ಢಾಕಾ( ಬಾಂಗ್ಲಾದೇಶ): ಕೊರೊನಾ ಹಾವಳಿಯಿಂದ ದೇಶವನ್ನು ಪಾರು ಮಾಡಲು ಬಾಂಗ್ಲಾ ಪ್ರಧಾನಿ ಶೇಖ್ ಹಸೀನಾ 72,750 ಕೋಟಿ ಟಕಾ ಅಂದರೆ 65,516 ಕೋಟಿ ರೂಪಾಯಿಯ ಆರ್ಥಿಕ ಪ್ಯಾಕೇಜ್ ಅನ್ನು ಘೋಷಣೆ ಮಾಡಿದ್ದಾರೆ.
ಮೊದಲಿಗೆ 4,502 ಕೋಟಿ ರೂಪಾಯಿಯ ತುರ್ತು ಹಣಕಾಸನ್ನು ಘೋಷಣೆ ಮಾಡಲಾಗಿತ್ತು. ಈ ಹಣದಲ್ಲಿ ರಫ್ತು ಆಧಾರಿತ ಉದ್ಯಮಗಳ ನೌಕರರಿಗೆ ವೇತನವನ್ನು ನೀಡಲಾಗಿತ್ತು. ಇಂದು 61,013 ಕೋಟಿಯನ್ನು ಘೋಷಣೆ ಮಾಡಲಾಗಿದೆ. ಇದು ಒಟ್ಟು 72,750 ಕೋಟಿ ರೂಪಾಯಿಗಳ ಆರ್ಥಿಕ ಪ್ಯಾಕೇಜ್ ಆಗಿದೆ.
ತಮ್ಮ ಗೃಹಕಚೇರಿ ಗನೋಬಾಭನ್ ಈ ಘೋಷಣೆ ಮಾಡಿದ್ದು, ಇದು ಬಾಂಗ್ಲಾದೇಶದ ಜಿಡಿಪಿಯ ಶೇಕಡಾ 2.52ರಷ್ಟಿದೆ. ನಮ್ಮ ಆರ್ಥಿಕತೆ ಮತ್ತೆ ಚೇತರಿಕೆಗೊಳ್ಳುತ್ತದೆ ಎಂಬ ಭರವಸೆಯಿದೆ ಎಂದು ಶೇಖ್ ಹಸೀನಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಜೊತೆಗೆ ಕೊರೊನಾ ಮಹಾಮಾರಿಯಿಂದ ವಿಶ್ವವನ್ನು ದೇವರು ಕಾಪಾಡಲಿ ಎಂದು ಪ್ರಾರ್ಥಿಸಿದ್ದಾರೆ.
ಬಾಂಗ್ಲಾದೇಶದಲ್ಲಿ ಈವರೆಗೂ 99 ಕೊರೊನಾ ಸೋಂಕಿತರು ಪತ್ತೆಯಾಗಿದ್ದು, 9 ಮಂದಿ ಸಾವನ್ನಪ್ಪಿದ್ದಾರೆ. 30 ಮಂದಿಗೆ ಚಿಕಿತ್ಸೆ ನೀಡಲಾಗಿದ್ದು, ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಚ್ ಆಗಿದ್ದಾರೆ. ಈಗಾಗಲೇ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡಿದ್ದು ರಾಷ್ಟ್ರಾದ್ಯಂತ ಸಾರಿಗೆ ವ್ಯವಸ್ಥೆಯನ್ನು ಏಪ್ರಿಲ್ 11ರವರೆಗೆ ಬಂದ್ ಮಾಡಲಾಗಿದೆ.
