ಪರೆಂಬಲೂರು : ತಮಿಳುನಾಡಿನಲ್ಲಿ ಲೋಕಸಭೆ ಚುನಾವಣೆ ಕಾವು ದಿನದಿಂದ ದಿನಕ್ಕೆ ಏರುತ್ತಲೇ ಇದೆ. ಡಿಎಂಕೆ ನೇತೃತ್ವದ ಯುಪಿಎ ಹಾಗೂ ಎಐಎಡಿಎಂಕೆ ನೇತೃತ್ವದ ಎನ್ಡಿಎ ಮೈತ್ರಿಕೂಟದ ನಡುವೆ ತೀವ್ರ ಹಣಾಹಣಿ ಏರ್ಪಟ್ಟಿದೆ.
ಹೀಗಾಗಿ ರಾಜ್ಯದಲ್ಲಿ ಗೆಲ್ಲಲು ಹಣದ ಕರಾಮತ್ತು ಸಹ ಹೆಚ್ಚುತ್ತಿದೆ ಎನ್ನುತ್ತಿವೆ ಇತ್ತೀಚಿನ ಕೆಲ ರೇಡ್ಗಳು.. ಅಕ್ರಮಗಳ ಮೇಲೆ ಹದ್ದಿನ ಕಟ್ಟಿಟ್ಟಿರುವ ಚುನಾವಣಾ ಆಯೋಗ ನಿರಂತರ ಹಂಟಿಂಗ್ ಕೈಗೊಂಡಿದೆ. ತಮಿಳುನಾಡಿನ ಫ್ಲೈಯಿಂಗ್ ಸ್ಕ್ವಾಡ್ ದಿಢೀರ್ ನಡೆಸಿದ ದಾಳಿಯಲ್ಲಿ ಅಚ್ಚರಿಯ ಘಟನೆಯೊಂದು ನಡೆದಿದೆ.
ಪೆರಂಬಲೂರು ಜಿಲ್ಲೆಯ ಪೆರಾಲಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಫ್ಲೈಯಿಂಗ್ ಸ್ಕ್ವಾಡ್ ಕಾರ್ವೊಂದನ್ನು ತಪಾಸಣೆಗೆ ಒಳಪಡಿಸಿದೆ. ಮೊದ ಮೊದಲು ಚೆಕ್ ಮಾಡಿದಾಗ ಕಾರಿನಲ್ಲಿ ಯಾವುದೇ ಹಣ ಸಿಕ್ಕಿಲ್ಲ. ಆದರೆ, ಚುನಾವಣಾ ಅಕ್ರಮ ನಿಯಂತ್ರಣ ತಂಡಕ್ಕೆ ಏನೋ ಅನುಮಾನ ಬಂದಿದೆ. ಹಾಗಾಗಿ ಕಾರನ್ನು ಡಿಸಿ ಕಚೇರಿಗೆ ತೆಗೆದುಕೊಂಡು ಹೋಗಿದ್ದಾರೆ. ಸ್ಕ್ಯಾನರ್ಗೆ ಒಳಪಡಿಸಿದಾಗ ಕಾರಿನ ಡೋರ್ನ ಒಳಭಾಗದಲ್ಲಿ ಹಣ ಇಟ್ಟಿರುವುದು ಪತ್ತೆಯಾಗಿದೆ.
ಆಗ ಕಾರ್ ಡೋರ್ನ ಒಳಭಾಗ ತೆಗೆದು ನೋಡಿದಾಗ ಅದರಲ್ಲಿ 2.10 ಕೋಟಿ ರೂ. ನಗದು ಪತ್ತೆಯಾಗಿದೆ. ಅಂದಹಾಗೆ ಇದು ಡಿಎಂಕೆ ಮಿತ್ರ ಪಕ್ಷ ವಿಕೆಸಿಯ ರಾಜ್ಯ ಕಾರ್ಯದರ್ಶಿ ತಂಗಾದುರೈಗೆ ಸೇರಿದ ಕಾರು ಎಂಬುದು ಗೊತ್ತಾಗಿದೆ.
ಕಾರಿನಲ್ಲಿದ್ದ ಎಲ್ಲ ವಸ್ತುಗಳನ್ನ ವಶಕ್ಕೆ ಪಡೆದಿರುವ ಫ್ಲೈಯಿಂಗ್ ಸ್ಕ್ವಾಡ್, ಹಣವನ್ನ ಐಟಿ ಇಲಾಖೆಗೆ ಒಪ್ಪಿಸಿದ್ದು, ಪ್ರಕರಣ ದಾಖಲಿಸಿಕೊಂಡು ವಿಚಾರಣೆ ನಡೆಸುತ್ತಿದೆ. ಇಷ್ಟೊಂದು ಅಕ್ರಮ ಹಣ ಸಿಗುತ್ತಿರುವ ಎರಡನೇ ಪ್ರಕರಣ ಇದಾಗಿದೆ. ಡಿಎಂಕೆ ಕಜಾಂಚಿ ದುರೈ ಮುರುಗನ್ ಹಾಗೂ ಅವರ ಸಹಚರನ ಬಳಿ 9 ಕೋಟಿ ರೂ. ನಗದು ಪತ್ತೆಯಾಗಿತ್ತು.
