ಮುಂಚೆರಿಯಲ್, ತೆಲಂಗಾಣ : ಪತಿ ಮೃತಪಟ್ಟ ಸುಮಾರು 11 ತಿಂಗಳ ನಂತರ ಮಹಿಳೆ ಮಗುವಿಗೆ ಜನ್ಮ ನೀಡಿರುವ ಘಟನೆ ತೆಲಂಗಾಣದ ವಾರಂಗಲ್ನಲ್ಲಿ ನಡೆದಿದೆ. ಫರ್ಟಿಲಿಟಿ ಸೆಂಟರ್ನ ಸಹಾಯದಿಂದ ವಾರಂಗಲ್ ಸಮೀಪದ ಮುಂಚೆರಿಯಲ್ ಮೂಲದ ಮಹಿಳೆಯೊಬ್ಬರು ಮಗು ಪಡೆದಿದ್ದಾರೆ.
2013ರಲ್ಲಿ ವಿವಾಹವಾಗಿದ್ದ ದಂಪತಿಗೆ ಸುಮಾರು ಏಳು ವರ್ಷಗಳು ಕಳೆದರೂ ಮಕ್ಕಳಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಆ ದಂಪತಿ ಒಯಾಸಿಸ್ ಫರ್ಟಿಲಿಟಿ ಸೆಂಟರ್ನಲ್ಲಿ ಚಿಕಿತ್ಸೆ ಪಡೆಯುತ್ತಿತ್ತು. ಚಿಕಿತ್ಸೆ ಪಡೆಯುವಾಗ ಆಸ್ಪತ್ರೆ ಸಂಗ್ರಹಿಸಿಟ್ಟಿದ್ದ 'ಮಾದರಿ' ಮಹಿಳೆಗೆ ಸಂತಾನಭಾಗ್ಯ ಒದಗಿಸಿದೆ. ಸಂತಾನಭಾಗ್ಯವಿಲ್ಲದ ಕಾರಣದಿಂದ ದಂಪತಿ 2020ರಿಂದ ಒಯಾಸಿಸ್ ಫರ್ಟಿಲಿಟಿ ಸೆಂಟರ್ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.
2021ರ ಮಾರ್ಚ್ ತಿಂಗಳಲ್ಲಿ ವೈದ್ಯರು ಪರೀಕ್ಷೆಗಾಗಿ ಸ್ತ್ರೀ ಅಂಡಾಣು ಮತ್ತು ಪುರುಷ ವೀರ್ಯಗಳನ್ನು ಪಡೆದು ಸಂಗ್ರಹಿಸಿಟ್ಟಿದ್ದರು. ಆದರೆ, 2021ರಲ್ಲಿ ಕೋವಿಡ್ ಕಾರಣದಿಂದ ಪತಿ ಮೃತಪಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಮಗುವನ್ನು ಪಡೆಯಬೇಕೆಂಬ ಪತಿಯ ಆಸೆಯನ್ನು ಈಡೇರಿಸಲು ಮಹಿಳೆ ಮುಂದಾಗಿದ್ದಾರೆ. ವಾರಂಗಲ್ನ ಆಸ್ಪತ್ರೆಯಲ್ಲಿ ಸಂಗ್ರಹಿಸಿರುವ ಪತಿ ವೀರ್ಯದ ಮೂಲಕ ತಾಯಿಯಾಗಲು ನಿರ್ಧರಿಸಿದ್ದಾರೆ.
ಈ ಕುರಿತು ತನ್ನ ಪತಿಯ ಕುಟುಂಬದವರಿಗೂ ತಿಳಿಸಿದ ಆಕೆ, ನಂತರ ವೈದ್ಯ ನಿಪುಣರನ್ನು ಸಂಪರ್ಕಿಸಿದ್ದಾರೆ. ಇಂತಹ ಸಂತಾನಕ್ರಮಕ್ಕೆ ಕಾನೂನು ತೊಂದರೆಗಳಿರುವ ಕಾರಣದಿಂದ ಹೈಕೋರ್ಟ್ನ ಮೊರೆ ಹೋಗಿದ್ದು, ಅಲ್ಲಿಯೂ ಅನುಮತಿ ಪಡೆದುಕೊಂಡಿದ್ದಾರೆ. ನಂತರ ವೈದ್ಯರು 2021ರ ಆಗಸ್ಟ್‌ನಲ್ಲಿ ಆಕೆಯ ಅಂಡಾಣು ಮತ್ತು ಪತಿಯ ವೀರ್ಯದೊಂದಿಗೆ ಐವಿಎಫ್ ಕಾರ್ಯವಿಧಾನವನ್ನು ಪ್ರಾರಂಭಿಸಿದ್ದು, 2022ನೇ ಮಾರ್ಚ್ 22ರಂದು ಆಕೆ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ.
ಇದನ್ನೂ ಓದಿ: 20 ರಿಂದ 39 ವರ್ಷ ವಯಸ್ಸಿನವರಲ್ಲಿ ಪ್ರಿಡಯಾಬಿಟಿಕ್ಸ್‌ ಶೇ.11ರಷ್ಟು ಏರಿಕೆ : ಮೆಡಾಲ್ ಹೆಲ್ತ್‌ಕೇರ್ ವರದಿ
