್ನು ತ್ಯಾಜ್ಯ ವಿಲೇವಾರಿಗೆ ಬಳಸುತ್ತಿದ್ದಾರೆ ಈ ವ್ಯಕ್ತಿ. ಈ ಮೂಲಕ ಮಾರಾಟಗಾರರಿಗೆ ಮುಜುಗರವನ್ನು ಸಹ ಉಂಟುಮಾಡಿದ್ದಾರೆ.
ಅಲ್ವಾರ್ ಮಹಾರಾಜರು ನೆನಪಿಸಿದ ಪ್ರಿನ್ಸ್ ಶ್ರೀವಾಸ್ತವ್
1920ರ ದಶಕದಲ್ಲಿ ಅಲ್ವಾರ್ ಮಹಾರಾಜರು ಇಂತಹದ್ದೇ ಒಂದು ಘಟನೆಗೆ ಸಾಕ್ಷಿ ಆಗಿದ್ದರು. ಆಗಿನ ಕಾಲದಲ್ಲಿ ರೋಲ್ಸ್ ರಾಯ್ಸ್ ಕಾರಿನ ಮಾಲೀಕತ್ವ ಹೊಂದುವುದು ಹೆಮ್ಮೆಯ ಸಂಗತಿ ಆಗಿತ್ತು. ರಾಜಸ್ಥಾನದ ಅಲ್ವಾರ್ ಮಹಾರಾಜ ಜೈ ಸಿಂಗ್ ಅವರು ಲಂಡನ್ ಮೇಫೇರ್ ಪ್ರದೇಶದಲ್ಲಿನ ರೋಲ್ಸ್ ರಾಯ್ಸ್ ಶೋರೂಂಗೆ ಕಾಲಿಟ್ಟರು. ಸಾಮಾನ್ಯ ಬಡ ಭಾರತೀಯರಂತೆ ಬಟ್ಟೆ ಧರಿಸಿದ್ದ ಅವರನ್ನು ಶೋ ರೂಂ ಮಾರಾಟಗಾರ ಅವರನ್ನು ಹೊರ ತಳ್ಳಿದ. ತಕ್ಷಣವೇ ಮಹಾರಾಜರು ಆರು ಕಾರು ಖರೀದಿಸಿದ್ದರು. ಅವೆಲ್ಲವನ್ನೂ ಭಾರತಕ್ಕೆ ತಂದು ಪುರಸಭೆಯ ಕಸ ಸಂಗ್ರಹ ವಾಹನಗಳಾಗಿ ಬಳಸಿದ್ದರು.
ಇದರಿಂದ ರೋಲ್ಸ್ ರಾಯ್ಸ್ನ ಖ್ಯಾತಿಗೆ ಧಕ್ಕೆ ಬಂದು ಆದಾಯವು ವೇಗವಾಗಿ ಕುಸಿಯಿತು. ಅಂತಿಮವಾಗಿ ರೋಲ್ಸ್ ರಾಯ್ಸ್ ಮಾರಾಟಗಾರನ ವರ್ತನೆಗೆ ಕ್ಷಮೆಯಾಚಿಸಿ ರಾಜ ಜೈ ಸಿಂಗ್ ಅವರಿಗೆ ಪತ್ರ ಕಳುಹಿಸಿದರು. ಮತ್ತೆ ಆರು ಹೊಸ ಕಾರುಗಳನ್ನು ಉಚಿತವಾಗಿ ನೀಡಿದರು. ಆ ನಂತರ ರಾಜನು ಪುರಸಭೆ ಮತ್ತು ಇತರರನ್ನು ಕಸ ಸಂಗ್ರಹಿಸಲು ರೋಲ್ಸ್ ರಾಯ್ಸ್ ಬಳಸುವುದನ್ನು ನಿಲ್ಲಿಸುವಂತೆ ಆಜ್ಞೆ ಮಾಡಿದ್ದರು.
