ರಾತ್ರಿ ವೇಳೆಯೂ ಕಾರ್ಯಾಚರಿಸೋ ಯುದ್ಧವಾಹನಗಳ ತಯಾರಿಕೆಗೆ ಭಾರತೀಯ ಸೇನೆ ಸಜ್ಜು

ಚೀನಾಗೆ ಸರಿಸಮನಾಗಿ ನಿಲ್ಲಲು ರಾತ್ರಿ ವೇಳೆಯೂ ಕಾರ್ಯಾಚರಣೆಗೆ ಸಾಧ್ಯವಾಗುವಂತೆ ವಾಹನಗಳನ್ನು ತಯಾರಿಸಲು ಭಾರತೀಯ ಸೇನೆ ಮುಂದಾಗಿದೆ.

ನವದೆಹಲಿ: ರಾತ್ರಿ ವೇಳೆ ಕಾರ್ಯಾಚರಣೆ ಮಾಡಬಲ್ಲ ಐಸಿವಿ (ಇನ್​ಫ್ಯಾಂಟ್ರಿ ಕಾಂಬ್ಯಾಟ್ ವೆಹಿಕಲ್ಸ್​​) ಅನ್ನು ತಯಾರಿಸಲು ಭಾರತೀಯ ಸೇನೆ ಮುಂದಾಗಿದ್ದು, ಪೂರ್ವ ಲಡಾಖ್​ನ ಚೀನಾ-ಭಾರತ ಗಡಿಯಲ್ಲಿ ಉದ್ವಿಗ್ನತೆ ಇರುವ ಈ ಸಮಯದಲ್ಲಿ ಪ್ರಭಾವ ಬೀರಲಿವೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ಈಗಾಗಲೇ ಭಾರತೀಯ ಸೇನೆ ಆಸಕ್ತಿ ಇರುವ ಕಂಪನಿಗಳಿಂದ ಅರ್ಜಿ ಆಹ್ವಾನಿಸಿದ್ದು, ಪ್ರಕ್ರಿಯೆ ಮುಂದುವರೆದಿದೆ. ಬಿಎಂಪಿ/2ಕೆ ವಾಹನಗಳ ಮಾದರಿಯಲ್ಲಿ ಕೆಲವು ಮಾರ್ಪಾಡುಗಳನ್ನು ಮಾಡಲಾಗುತ್ತದೆ.

ಬಿಎಂಪಿ/2ಕೆ ವಾಹನಗಳನ್ನು ಮೊದಲ ಬಾರಿಗೆ 1985ರಲ್ಲಿ ಭಾರತೀಯ ಸೇನೆಗೆ ಸೇರ್ಪಡೆ ಮಾಡಿಕೊಳ್ಳಲಾಗಿತ್ತು. ಅಲ್ಲಿಂದ ಇಲ್ಲಿಯವರೆಗೂ ಈ ವಾಹನಗಳು ಸೇನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದವು.

ಗಡಿಭಾಗಗಳಲ್ಲಿ ಬೆದರಿಕೆಯನ್ನು ತಪ್ಪಿಸುವ ಸಲುವಾಗಿ ವಾಹನಗಳನ್ನು ತಯಾರಿಸಲಾಗುತ್ತದೆ ಎಂದು ಸೇನಾ ಮೂಲಗಳು ಮಾಹಿತಿ ನೀಡಿವೆ. ಈ ವಾಹನದಲ್ಲಿ ಇಮೇಜ್ ಇನ್​ಟೆಂಸಿಫೈಯರ್ ಟೆಕ್ನಾಲಜಿ ಇರಲಿದ್ದು, ಹಗಲು ಮತ್ತು ರಾತ್ರಿಯ ವೇಳೆ ವಾಹನಗಳು ಕಾರ್ಯಾಚರಣೆ ಮಾಡಲು ಅನುಕೂಲ ಮಾಡಿಕೊಡಲಿದೆ.

ಸದ್ಯಕ್ಕೆ ಲಡಾಖ್​ನ ಚೀನಾ ಹಾಗೂ ಭಾರತದ ಗಡಿಯಲ್ಲಿ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿದ್ದು, ಎರಡೂ ರಾಷ್ಟ್ರಗಳು ಕೆಲವು ಪ್ರದೇಶಗಳಲ್ಲಿ ಸೇನಾ ಜಮಾವಣೆಯತ್ತ ಮುಖಮಾಡಿವೆ. ಇಂಥಹ ಪರಿಸ್ಥಿತಿಯಲ್ಲಿ ಈ ರೀತಿಯ ವಾಹನಗಳು ಅತಿ ಮುಖ್ಯ ಎನ್ನಲಾಗುತ್ತಿದೆ.

ಚೀನಾದ ಸೇನೆಗೆ ಸರಿಸಮನಾಗಿ ನಿಲ್ಲುವ ಸಲುವಾಗಿ ಹಾಗೂ ಚೀನಾ ಸೇನೆಯ ಯುದ್ಧವಾಹನಗಳಿಗೆ ಸೆಡ್ಡು ಹೊಡೆಯುವ ಸಲುವಾಗಿ ಈ ವಾಹನಗಳು ಸಾಕಷ್ಟು ಮಹತ್ವ ಪಡೆದುಕೊಳ್ಳಲಿವೆ.